«Almaty Arena» مۇز سارايىندا ۇيىمداستىرىلعان «دومبىرا ءۇنى» اتتى شارا بىرنەشە ايلىق دايىندىقتىڭ ناتيجەسى بولدى. جوبا اياسىندا 200-دەن استام مەكتەپ پەن قوسىمشا ءبىلىم بەرۋ ۇيىمدارىندا بىرىككەن دومبىرا انسامبلدەرى قۇرىلىپ, شامامەن 1000 پەداگوگ وقۋشىلاردى ورتاق قويىلىمعا دايىندادى. فلەشموبقا 7-10 سىنىپ وقۋشىلارى قاتىستى.
ءىس-شارا بارىسىندا تەك ءبىر كۇي عانا ەمەس, ارنايى ازىرلەنگەن مۋزىكالىق پوپۋرري ورىندالدى. باعدارلاماعا تولەگەن مۇحامەدجانوۆ پەن التىنبەك قورازباەۆتىڭ شىعارمالارى, نۇرعيسا تىلەنديەۆتىڭ كۇيلەرى, سونداي-اق قۇرمانعازىنىڭ «بالبىراۋىن» كۇيى زاماناۋي وڭدەۋدە ەنگىزىلدى. قويىلىم مازمۇنى زاماناۋي تەحنولوگيالارمەن تولىقتىرىلىپ, جاساندى ينتەللەكت نەگىزىندە ارنايى بەينەمازمۇن ازىرلەندى.
قازاقستان رەكوردتار كىتابىنىڭ ساراپشىلارى فلەشموب ناتيجەسىن رەسمي تۇردە تىركەپ, قاتىسۋشىلار سانى, ورىنداۋ ۇيلەسىمى مەن ۇزاقتىعىن تەكسەردى. ناتيجەسىندە بۇل كورسەتكىش «جاپپاي جەتىستىكتەر» ساناتى بويىنشا جاڭا ۇلتتىق رەكورد رەتىندە تانىلدى.
بۇل باستاما ۇلتتىق ونەردى دارىپتەپ قانا قويماي, جاس بۋىننىڭ مادەني قۇندىلىقتارعا دەگەن قىزىعۋشىلىعىن ارتتىرعان تاعىلىمدى جوباعا اينالدى.
