كەشە استانادا مادەنيەت جانە سپورت ءمينيسترى ارىستانبەك مۇحامەدي ۇلى قاتىسقان سپورت كۇنىن مەرەكەلەۋگە ارنالعان سالتاناتتى جيىن ءوتتى. وعان رەسپۋبليكالىق سپورت ۇيىمدارىنىڭ جەتەكشىلەرى مەن وكىلدەرى, سپورت ارداگەرلەرى جانە تاعى باسقا سالا ماماندارى قاتىستى.
شارا بارىسىندا ۆەدومستۆو باسشىسى بايانداما جاساپ, ەلىمىزدىڭ سپورتتاعى قازىرگى احۋالىنا توقتالدى.
– بۇگىندە رەسپۋبليكادا 125 كاسىبي سپورت كلۋبى جۇمىس ىستەيدى. وندا 35 مىڭ ادامعا دەنەشىنىقتىرۋ جانە سپورتپەن شۇعىلدانۋعا جاعداي جاسالعان. سونداي-اق, 3,3 ملن. ادامدى قامتيتىن 92,5 مىڭ سپورت سەكتسياسى بار. وسى رەتتە اۋىل تۇرعىندارىنىڭ سانى 1,6 ملن. ادام ەكەنىن ەرەكشە ايتىپ وتكەن ءجون. جالپى, قازىرگى تاڭدا ەلىمىزدە 4 ملن. 300 مىڭ ادام ءارتۇرلى سپورت سايىستارىنا بەلسەندى قاتىسىپ, تۇراقتى سالاماتتى ءومىر سالتىن ۇستانادى. بۇل كورسەتكىش ەل حالقىنىڭ 25,1 پايىزىن قۇرايدى, – دەدى مينيستر. سونىمەن قاتار, ارىستانبەك مۇحامەدي ۇلى «100 ناقتى قادام» ۇلت جوسپارىن جۇزەگە اسىرۋ شەڭبەرىندە مينيسترلىك سپورتتى دامىتۋعا باعىتتالعان قۇجاتتار توپتاماسىن ازىرلەگەندىگىن ايتتى. جيىن سوڭىندا مينيستر بارشا قاتىسۋشىلاردى سپورت كۇنىمەن قۇتتىقتاپ, وسى سالادا ۇزدىك ىسىمەن كوزگە تۇسكەن ءبىر توپ ماماندى ماراپاتتادى. اتاپ ايتقاندا, «قۇرمەتتى سپورت قىزمەتكەرى» جانە «دەنەشىنىقتىرۋ مەن سپورتتى دامىتۋعا سىڭىرگەن ەڭبەگى ءۇشىن» توسبەلگىلەرىمەن, سونداي-اق, العىس حاتتارمەن 30-عا جۋىق مامان ماراپاتتالدى. ايتا كەتەيىك, «قازاقستان رەسپۋبليكاسىنداعى كاسىبي جانە وزگە دە مەرەكەلەر تۋرالى» قازاقستان رەسپۋبليكاسى پرەزيدەنتىنىڭ 1998 جىلعى 20 قاڭتارداعى №3827 جارلىعىنا سايكەس تامىز ايىنىڭ ءۇشىنشى جەكسەنبىسى سپورت كۇنى دەپ بەكىتىلگەن.
ەلامان قوڭىر, «ەگەمەن قازاقستان».
