باتىس عالىمدارى ۆولونتەرلىكپەن شۇعىلداناتىن قارتتاردىڭ ەرىكتى بولۋعا ىقىلاسى جوق قاتارلاستارىنا قاراعاندا ويى سەرگەك, كوڭىلى شات, ىزگىلىككە قۇلشىنىسى جوعارى بولاتىنىن ايتادى. تاعى ءبىر دايەك, ەگدە جاستا ەرىكتى اتانىپ, قوعامدىق جۇمىستا بەلسەندىلىك تانىتقان جانداردىڭ يممۋندىق جۇيەسى بەرىك بولا تۇسەدى.
مەملەكەت باسشىسى قاسىم-جومارت توقاەۆ بيىلعى قاڭتاردا وتكەن ۆولونتەرلەر فورۋمىندا سويلەگەن سوزىندە ەرىكتىلەردىڭ قوعامدى ىزگىلەندىرۋ جولىندا يگى ءىس ارقالاپ جۇرگەن ناعىز وتانشىل ازاماتتار ەكەنىن, ەرىكتى بولۋ – يگى ىستەر جاساۋ, جاقسىلىق ىستەپ, باسقاعا ۇلگى كورسەتۋ ەكەنىن, وتانىڭا ادال قىزمەت ەتۋ, تۋعان جەرىڭە جاناشىر بولۋ ەكەنىن اتاپ ايتتى.
«نيەتى ءتۇزۋ, جانى تازا ادامدار وسى جولدى تاڭدايدى, ەرىكتىلەر قاتارىنا قوسىلىپ, قاجىرلى ەڭبەك ەتەدى. ەرىكتىلەردى وزىق ويلى قوعامنىڭ ايناسى دەپ ايتساق, ارتىق بولمايدى. ناعىز ۆولونتەر تۇتاس قوعامنىڭ يگىلىگىن ويلايتىن, ەلىمىزدىڭ مۇرات-مۇددەسىن بيىككە قوياتىن سانالى ازامات ەكەنى ءسوزسىز. قينالعان ادامعا قولۇشىن بەرۋ – ۇلتىمىزدىڭ بويىندا بار اسىل قاسيەت. بابالارىمىز جاقىنىڭا جاناشىر بولۋدى, تابيعاتتى ايالاۋدى ادامگەرشىلىكتىڭ بەلگىسى ساناعان. ءاردايىم ىنتىماق پەن بىرلىكتى ساقتاپ, تاتۋ-ءتاتتى ءومىر ءسۇرۋدى ۇرپاعىنا وسيەت ەتكەن. ۇلى اباي «تولىق ادام» بولۋدىڭ ءبىر شارتى – جۇرتقا جاقسىلىق جاساۋ, شاپاعاتىڭدى تيگىزۋ دەگەن. سىزدەر وسى وسيەتكە ساي ەڭبەك ەتىپ, «ادال ازامات» دەگەن اتقا لايىقتى ىستەردى اتقارىپ جۇرسىزدەر. اسىرەسە سىن ساعاتتاردا ۆولونتەرلەرىمىز كەز كەلگەن شارۋاعا زور جاۋاپكەرشىلىكپەن قاراپ, بەلسەندى جۇمىس ىستەۋدە», دەگەن پرەزيدەنت سىن ساتىندە ەڭبەكتىڭ العى شەبىنەن تابىلاتىن ەرىكتىلەردىڭ ەڭبەگى ەرەن ەكەنىنە ەرەكشە توقتالدى.
ەلىمىزدە ۆولونتەرلەردىڭ ءبىر ۇلتتىق, 20 ايماقتىق فرونت-ءوفيسى جۇمىس ىستەيدى. جىلدان-جىلعا ەرىكتىلەر قاتارى قالىڭداپ كەلەدى. وسىدان التى جىل بۇرىن ولاردىڭ سانى 50 مىڭنىڭ اينالاسىندا ەدى, بۇگىندە 300 مىڭنان اسادى. استانا قالاسىنداعى «بەلسەندى ۇزاق ءومىر ءسۇرۋ ورتالىعى» «كۇمىس ۆولونتەرلەر» كلۋبىنىڭ ۇيلەستىرۋشىسى ءلاززات وتەعۇلوۆا زەينەت جاسىنداعى ەرىكتىلەردىڭ قاتارى دا جىل ساناپ ارتىپ كەلە جاتقانىن ايتادى.
