كۇيەۋى راحىم جەڭىسقالي ەكەۋى ءبىر كەزدەسۋدەن-اق شاڭىراق كوتەرگەن. تانىستىقتارى دا قىزىق. قاراجال قالاسىنداعى زارينا اپكەسىن ۇزاتاتىن بولادى. سودان جىگىت جولداس بولىپ, راحىم كەلىپتى. كولىكتەرى بۇزىلىپ, ۇزاتۋعا ءۇش ساعات كەشىگىپتى. راحىم تويدىڭ ءبىرىنشى داستارقانىنان سوڭ, بۇزىلعان كولىگىن جوندەۋگە كىرىسەدى. كولىگىن جوندەپ بولىپ, قولىن جۋعا ۇيگە كىرگەنىندە زارينا «Fairy» الىپ, الدىنان شىعادى. سودان ۇزاتۋ اياقتالعان سوڭ, قۇدالار اۋىلىنا كەلىندەرىن الىپ قايتادى. سوڭىنان قۋعىنشىلار دا كوپ ۇزاماي جولعا شىعادى. ونىڭ ىشىندە قۇداشا زارينا دا بار. سويتسە, كولىك جوندەپ جۇرگەن جىگىت ونەرلى كورىنەدى. قولىنداعى دومبىراسىمەن ءان سالىپ, بەتاشار تويدىڭ كورىگىن قىزدىرادى. بي دە قىزا تۇسەدى. سەرى جىگىت راحىم سول ۋاقىتتا قۇداشاعا سەزىمىن ءبىلدىرىپ ۇلگەرىپتى. توي تارقاعان سوڭ, قۇدالار جولعا شىعايىن دەپ جاتقاندا كولىكتەرى بۇزىلىپ قالادى. ءسويتىپ, قونىپ قالادى. ەرتەڭىندە زارينا ۇيقىسىنان تۇرسا, راحىم كولىك جوندەپ جاتىپتى. التىنقولدى ازامات كولىكتى وتالدىرىپ, قۇدالاردى اۋىلدىڭ شىعا بەرىسىنە دەيىن اق جول تىلەپ, شىعارىپ سالادى. زاريناعا «اياعىڭدى كورپەگە وراپ ال» دەپ قامقورلىق تانىتقانى دا قۇداشانىڭ كوڭىلىنە شۋاق سىيلاپتى.
راحىمنىڭ جاناشىرلىعى, ونەرى, قولىنان ءىس كەلەتىنى زارينانىڭ جۇرەگىن بىردەن باۋرايدى. ءسويتىپ, زارينا ۇيىنە كەتكەن كۇنى راحىم دا ۆاحتالىق ادىسپەن جۇمىسقا جول تارتىپتى. ماحابباتتىڭ ىستىعىن سەزىنە باستاعان ەكەۋى تەلەفون ارقىلى 15 كۇن بويى جاقىنىراق تانىسىپتى. سودان سوڭ كەزدەسكەن كۇنى بىردەن ۇيلەنۋگە ۇسىنىس جاساپ, زارينا ونى قابىل الىپ, جارقىن بولاشاققا بىرگە قادام جاسايدى. ول كەزدە راحىم وتىزعا تاياپ قالعان جىگىت, زارينا 18 جاسقا دا تولماعان.
«جاس ايىرماشىلىعى, العاشقى كەزدەسۋ, قىپ-قىسقا تانىستىق تاڭداۋىما كەدەرگى بولمادى. ونىڭ بويىندا ناعىز ەر-جىگىتكە ءتان قاسيەتتى جاس بولسام دا بىردەن اڭعاردىم. جانە «الاقانىمدا ايالايمىن» دەگەن ۋادەسىن الدىم. باستىسى, ۋادەسىندە تۇرىپ كەلەدى», دەيدى جاس كەلىن.
زارينا ءابدۋحان – قاراجال قالاسىنداعى №5 مەكتەپتى التىن بەلگىگە بىتىرگەن. ال بىلتىر جازدا قاراعاندىداعى «Bolashaq» جوعارى كوللەدجىنىڭ مەكتەپكە دەيىنگى تاربيە ماماندىعى بويىنشا قىزىل ديپلومىن الىپتى. جاقىن كۇندەرى جۇمىسقا دا ورنالاسۋدى جوسپارلاپ وتىر.
جاس قىزدىڭ جۇرەگىن جاۋلاعان راحىم جەڭىسقالي ۇلى «شۇباركول كومىر» اق-دا الىپ تەحنيكا تىزگىندەيدى. 95 توننالىق «Komatsu» ماركالى جۇك كولىگىن جۇرگىزەدى. مۇنىمەن قوسا ونەرلى ورەن جۇمىسكەرلەر اراسىنان قۇرالعان «قارا التىن» توبىنىڭ بەلدى مۇشەسى. «كەل, شىرقايىق!» تەلەجوباسىنىڭ جەڭىمپازى بولىپ كەلگەن تالانتتى توپ قازىردىڭ وزىندە ەلگە تانىلىپ قالدى.
جاس كەلىن اتا-ەنەسىنىڭ اق باتاسىن الىپ وتىر. اتاسى جەڭىسقالي الەۋمەتتىك جەلىنى جۇرگىزۋگە ۇنەمى قولداۋ كورسەتەدى. شىن مانىسىندە, اتاسىنىڭ مەيىرىمى, نەمەرەلەرىنە دەگەن ماحاببات, قامقورلىعى, كەلىنىنە دەگەن سىيلاستىق, قۇرمەتىن بايقاتپاي تەلەفونعا ءتۇسىرىپ العان زارينا سول قالپىندا جەلىگە جۇكتەيدى. توسىننان تۇسىرگەن ۆيدەولارى ميلليونداعان قارالىم جيناپ, كوپشىلىك ءتانتى بولىپ جاتىر. اسىرەسە ءۇيدىڭ شارۋاسىنا كومەكتەسىپ, مانتى ءتۇيىپ جاتقان جارقىن ءساتى, نەمەرەلەرىن ويناتىپ جۇرگەن ۆيدەولارى ءتىپتى, اسەرلى.
ونەگەلى وتباسىنىڭ كوزىنىڭ اعى مەن قاراسىنداي ءماريام جانە ايجۇلدىز ەسىمدى بوتاقاندارى بار. كىشكەنتاي قىزدارىنىڭ ەركە قىلىقتارى ءۇيدىڭ باقىتىن ەسەلەپ وتىر.
اناسىنداي اياۋلى بولعان ەنەسى راحات – ارداقتى ۇستاز. كامەرادان قىسىلاتىن كورىنەدى. دەگەنمەن الداعى ۋاقىتتا ەنە مەن كەلىن اراسىنداعى سىيلاستىق ءمانىن ۇعىندىراتىن كونتەنت ءتۇسىرۋدى ويلاستىرىپ وتىر.
اۋىلىنىڭ پىسىق كەلىنى كاسىپپەن دە اينالىسادى. بىلتىر جاڭاارقا اۋدانى اكىمىنىڭ گرانت يەگەرى اتاندى. قۇيىلمالى بالمۇزداق, ءتاتتى ماقتا سەكىلدى بالالار ءسۇيىپ جەيتىن دامدىلەر ازىرلەيدى. جاقىن كۇندەرى ء«تاپ-ءتاتتى» دۇكەنىن اشقالى وتىر.
اۋىلدان ات-تونىن الا قاشاتىن جاس كەلىندەرگە زارينانىڭ شۋاقتى ءومىرى ونەگە بولارى ءسوزسىز.
ۇلىتاۋ وبلىسى,
جاڭاارقا اۋدانى,
قارااعاش اۋىلى
