وسكەمەن. 26 اقپان. اباي قۇنانباي ۇلىنىڭ 170 جىلدىعى قارساڭىندا وسكەمەندەگى ا.پۋشكين اتىنداعى وبلىستىق كىتاپحانادا س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ پروفەسسورى باۋىرجان ەردەمبەكوۆتىڭ بەستومدىق عىلىمي ەڭبەگىنىڭ تۇساۋكەسەرى ءوتتى. بۇل تۋرالى egemen.kz ءتىلشىسى حابارلادى.
عالىمنىڭ كوپ جىلعى قاجىرلى زەرتتەۋ ەڭبەگىنىڭ ىشىندە 10 جىل بويى زەرتتەلىپ, 2008 جىلى باسىلعان «ابايدىڭ ادەبي ورتاسى» مونوگرافياسىنىڭ اراب قارپىندەگى نۇسقاسى بار. بۇل ەڭبەك وتكەن جىلى جارىق كورىپ, قىركۇيەك ايىندا قىتايدىڭ بەيجىڭ قالاسىنداعى ورتالىق ۇلتتىق ۋنيۆەرسيتەتتە تانىستىرىلعان بولاتىن. مۇنداعى اۆتوردىڭ ماقساتى – قىتاي, تۇركيا, موڭعوليادا تۇراتىن قانداستارىمىزدىڭ ابايتانۋعا بايلانىستى عىلىمي قىزىعۋشىلىقتارىن وياتۋ.
كەلەسى جىلى ابايدىڭ كورنەكتى شاكىرتتەرىنىڭ ءبىرى, قازاق ادەبيەتى تاريحىنىڭ وزىندىك ءبىر بيىگى – ءارىپ تاڭىربەرگەن ۇلىنىڭ تۋعانىنا 160 جىل تولادى. وسى ورايدا ب.ەردەمبەكوۆ «ءارىپ اقىن», «الاشتىڭ اقيىعى – ءارىپ قىران», «بۇل ولەڭ شىققان ەكەن ءبىرتالايدان...» جانە اۆتور قۇراستىرعان «ءارىپ تاڭىربەرگەن ۇلىنىڭ «شىعارمالارى» كىتاپتارىن وقىرمان قاۋىمعا ۇسىندى. قازىرگى تاڭدا ءارىپ اقىننىڭ ادەبي مۇراسى جاڭاشا پايىمداۋلار تۇرعىسىنان جان-جاقتى, تەرەڭ زەرتتەۋدى قاجەت ەتەدى. عالىمنىڭ ءارىپ اقىن مەن ونىڭ شىعارماشىلىعىنا ارناعان عىلىمي ەڭبەكتەرى وسى ولقىلىقتىڭ ورنىن تولتىرىپ وتىر.
ب.ەردەمبەكوۆ – 200-گە تارتا عىلىمي باياندامالار مەن عىلىمي-تانىمدىق ماقالالار, سونىمەن قاتار, 2 مونوگرافيا, 1 وقۋلىق, 6 وقۋ قۇرالى, 2 وقۋ-ادىستەمەلىك نۇسقاۋدىڭ اۆتورى.
جيىندا وبلىستىق ىشكى ساياسات باسقارماسىنىڭ باسشىسى ەربول نۇرعاليەۆ, «شىعىس-اقپارات» جشس ديرەكتورى نۇرجان قۋانتاي ۇلى, فيلولوگيا عىلىمدارىنىڭ دوكتورى ايجان كارتاەۆا جانە جازۋشى-جۋرناليست ايتمۇحامەد قاسىموۆ اۆتوردىڭ ىرگەلى ىزدەنىسى جونىندەگى تۇششىمدى وي-پىكىرلەرىمەن ءبولىستى. سونىمەن بىرگە, فيلولوگيا عىلىمدارىنىڭ دوكتورى ب.ەردەمبەكوۆ ءوزىنىڭ كوپ جىلعى عىلىمي ەڭبەگى جونىندە كەڭىنەن اڭگىمەلەپ, وقىرمانداردىڭ ساۋالىنا جاۋاپ بەردى.
دۋمان اناش.
دەرەك: egemen.kz.
سۋرەت: شقو اقپاراتتىق ورتالىعى.