– «2021 جىلى استانا قالاسى «بەلسەندى ۇزاق ءومىر ءسۇرۋ» ورتالىعىنا ەرىكتى بولىپ تىركەلگەن ەدىم. العاشىندا «ايكۋنە» حالىقتىق گيمناستيكاسىنان اپتاسىنا ەكى رەت جاتتىعۋ وتكىزدىم. كەيىن ورتالىق باسشىسى ۇيىمداستىرۋشى قىزمەتىنە شاقىردى. سول كەزدە نەگىزگى جۇمىسىممەن قاتار «كۇمىس ەرىكتىلەر» كلۋبىن جۇرگىزۋگە دە رۇقسات سۇرادىم. بۇعان دەيىن دە الماتى قالاسىنداعى ءدال وسىنداي ورتالىقتا 2019–2020 جىلدار ارالىعىندا «كۇمىس ۆولونتەر» كلۋبىنىڭ بەلسەندى مۇشەسى بولىپ, ءبىرشاما يگى ءىس اتقاردىق. قوعامعا پايدالى ءتۇرلى اكتسياعا قاتىسىپ, «قايىرىمدىلىق كەرۋەنى» رەسپۋبليكالىق بايقاۋىنىڭ «مەيىرىم جولىندا» اتالىمىمەن ماراپاتتالدىم. ءبىزدىڭ مىندەت – وسىنداي كلۋبتار قۇرىپ, بۇگىنگى بۋىنعا كونە سالت-ءداستۇرىمىزدى, ادەت-عۇرپىمىزدى دارىپتەۋ. بۇگىندە «كۇمىس ۆولونتەرلەر» كلۋبى ءتورت باعىتتا جۇمىس اتقارادى. جاستارعا پاتريوتتىق تاربيە بەرۋدە ولاردىڭ بويىنا تاريحىمىز بەن ۇلتتىق قۇندىلىعىمىزدى سىڭىرە وتىرىپ, كىتاپ وقۋعا دەگەن سۇيىسپەنشىلىگىن ارتتىرۋ, وتانسۇيگىشتىككە باۋلۋدى كوزدەيمىز. ءتول مۇرانى دارىپتەۋ جولىندا قولونەر مەن ۇلتتىق تاعامداردىڭ جاسالۋ جولدارىن ۇيرەتۋ ارقىلى شەبەرلىك ساباقتارىن وتكىزۋدى قولعا الدىق. ينكليۋزيۆتى ۆولونتەرلىك باعىتىندا كلۋب مۇشەلەرى زەينەتكەرلەر مەن مۇمكىندىگى شەكتەۋلى جاندارعا ۇلتتىق ويىنداردى ۇيرەتىپ, ەرتەگىلەر وقىپ بەرۋ, قويىلىمدارعا قاتىستىرۋعا كۇش سالادى. قورشاعان ورتانى قورعاۋ باعىتىندا جاستار, كوللەدج, جوعارى وقۋ ورىندارىنىڭ ستۋدەنتتەرىمەن بىرگە سەنبىلىك ۇيىمداستىرىپ, قوعامعا ۇلگى بولىپ كەلەدى», دەيدى ل.وتەعۇلوۆا.
