اگەنتتىك 16 ناۋرىزدا 2025 جىلى جۇرگىزىلگەن سىبايلاس جەمقورلىق تاۋەكەلدەرىنە سىرتقى تالداۋ قورىتىندىسىن جاريالادى. تەكسەرۋ ناتيجەسى وڭىرلەردەگى جول قۇرىلىسىنا قاتىستى جۇيەلى ماسەلەلەردى كورسەتتى. اتاپ ايتقاندا, بىرقاتار جوبادا سمەتالىق قۇن 11 ملرد تەڭگەگە نەگىزسىز ۇلعايتىلعان.
سونىمەن قاتار 362 ەسكىرگەن جوبالىق-سمەتالىق قۇجات انىقتالىپ, ولاردى ازىرلەۋگە 23 ملرد تەڭگە ءتيىمسىز جۇمسالعان. تاعى ءبىر الاڭداتارلىق جايت – جالپى قۇنى 27 ملرد تەڭگە بولاتىن 324 نىسان مىندەتتى مەملەكەتتىك ساراپتامادان وتپەگەن.
ەلىمىزدە اسفالتبەتون قوسپالارىنا قويىلاتىن تالاپتار جاڭارتىلادى
بۇدان بولەك, 70 كومپانيا جۇمىس تاجىريبەسىنە قاتىستى جالعان انىقتاما ۇسىنىپ, جالپى سوماسى 408 ملرد تەڭگەنىڭ كەلىسىمشارتتارىنا قول جەتكىزگەنى بەلگىلى بولدى. بۇل دەرەكتەر سالاداعى باقىلاۋ تەتىكتەرىنىڭ السىزدىگىن اڭعارتادى.
اگەنتتىك وكىلدەرى زاڭ بۇزعان مەردىگەرلەردىڭ قالاي جازالانعانىن جانە بيۋدجەت قاراجاتىنىڭ قايتارىلعان-قايتارىلماعانىن ناقتىلامادى. دەگەنمەن جوسپارلاