اقتوبەدە جەمقورلىققا قارسى بايقاۋ قورىتىندىلاندى

اقتوبە. 26 اقپان. اقتوبە قالالىق كوركەمسۋرەت ليتسەيىندە جاس سۋرەتشىلەر اراسىندا ۇيىمداستىرىلعان «جەمقورلىق – ىندەت, كۇرەسۋ – مىندەت» بايقاۋىنىڭ جەڭىمپازدارىن ماراپاتتاۋ ءراسىمى ءوتتى. بۇل تۋرالى egemen.kz ءتىلشىسى حابارلادى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ ۇيتقى بولۋىمەن وتكىزىلگەن شارانىڭ ماقساتى – وسكەلەڭ ۇرپاقتىڭ سىبايلاس جەمقورلىققا قارسى كوزقاراسىن جانە قۇقىقتىق مادەنيەتىن قالىپتاستىرۋ بولىپ تابىلادى. بايقاۋعا قالا وقۋشىلارى اتىنان 50-دەن استام جۇمىس تۇسكەن. ۇيىمداستىرۋشىلار سولاردىڭ ىشىنەن تاقىرىپقا ساي جانە ەرەكشە كوركەم جاسالعان دۇنيەلەرگە تاڭداۋ جاساعان. بايقاۋدىڭ باس جۇلدەسىن ەۆانگەلينا تەرەششەنكو جەڭىپ الدى. ءبىرىنشى ورىنعا سياحان اشىقوۆا لايىق دەپ تانىلدى. ال ودان كەيىنگى جۇلدەلى ورىنداردى دانيار كاۋكەەۆ, ءجاميلا ساتىباەۆا, اقجاينا قارجاۋباەۆا, نۇرتىلەك ەلەۋسىنوۆتەر ءوزارا ءبولىستى. سونداي-اق, وزىندىك سۋرەت سالۋ ەرەكشەلىگىمەن كوزگە تۇسكەن مەرەي تۇراباەۆا, عالىمجان سامەت, تاڭسۋ ورداباەۆا, كامشات جۇماباەۆا ارنايى اتالىمدار بويىنشا ماراپاتتالدى. ساتبالدى ءساۋىرباي. دەرەك: egemen.kz. سۋرەت: bolashak.kz.