ساراپشىلاردىڭ ايتۋىنشا, ەلەكتر ەنەرگياسىنا سۇرانىس جىل سايىن ارتىپ كەلەدى. ونەركاسىپ, قۇرىلىس, تۇرعىن ءۇي-كوممۋنالدىق شارۋاشىلىق پەن تسيفرلىق سەكتور دامىعان سايىن قوسىمشا قۋات كوزدەرى قاجەت. گەنەراتسيالايتىن قۋاتتاردىڭ شامامەن 60 پايىزى 30 جىلدان استام ۋاقىت بۇرىن ىسكە قوسىلعان. توزعان جابدىقتار جۇيەنىڭ مۇمكىندىگىن شەكتەپ وتىر.
ەنەرگەتيكا ساراپشىسى اسەت ناۋرىزباەۆ تاپشىلىق اسىرەسە قىس مەزگىلىندە كۇشەيەتىنىن ايتادى. وڭتۇستىك وڭىرلەردە تۇتىنۋ كولەمى قولداعى قۋاتتان اسىپ تۇسەدى. وسىنداي كەزەڭدەردە جۇكتەمەنى تەڭەستىرۋگە كورشى ەلدەردەن ەلەكتر ەنەرگياسى ساتىپ الىنادى. ونىڭ ايتۋىنشا, بيىل قوسىمشا 621 مۆت قۋات ىسكە قوسىلادى. ونىڭ باسىم بولىگى جاڭارتىلاتىن ەنەرگيا كوزدەرى ەسەبىنەن قامتاماسىز ەتىلەدى.
مامان ماسەلەنى شەشۋ ماقساتىندا جاڭا ستانسالار سالۋمەن قاتار قولدانىستاعى ينفراقۇرىلىمدى جاڭارتۋ قاجەت ەكەنىن ايتادى. ەلەكتر جەلىلەرىندەگى شىعىن كەي وڭىرلەردە 17 پايىزعا دەيىن جەتەدى. بۇل – ءىرى ستانسانىڭ قۋاتىنا تەڭ كورسەتكىش. سوندىقتان جەلىلەردى جاڭعىرتۋ, تسيفرلىق تەحنولوگيالاردى ەنگىزۋ مەن ەنەرگيا تيىمدىلىگىن ارتتىرۋ ماڭىزدى.
ساراپشىلار الداعى جىلدارى 6,7 گۆت بولاتىن ونداعان جوبانى ىسكە قوسۋ جوسپارلانىپ وتىرعانىن ايتادى. ۇزاقمەرزىمدى جوسپارعا اتوم ەلەكتر ستانساسىن سالۋ دا كىرەدى. الايدا مۇنداي نىساندار ىسكە قوسىلعانشا قولداعى قۋاتتى ساقتاۋ باستى مىندەت بولىپ قالا بەرەدى.
مامانداردىڭ پىكىرىنشە, ەلىمىز ازىرگە ءداستۇرلى ەنەرگيا كوزدەرىنەن تولىق باس تارتا المايدى. ەلدەگى ەلەكتر ەنەرگياسىنىڭ شامامەن 70 پايىزى كومىرمەن جۇمىس ىستەيتىن ستانسالاردا وندىرىلەدى. جاڭارتىلاتىن ەنەرگيا كوزدەرى دامىپ كەلە جاتقانىمەن, ولاردىڭ ۇلەسى ءالى جەتكىلىكسىز.
سالا وكىلدەرى جاڭا قۋات كوزدەرىن كەزەڭ-كەزەڭىمەن ىسكە قوسۋ ارقىلى يمپورتقا تاۋەلدىلىكتى ازايتۋعا بولاتىنىن ايتادى. بىراق بۇل ءۇشىن ينفراقۇرىلىمدى جۇيەلى جاڭارتۋ مەن ۇزاقمەرزىمدى ينۆەستيتسيا قاجەت.
