كالاچي تۇرعىندارى جايلى جەرگە قونىس اۋداردى

ۇيقى اۋرۋىنا شالدىققان كالاچي اۋىلىنىڭ تۇرعىندارىن, ۇكىمەت تاراپىنان قابىلدانعان شەشىمگە سايكەس, اقمولا وبلى­سى­نىڭ وزگە ەلدى مەكەندەرىنە قو­نىستاندىرۋ جالعاسىپ جاتىر. ولارعا جەرگىلىكتى جەرلەردە ەڭبەك جانە الەۋمەتتىك-تۇرمىستىق جاعدايلار قاراستىرىلعان. ايتكەنمەن, كوپتەگەن ادامدار كىندىك قانى تامىپ, باۋىر باسقان تۋعان وڭىرىنەن جىراقتاعىسى كەلمەيتىنىن وتىنگەن ەدى. رەس­پۋبليكا, وبلىس باسشىلىعى بۇعان تۇسىنىستىكپەن قاراۋمەن قاتار, ناقتى ءىس-قيمىل شاراسىن جۇزەگە اسىرۋدا. كەشە اقمولا وبلىسىنىڭ اكىمى سەرگەي كۋلاگين اۋدان ورتالىعى ەسىل قالاسىندا بولىپ, كالاچي تۇرعىندارى ءۇشىن سالىنىپ جاتقان كوپ قاباتتى ەكى ءۇيدىڭ قۇرىلىس جۇ­مىستارىنىڭ بارىسىمەن تا­نىس­تى. جاڭا شاعىن اۋدانداعى 45 پاتەرلىك ءۇي قۇرىلىس نىسانىنىڭ جالپى قۇنى 263,7 ميلليون تەڭگەنى قۇرايدى. مەردىگەر ۇيىم بۇگىنگى كۇنى قارجىنىڭ 142 ميلليون تەڭگەسىن يگەرىپ وتىر. قازىر بەس قاباتتى ءۇيدىڭ ءتورتىنشى قاباتىنىڭ كىرپىشتەرى قالانۋدا. وسىنداعى 75 قۇرىلىسشى كىلت تاپسىرۋ سالتاناتىن الداعى قازان ايىنان كەشىكتىرمەۋگە سەنىمدى. ال, تاعى ءبىر قۇرىلىس الاڭى №9 تۇرعىن ءۇي قۇرىلىسى قار­قىندى كۇشەيتۋدى تالاپ ەتەدى. 75 پاتەرلى بۇل كوپ قاباتتى ۇيگە بيۋدجەتتەن 399,4 ميلليون تەڭگە قارجى بولىنسە, ونىڭ يگەرىلۋى 30 پايىزدى عانا قۇراپ وتىر. الايدا, ماڭىزدى ىسكە جۇمىلدىرىلعان 100 ادام بۇل نىساننىڭ كەستەگە ساي پايدالانۋعا بەرىلۋىن قامتاماسىز ەتەمىز دەپ سەندىردى. باقبەرگەن امالبەك, «ەگەمەن قازاقستان». اقمولا وبلىسى, ەسىل اۋدانى.