ۇيىم ءسامميتىن وتكىزۋ تۋرالى قارار قابىلداندى

جۋىردا وسلودا اياقتالعان ەقىۇ پارلامەنتتىك اسسام­بلەيا­سىنىڭ جىل سايىنعى سەسسياسىندا 2010 جىلى ەقىۇ ءسامميتىن وتكىزۋ تۋرالى قارار قابىلداندى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى. قازاقستان پارلامەنتى دەلەگا­تسيا­سىنىڭ باستاماسىمەن سام­ميتتى شاقىرۋ قاجەتتىگى تۇر­عىسىنداعى قارارعا ەنگىزىلەتىن تۇزەتۋلەردى قىزۋ تالقىلاۋلاردىڭ ناتيجەلەرى بوي­ىنشا, سەناتور قۋانىش سۇلتا­نوۆ­تىڭ قاراردىڭ جەكە پاراگرافىن تومەندەگىدەي رەداكتسيادا جازۋعا قاتىستى ۇسىنىسى كوپ داۋىسپەن قولداۋعا يە بولدى: “پارلامەنتتىك اسسامبلەيا ۇيىم­عا قاتىسۋشى مەملەكەتتەردى 2010 جىلى ەقىۇ-نىڭ بارلىق ءۇش ولشەمى بويىنشا ەۋروپا مەن ەۋر­ازيادا قاۋىپسىزدىك پەن ىنتىماق­تاستىقتى نىعايتۋعا ناقتى ۇلەس قوسىپ, ءححى عاسىردا ەۋروپالىق جانە ەۋرازيالىق قاۋىپسىزدىك سالا­سىندا ۇيىمنىڭ ءرولىن ارتتىرۋعا مۇمكىندىك بەرەتىن ەقىۇ ءسامميتىن وتكىزۋگە شاقىرادى”. سونىمەن قاتار, اسسامبلەيا بيىل­عى مامىر ايىندا الماتىدا بولعان ترانسازيالىق پارلامەنتتىك فورۋم بارىسىندا ايتىلعان ۇسى­نىم­داردى ەسكەرە وتىرىپ, قىرعىز­ستانداعى جاعداي مەن اۋعانستان­دا­عى احۋالعا قاتىستى قارارلاردى قابىلدادى. پارلامەنتشىلەر ۇيىمدى بۇۇ, ەۋروپالىق وداق جانە ەۋروپا كە­ڭەسىمەن قىرعىزستاندا تۇراقتى­لىق­تى ورناتۋ جولىنداعى قادامدار بويىنشا تىعىز ىنتىماقتاستىقتى جالعاستىرۋعا شاقىردى. پلەنارلىق وتىرىستار مەن “يادرولىق قاۋىپسىزدىك”, “اۋعان­ستان­داعى زاڭسىز ەميگراتسيامەن, ەسىرتكى زاتتارىن ءوندىرۋ مەن ونىڭ اينا­لىمىمەن, تەرروريزممەن كۇرەس”, “ەقىۇ پارلامەنتتىك اسسامبلەيا­سى­نىڭ ءرولىن, تيىمدىلىگىن جانە ىق­پالدىلىعىن ارتتىرۋ” قارارلارىن تالقىلاۋلار بارىسىندا ق.سۇل­تا­نوۆ, ءا.جولشىبەكوۆ, ءا.احمەتوۆ, س.بىچكوۆا, ب.دوسمانبەتوۆ, ت.قوس­مام­بەتوۆ, ە.ءاپسالياموۆ ءسوز سويلەدى. نورۆەگيا مەن فينليانديا دەپۋ­تاتتارىنىڭ باستاماسى بويىنشا جەكە كەزدەسۋ وتكىزىلىپ, وندا ورتالىق ازياعا قاتىستى ماسەلەلەر تالقىلاندى. وعان قازاقستاننىڭ, قىرعىزستاننىڭ, تاجىكستاننىڭ, ءازىربايجاننىڭ, نيدەرلاندى مەن گەرمانيانىڭ پارلامەنتتىك دەلەگاتسيالارى قاتىستى.