ءلاززات اپاي زەينەت جاسىنداعى ۆولونتەرلەردىڭ «ۇلاعات» كلۋبى ادەبي-تانىمدىق باعىتتا دا يگى شارالاردى ىسكە اسىرىپ جاتقانىن ماقتانىشپەن اتاپ ءوتتى. كلۋب مۇشەلىگىندە عىلىم كانديداتتارى, تاجىريبەلى ۇستازدار, «ى.التىنسارين» توسبەلگىسىن العان بىلىكتى پەداگوگتەر دە بار. سونىمەن قاتار «اجەدەن قالعان اسىل مۇرا», «ۇلتتىق تاعامدار قۇپياسى» كلۋبتارى ۇمىت بولعان قازاق اسحاناسى مەن قولونەرىمىزدى قايتا جاڭعىرتۋ ماقساتىندا جاس ۇرپاققا ونەگە كورسەتىپ كەلەدى.
2024 جىلى اتىراۋ قالاسىندا وتكەن ۇلتتىق قۇرىلتايدا پرەزيدەنت ق.توقاەۆ كىتاپ وقيتىن ۇلتقا اينالىپ, تانىم كوكجيەگىن كەڭەيتۋ مادەنيەتىن قالىپتاستىرۋ ماڭىزدى ەكەنىنە توقتالدى. «كۇمىس ۆولونتەرلەر» كلۋبىنىڭ مۇشەلەرى دە «بەلسەندى ۇزاق ءومىر ءسۇرۋ» ورتالىقتارىندا بالانىڭ كىتاپقا دەگەن ماحابباتىن اشۋ ماقساتىندا «اجەمنىڭ ەرتەگىسى» ايدارىن جۇرگىزەدى. مەكتەپتەرگە دە ءجيى كەزدەسۋگە بارىپ, وقۋشىلاردىڭ كىتاپ وقۋعا دەگەن قۇلشىنىسىن ارتتىرادى. ونەر مەكتەبىمەن بايلانىس ورناتىپ, جاس بۋىننىڭ ۇعىم-تۇيسىگىنەن كومەسكى تارتا باستاعان كيىز باسۋ, الاشا توقۋ, قۇراق قۇراۋ, كەستە تىگۋ, قامشى ءورۋ سىندى ۇلتتىق قولونەر تۋىندىلارىن دا دارىپتەپ ءجۇر.
«كۇمىس ۆولونتەرلەر» 2024 جىلعى قىركۇيەكتە استانا قالاسىندا وتكەن دۇنيەجۇزىلىك كوشپەلىلەر ويىندارىندا ەرىكتىلەردىڭ قاتارىن تولىقتىرىپ, ەرەن ەڭبەك ءسىڭىردى. اسىرەسە شەت ءتىلىن جەتىك بىلەتىن اجەلەر سىرتتان كەلگەن تۋريستەرگە ۇلتتىق قۇندىلىقتارىمىز بەن سالت-ءداستۇرىمىزدى دارىپتەپ, ەلدىگىمىزدى تانىتتى.
ەلورداداعى «بەلسەندى ۇزاق ءومىر ءسۇرۋ ورتالىعىنا» قاراستى «كۇمىس ەرىكتىلەر» كلۋبىندا 100-دەن اسا زەينەتكەر بار, ولار 61-75 جاس ارالىعىنداعى قارت كىسىلەر. ەرىكتى اتا-اجەلەر استانا قالاسىندا وتەتىن قايىرىمدىلىق اكتسيالارى مەن ەكولوگيالىق سەنبىلىكتەرگە بەلسەنە قاتىسادى, شەبەرلىك ساباقتارىن وتكىزىپ, ۇرپاقتار ساباقتاستىعى اياسىندا قالا مەكتەپتەرىنىڭ وقۋشىلارىمەن, ستۋدەنت جاستارمەن بىرلەسە ءتۇرلى شارالاردى جۇزەگە اسىرادى. سونىمەن قاتار «ۇلتتىق ۆولونتەرلىك جەلى» زاڭدى تۇلعالار بىرلەستىگى, «استانا جاستارى» رەسۋرستىق ورتالىعىمەن مەموراندۋم جاساسىپ, بىرقاتار يگى ءىستى جۇزەگە اسىرىپ جاتىر. زەينەت جاسىنداعى ەرىكتىلەر قايىرىمدىلىق ءىس-شارالاردىڭ دا باسى-قاسىنان ءجيى تابىلادى. ماسەلەن, نۇرا اۋدانىنىڭ «كۇمىس ەرىكتىلەر» كلۋبىنىڭ مۇشەلەرى «شاراپات» قارتتار ۇيىندە كونتسەرتتەر, «جانسايا», «نۇرلى جۇرەك» الەۋمەتتىك قىزمەت كورسەتۋ ورتالىقتارىندا قايىرىمدىلىق اكتسيالارىن وتكىزدى. بوس ۋاقىتتارىندا كلۋب اجەلەرى مۇمكىندىكتەرى شەكتەۋلى بالالارعا ارناپ كيىم-كيشەكتەر توقىپ, ءتۇرلى كادەسىيلار تارتۋ ەتەدى.
