بۇرناعى كۇنى استانادا حوككەيدەن قازاقستان پرەزيدەنتىنىڭ كۋبوگى ءۇشىن وتكەن VI حالىقارالىق تۋرنير مارەسىنە جەتتى. فينالدا ۆلاديۆوستوكتىڭ «ادميرالىن» 3:2 ەسەبىمەن جەڭگەن استانانىڭ «بارىسى» جارىس جەڭىمپازى اتاندى. سايىس جاڭادان اشىلعان مۇز سارايىندا ۇيىمداستىرىلدى.
فينالدىق باسەكە تەڭ جاعدايدا ءوربىدى. العاشقى كەزەڭدە بىرنەشە تاماشا مۇمكىندىكتەر بولعانىمەن, ەسەپ اشىلعان جوق. ال كەزدەسۋدىڭ ەكىنشى جارتىسىندا جانكۇيەرلەر ءتورت بىردەي شايبانىڭ كۋاسى بولدى. الدىمەن ايدىن يەلەرى ەسەپ اشتى. بۇل كەزدەسۋدىڭ 21-مينۋتى بولاتىن. ارادا 4 مينۋت ۋاقىت وتكەندە, قوناقتار تارازى باسىن تەڭەستىردى.
ەكىنشى ۇزىلىسكە دەيىن قارسىلاستار تاعى دا ءبىر-بىردەن شايبا ەنگىزدى. ءۇشىنشى كەزەڭدە تابلوداعى ەسەپ وزگەرگەن جوق. ال وۆەر-تايمدا «بارىستىڭ» جولى بولدى. 63-مينۋتتا رومان ستارچەنكو جەڭىس شايباسىن سوعىپ, كومانداسىنا پرەزيدەنت كۋبوگىن الىپ بەردى. ماراپاتتاۋ راسىمىنە پرەمەر-مينيستر كارىم ءماسىموۆ, مادەنيەت جانە سپورت ءمينيسترى ارىستانبەك مۇحامەدي ۇلى, «نۇر وتان» پارتياسىنىڭ حاتشىسى قۇمار اقساقالوۆ جانە قازاقستان حوككەي فەدەراتسياسىنىڭ پرەزيدەنتى اسقار مامين قاتىستى. ايتا كەتەيىك, تۋرنيردە ءتورت كوماندا سىنعا ءتۇستى. «بارىس» العاشقى ويىندا نوۆوكۋزنەتسكىنىڭ «مەتاللۋرگىن» 4:2 ەسەبىمەن جەڭسە, ەكىنشى كەزدەسۋىندە حانتى-مانسيسك قالاسىنان كەلگەن «يۋگرا» كومانداسىنا 1:2 ەسەبىمەن ەسە جىبەردى. ال ءۇشىنشى ويىندا «ادميرالدان» 2:1 ەسەبىمەن باسىم ءتۇسىپ, جارىستىڭ فينالىنا جولداما الدى. اتالعان سايىستا جۇلدەلى ءۇشىنشى ورىن «يۋگراعا» بۇيىردى. قولا مەدال ءۇشىن بولعان ويىندا ول «مەتاللۋرگتى» 1:0 ەسەبىمەن جەڭدى.
ەلامان قوڭىر, «ەگەمەن قازاقستان».
