بۇل جاۋىنگەر ارۋ سۇيەگىن وڭتۇستىك قازاقستانداعى ارحەولوگيالىق ەكسپەديتسيا مۇشەلەرى تاپتى
وڭتۇستىك قازاقستان وبلىسىنان العاش رەت جاۋىنگەر-ايەلدىڭ سۇيەگىن تاپتى. ولاردىڭ ايتۋلارىنشا, مۇردە قارۋعا تولى. وسىعان قاراپ تابىلعان ايەلدىڭ جاۋىنگەر بولعانى پايىمدالىپ وتىر. سونداي-اق, قازبا ماماندارى سۇيەكتىڭ ءبىزدىڭ داۋىرىمىزگە دەيىنگى II-IV عاسىرلارعا تيەسىلى – دەپ بولجام جاسادى. ارحەولوگتار: «بۇل – از زەرتتەلگەن قاڭلى مەملەكەتىنىڭ وكىلى. قازاقستان تاريحى تۋرالى بىردە-ءبىر وقۋلىقتا وندا جاۋىنگەر ايەل بولدى دەگەن دەرەك جوق», – دەدى. قازىرگى تاڭدا ولار ءمۇردەنىڭ ءار سانتيمەترىن انىقتاپ ولشەپ, ەلەپ-ەكشەۋدە. ءبىر سوزبەن ايتقاندا, جاۋىنگەر-ايەل تولىق زەرتتەلۋدە. ءازىرگە ماماندار سۇيەكتىڭ جاس شاماسىن 2 300 جىلعا تەڭەپ وتىر. تابىلعان ايەلدىڭ وڭ قولىندا تەمىر جەبەنىڭ ەكى ءتۇرى, م-ۇلگىسىندەگى ساداق ەلەمەنتى, قانجار جانە كىشكەنە پىشاق, ال سول جاعىندا ءۇلكەن قىلىش, سۇيەكتەردەن جاسالعان كوپتەگەن بۇيىمدار بار. كەيبىر زاتتاردى ماماندار ءالى دە انىقتاۋ ۇستىندە. ارحەولوگتار ايەل سۇيەگىن قازاقستاننىڭ ورتالىق مەملەكەتتىك مۇراجايىنا اپارماق. وعان جانە باسقا دا جادىگەرلەرگە ارنايى ساراپتاما جاسالادى. ايتا كەتەيىك, وسى كۇلتوبە قالاشىعىندا ەكى مىڭ جىل بۇرىن ۇلكەن قالا بولعان. ارنايى ەكسپەديتسيا 23 جىلدان بەرى بۇل جەردەن وتكەن ءداۋىردىڭ جادىگەرلەرىن تاۋىپ كەلەدى. قازىر ماماندار تاعى ءبىر قورعاندى قازىپ جاتىر. عالىمدار بۇل جەردە ءالى تالاي قىزىقتى دۇنيەلەر تاباتىنىنا سەنىمدى.
تالعات رايىمبەك.
