سايىس بەتاشارىندا قازاقستان تەلەراديوكورپوراتسياسى باسقارما توراعاسىنىڭ ورىنباسارى ەركىن مۇحامەدجانوۆ ءسوز سويلەپ, 1966 جىلدىڭ 1 قاڭتارىندا قازاقستاننىڭ حالىق ءارتىسى انۋاربەك بايجانباەۆتىڭ ۇنىمەن ەفيرگە شىققان راديونىڭ ۇلت رۋحانياتىنىڭ كەمەلدەنۋىنە قوسقان ولشەۋسىز ۇلەسىن اتاپ ءوتىپ, «شالقار» راديوسىنىڭ الپىس جىلدىق مەرەيتويىنىڭ اتاۋسىز قالماۋى كەرەگىن ايتتى. سونداي-اق ەركىن تاڭاتقان ۇلى سايىسقا تۇسۋگە ساقاداي ساي تۇرعان قوعام قايراتكەرلەرى, اقىن-جازۋشىلار, تەاتر مايتالماندارى مەن جۋرناليستەرگە اق جول تىلەدى.
باسقارما توراعاسىنىڭ ورىنباسارىنان كەيىن بەلگىلى قالامگەر, تاريحشى قويشىعارا سالعارا جارىستا باق سىناۋعا كەلگەن تاستاياقشىلارعا باتا بەرىپ, العاشقى اقجولتاي شاردى سوقتى. وسىلاي جارتى عاسىردان استام ۋاقىت بويى قازاق تىلىندە ەفيرگە شىعىپ كەلە جاتقان راديونىڭ جۇلدەسى ءۇشىن مەرگەندەردىڭ «جان الىسىپ, جان بەرىسكەن» سايىسى باستالدى.
بىرنەشە ساعاتقا سوزىلعان تارتىستى ويىندا بىرنەشە ازامات ارنايى ديپلومدارمەن ماراپاتتالىپ, جۇلدەلى ءۇشىنشى ورىندى ق.قۋانىشباەۆ اتىنداعى قازاق دراما تەاترىنىڭ ءارتىسى قۋاندىق قىستىقباەۆ, ەكىنشى ورىندى «حابار» اگەنتتىگىنىڭ مۋزىكالىق پروديۋسەرى تالانت ارعىنعالي جەڭىپ الدى. ال باس جۇلدە پارلامەنت سەناتىنىڭ دەپۋتاتى التىنبەك نۇح ۇلىنىڭ قانجىعاسىنا بايلاندى.
