باستى باعدار – ءونىم ساپاسى

ەلىمىزدىڭ دۇنيەجۇزىلىك ­ساۋدا ۇيىمىنا كىرۋ جونىندەگى كەلىسىمدەرىنىڭ ءساتتى اياقتالۋى ءبىزدى جاڭا بەلەستەرگە تالپىندىرا ءتۇستى. مۇنداي قادامعا ەلىمىز جايدان-جاي بارا قالعان جوق. نارىق كوكجيەگىن كەڭەيتۋ ءۇشىن ەلىمىز الدىمەن كەدەندىك وداققا مۇشە بولدى, ەۋرازيالىق ەكونوميكالىق وداققا ەندى. دسۇ-عا مۇشە بولۋعا 19 جىل دايىندىقپەن كەلىپ وتىرعانى­نان دا بۇل ماسەلەگە ەلباسى­نىڭ قانشالىقتى ءمان بەرگەنىن اڭعارۋ قيىن ەمەس. ارينە, قانداي دا جاڭا باستامانىڭ وزىندىك قيىندىقتارى بولارى ءسوزسىز. مەملەكەت باسشىسى بۇل جولدا دا قيىندىقتار بولاتىنىن الدىن الا ەسكەرتتى. دەگەنمەن, وسى جىلداردا بۇل باعىتتا مول تاجىريبە جينالدى. سىرتقى جانە ىشكى نارىقتا ونىمدەر مەن تاۋ­ارلار وتكىزۋدىڭ وزىندىك ءۇردىسى قالىپتاستى. سونىڭ وزىندە دە ءدۇ­نيە­جۇ­زىلىك ساۋدا ۇيىمىنىڭ العا ­تارتار سىندارى بار ەكەنىن جوق­­قا شىعارۋ­عا بولمايدى. مۇندا باسەكەلەستىك العا شىعادى. شەتەلدەن ارزان دا ساپالى ­تاۋارلار مەن ونىمدەر اعىلادى. ءبىز سوعان دايىن بولۋى­مىز ­كەرەك. مۇنداي جاعدايدا ساپا مەن باعانىڭ ارزاندىعى شەشۋشى تۇتقا بولادى. ءبىز ەگەمەندىك العاننان بەرگى كەزەڭدە وتاندىق ونىمدەردىڭ باسەكەگە قابىلەتتىلىگىن ارتىرۋ­دا ءبىراز ناتيجەگە قول جەتكىز­دىك دەسەك تە, بۇل باعىتتاعى ىزدەنىستەر ىلگەرىلەي بەرۋى ءتيىس. بۇل – دسۇ-نىڭ دا, ۋاقىتتىڭ دا تالابى. ءبىر ورىندا تۇرىپ قالساڭ, ورنىڭدى وزگەلەر ەنشىلەپ كەتۋى ابدەن مۇمكىن. سوندىقتان وتاندىق كاسىپ­كەرلەردىڭ باستى باعدارى ەرتەڭ­گى كۇنمەن ءومىر سۇرۋگە داعدى­لانۋ دەر ەدىم. باسەكەگە قابى­لەتتى ءونىم شىعارۋ ءبىزدى بۇ­رىن­عىدان دا شيراتا ءتۇسۋى كەرەك. باسە­كەلەستىك كاسىپكەرلەردىڭ ەكىنشى تىنىسىن اشىپ, ءىس-قيمىلىنا سەرپىن بەرەدى دەپ ويلايمىن. ارينە, ماعان ءبىزدىڭ وڭىرگە توسىنداۋ كاسىپپەن ايالىسۋ وڭايعا تۇسكەن جوق. باستاپ­قى­دا جۇرەكسىنگەنىم دە راس. ساڭى­راۋقۇلاق وسىرۋمەن اينالىسۋعا اپام اقمارال اقىل-كەڭەس بەردى. بۇل باستامامدى جولداسىم اماندىق تا قولدادى. 2014 جىلى كاسىپكەرلىك نەگىزدەرىنە وقىپ, قولىما سەرتيفيكات تيىسىمەن شارۋانى جۇرگىزۋگە كىرىستىم. وتكەن جىلى ساڭىراۋقۇلاق ءوسىرۋ جانە وتكىزۋگە «جۇمىسپەن قامتۋدىڭ جول كارتاسى-2020» مەملەكەت­تىك باعدارلاماسى­نىڭ ەكىنشى باعىتى اياسىندا 1,5 ميلليون تەڭگە نەسيەگە قول جەتكىزدىم. العان قاراجاتقا جالپى الاڭى 30 شارشى مەتر شاعىن جىلىجاي سالىپ, 100 كەلى ميتسەلي, قوسىمشا تىڭايتقىشتار جانە باسقا قاجەتتى زاتتاردى ساتىپ الدىم. جۇبايىم اماندىق قاجەتتى قۇرال-جابدىقتاردى ورناتۋعا قولعابىس بەردى. ۇستىمىزدەگى جىلى ساڭى­راۋ­قۇلاقتان ەكى رەت ءونىم الدىم. ولاردى اقتوبە قالا­سىن­داعى مەيرامحانالار مەن ءدام­حانالارعا, قوعامدىق تاماق­تاندىرۋ ورىندارىنا وتكىزدىم. بولاشاقتا دۇكەندەر مەن بازارلارعا دا شىعارۋدى كوزدەۋدەمىن. الداعى ۋاقىتتا ساڭىراۋقۇلاقتى تۇزداپ, مارينادتاپ, وڭدەپ, قالبىرعا سالىپ ساۋداعا شىعارۋدى ويلاستىرۋدامىن. ءتۇرلى سالاتتار جاسايتىن, ساڭىراۋقۇلاق قوسىلعان ءمانتى, ءتۇشپارا, پاشتەت شىعاراتىن تسەح اشۋ دا ويىمدا بار. ساڭىراۋقۇلاق تۇقىمىن زەرتتەيتىن زەرتحانا سالسام با دەپ ءجۇرمىن. وسىنىڭ ءبارى سايىپ كەلگەندە قايتكەندە دە ساپالى ءونىم ءوندىرۋ قاجەتتىگىنەن تۋىپ وتىرعانى شىندىق. ارينە, ىلگەرى باسۋعا ءىز سالدىق. الايدا, ەلباسى ايتقانداي دسۇ-عا مۇشە بولۋدىڭ ءوزىن­دىك جاۋاپكەرشىلىكتەرى مەن قاۋىپ-قاتەرلەرى دە بار. ءبىز باسە­كەگە دايىن بولۋىمىز كەرەك, كاسىپ­كەرلىگىمىزدى ساراپتاپ, جاڭا­شا جۇمىس ىستەۋگە تالاپتانۋىمىز قاجەت. سوندا عانا ەلىمىزدىڭ ساۋ­دا-ساتتىعىنىڭ 90 پايىزىن قام­تاماسىز ەتەتىن دسۇ-عا مۇشە ەلدەر­دىڭ ورتاسىنان ويىپ تۇرىپ ورنىمىزدى الارىمىزعا سەنىم مول. مايرا بيماشەۆا, كاسىپكەر. اقتوبە وبلىسى, قوبدا اۋدانى.