«جىل بويى كۇمىس ەرىكتىلەردىڭ باستاماسىمەن بىرقاتار قايىرىمدىلىق ءارى الەۋمەتتىك اكتسيالار وتكىزىلدى. «جۇرەكتەن جۇرەككە» اكتسياسى اياسىندا كوممۋنالدىق قىزمەتكەرلەرگە ىستىق شاي مەن باۋىرساق تاراتىلدى. «تازا قازاقستان» ەكولوگيالىق اكتسياسى اياسىندا سەنبىلىكتەر ۇيىمداستىرىلىپ, اعاش وتىرعىزۋ, جاسىل ايماقتاردى كۇتىپ-باپتاۋ جۇمىستارى جۇرگىزىلدى. بالالاردى قورعاۋ كۇنى قارساڭىندا ورتالىق ارداگەرلەرى مەديتسينالىق مەكەمەلەردەگى شالا تۋعان نارەستەلەرگە ارنالعان قولمەن توقىلعان باس كيىم مەن ش ۇلىقتار دايىنداپ, قايىرىمدىلىق اكتسياسىن وتكىزدى. سونداي-اق ەرەكشە قاجەتتىلىگى بار بالالارعا ارنالعان الەۋمەتتىك ورتالىقتاردا كونتسەرتتەر, شەبەرلىك ساباقتارى مەن سپورتتىق تۋرنيرلەر ۇيىمداستىرىلدى. كۇمىس ەرىكتىلەردىڭ بەلسەندى ەڭبەگى قوعامدا ۇلكەن قۇرمەتكە يە. ولار وزدەرىنىڭ ومىرلىك تاجىريبەسىمەن ءبولىسىپ, جاستار مەن قوعام اراسىنداعى بايلانىستى نىعايتۋعا, الەۋمەتتىك قولداۋ مەن قايىرىمدىلىق مادەنيەتىن دامىتۋعا ماڭىزدى ۇلەس قوسىپ كەلەدى», دەيدى پەرسپەكتيۆتى دامۋ جانە الەۋمەتتىك جوبالار ءبولىمىنىڭ مامانى رايحان ۋدەرگەنوۆا.
بىلتىر دۇنيەجۇزىلىك ەرىكتىلەر كۇنىنە وراي «استانا جاستارى» مەن ۇلتتىق ۆولونتەرلىك ۇجىمدارىمەن بىرلەسىپ وتكىزگەن ءىس-شارالار قورىتىندىسىندا ورتالىقتىڭ بىرنەشە كۇمىس ۆولونتەرى, ناقتى ايتقاندا, 26 كۇمىس ەرىكتى زەينەتكەر «ۇرپاق ساباقتاستىعى», «مادەني-رۋحاني جانە سپورتتىق باعىت», «ساۋىقتىرۋ باعىتى», «قايىرىمدىلىق باعىتى», «ەكولوگيالىق باعىت» سىندى اتالىمداردا العىسحات الىپ, قۇرمەتكە بولەندى. قايىرىمدىلىق قاشاندا ىزگىلىكتىڭ جارشىسى ەكەنىن ىسىمەن ايگىلەيتىن زەينەتكەر «كۇمىس ەرىكتىلەر» جاس بۋىنعا ءاردايىم ۇلگى.
