«ەلىمىزدىڭ باستى كاپيتالى – ءبىلىمدى جاستار» دەگەن بولاتىن ەلباسى. ءبىلىم مەن عىلىمنىڭ ارقاسىندا ادامزات بالاسى وركەندەپ-ءوسىپ, العا قاراي جىلجىپ كەلەدى. سول بويىنشا وركەنيەت دامىپ, ۋاقىت وتە زامانعا ساي جاڭاشىلدىق بوي كوتەرۋدە. بۇل رەتتە ەلدى دامىتۋ بارىسىندا پرەزيدەنت ن.نازارباەۆتىڭ ۇستانعان سارا ساياساتى زور سەرپىن بەرەتىنى تاعى بار. ايتار بولساق, جاقىندا عانا 5 ينستيتۋتتىق رەفورمانى جۇزەگە اسىرۋعا باعىتتالعان «100 ناقتى قادامدى» ايقىنداپ بەرگەن مەملەكەت باسشىسىنىڭ تاپسىرماسى بويىنشا ەندىگى كەزەكتە بەلسەنە ىسكە كىرىسۋ قاجەت.
وسىلاي, ءداستۇرلى وتىرىستىڭ كەلەسى كەزەگى ءبىلىم وشاقتارىنداعى قولعا الىنىپ وتىرعان ءتۇرلى شارالار مەن ءمىندەتتەر جونىندە تالقىلاۋعا كەلدى. باق وكىلدەرىمەن ل.ن. گۋميلەۆ اتىنداعى ەۇۋ عىلىمي-تەكسەرىس جۇمىسى بويىنشا رەكتورىنىڭ ورىنباسارى ابزال تالتەنوۆ پەن ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پرەزيدەنتى ءۋاليحان ابدىبەكوۆ پرەزيدەنت جانىنداعى ورتالىق كوممۋنيكاتسيالار قىزمەتىندە ءباسپاسوز ءماسليحاتىن وتكىزدى. وندا كادرلاردى دايارلاۋ ماسەلەسى كەڭىنەن تالقىلانىپ, بىرقاتار اقپاراتتار تانىستىرىلدى. ەلباسىنىڭ تاپسىرماسىنا وراي, بۇگىنگى تاڭدا جوعارى وقۋ ورىندارىندا بىرقاتار باعدارلامالار جاڭارتىلىپ, ولار وزگەردى, دەيدى بۇل رەتتە ۋ.ابدىبەكوۆ. سونىمەن قاتار, ول قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى جوعارى ءبىلىم بەرۋ سالاسىندا مەملەكەت باسشىسىنىڭ رەفورمالارىن ىسكە اسىرۋعا بەلسەندى قاتىساتىندىعىن جەتكىزدى. وسى ورايدا 78-قادامدا بەلگىلەنگەن «نازارباەۆ ۋنيۆەرسيتەتىنىڭ ءتاجىريبەسى نەگىزىندە جوعارى وقۋ ورىندارىنىڭ اكادەميالىق جانە باسقارۋشىلىق دەربەستىگىن دەڭگەي بويىنشا كەڭەيتۋ. جەكە جوو حالىقارالىق ءىس-تاجىريبەگە سايكەس كوممەرتسيالىق ەمەس ۇيىمدارعا اۋىستىرۋ» بويىنشا حقتۋ-دە 10 مۇشەدەن تۇراتىن ۇكىمەتارالىق وكىلەتتى كەڭەس قۇرىلعاندىعىن حابارلادى. ونىڭ ايتۋى بويىنشا, اكادەميالىق دەربەستىگىن كەڭەيتۋ بارىسىندا ۇستىمىزدەگى جىلى ءساۋىر ايىندا فاكۋلتەتتەردىڭ بارلىق دەكاندارى تۇركيانىڭ جەتەكشى جوو-سەرىكتەستەرىمەن ىنتىماقتاستىق كەلىسىمشارتىنا وتىرۋ ءۇشىن شەتەلگە قىزمەتتىك ىسساپارعا جىبەرىلگەن. جانە ولار انگليانىڭ جەتەكشى جوو-دا ەكى اپتالىق بىلىكتىلىگىن كوتەرۋ كۋرسىنان وتكەن. سونداي-اق, 79-قادامداعى ءبىلىم بەرۋ جۇيەسىندە – جوعارى سىنىپتار مەن جوو-لاردا اعىلشىن تىلىندە وقىتۋعا كەزەڭ-كەزەڭمەن كوشۋ ماسەلەسىنە وراي, اتالعان ۋنيۆەرسيتەت جىل سايىن ۇبت, كت قورىتىندىسى بويىنشا جوعارى بالل جيناعان, الايدا Foundation دايىندىق كۋرستارىن وقۋ ءۇشىن مەملەكەتتەن گرانت الماعان 500 ابيتۋريەنتتى قابىلدايتىندىعىن اتاپ ءوتتى. كەلەسى كەزەكتە ءسوز العان ابزال تالتەنوۆتىڭ ايتۋىنشا, ل.ن.گۋميلەۆ اتىنداعى ەۇۋ ەكى ماماندىق بويىنشا كادرلار دايارلايدى. ونىڭ ءبىرى «قۇرىلىس ماتەريالدارىن, ونىمدەرىن جانە قۇرىلعىلارىن شىعارۋ» بويىنشا بولسا, ەكىنشىسى «عارىشتىق تەحنيكا جانە تەحنولوگيا» ماماندىعى ەكەن. سونداي-اق, ول ماگيستراتۋرانىڭ ءبىرىنشى ماماندىعىنداعى وقۋ باعدارلاماسى بويىنشا ۋنيۆەرسيتەت پەن ەكونوميكانىڭ شىنايى سەكتورلارى ءوندىرىس جانە كاسىپورىندار اراسىندا تىعىز قارىم-قاتىناس ورناتىلعاندىعىن تىلگە تيەك ەتتى. شەتەلدىك جوو-سەرىكتەس رەتىندە ماگيستراتۋرانىڭ ەكىنشى باعدارلاماسىمەن بەرلين تەحنيكالىق ۋنيۆەرسيتەتى (گەرمانيا) انىقتالعان بولسا, ال باعدارلامانى ىسكە اسىرۋدا نەگىزگى كاسىپكەر-سەرىكتەس «قازاقستان عارىش ساپارى» ۇك» اق, «سارىشاعان» شاعىن راكەتالى-عارىشتىق پوليگونى, «بايقوڭىر» عارىش الاڭى جانە «پەتروپاۆل اۋىر ماشينا وڭدەۋ زاۋىتى» اق بولىپ تابىلاتىندىعى اتالىپ ءوتىلدى. بۇل رەتتە ەسكەرەر ءجايت, ءتۇلەكتەردى ءارى قاراي جۇمىسقا ورنالاستىرۋعا وسى كاسىپورىندارمەن كەلىسىمشارت جاسالعان.
ەلميرا ماتىباەۆا, «ەگەمەن قازاقستان».
