باتىس قازاقستاندا ەكى ادام قۇلدىقتا ۇستالعان

ورال. 26 اقپان. ورال قالاسىنان 600 شاقىرىم قاشىقتىقتاعى بوكەي ورداسى اۋدانىندا قۇلدىقتا ۇستالعان اكەلى-بالالى ادامدار انىقتالدى. بۇل تۋرالى ەgemen.kz ءتىلشىسى حابارلادى. مۇندا ەكى ادام زاڭسىز ۇستالىپ, ولاردىڭ قارا جۇمىسقا ەرىكسىز جەگۋ دەرەكتەرى ورىن العان. ياعني, اتالعان ەكەۋ زاڭسىز تۇردە باس بوستاندىقتارىنان ايرىلعان. بۇل جايت رەسپۋبليكامىزدىڭ قىلمىستىق كودەكسى بويىنشا قاۋىپتى قىلمىستار قاتارىنا كىرەدى. باتىس قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى تاراتقان مالىمدەمەگە قاراعاندا, تەپسە تەمىر ۇزەردەي اعايىندى ەكى جىگىت 64 جاستاعى اقساقال مەن ونىڭ 30 جاستاعى ۇلىن جەر اياعى قيانداعى ادام اياعى باسا بەرمەيتىن قىستاققا الىپ كەتكەن. سودان كەيىن ولار اكەلى-بالالى بەيكۇنا جانداردى ءوز شارۋاشىلىقتارىندا قارا جۇمىستار جاساۋعا ماجبۇرلەگەن. جابىرلەنۋشىلەردىڭ سوزىنە قاراعاندا, قىستاق ماڭ دالادا, كوزدەن تاسا جەردە قونىس تەپكەن ەكەن. قۇلدىقتا ۇستالعاندار ۇدايى باقىلاۋدا بولعان. مەنشىك يەلەرى ەكەۋىن كوزدەرىنەن ەش تاسا قىلماعان.سوندىقتان دا ولاردىڭ قاشىپ كەتۋىلەرىنە ەشقانداي مۇمكىندىك بولماعان. قۇلدىقتا ۇستالعانداردىڭ باقىتىنا وراي پوليتسيا قىزمەتكەرلەرى بۇل جايتتى اقپان ايىندا انىقتادى. وسى وقيعاعا بايلانىستى قىلمىستىق ءىس قوزعالدى. قازىر جابىرلەنۋشىلەرگە قاتىستى سوت-مەديتسينالىق ساراپتاما تاعايىندالدى.تەرگەۋ امالدارى ءجۇرىپ جاتىر. تەمىر قۇسايىن. دەرەك: ەgemen.kz. سۋرەت: kazakhstanzaman.kz.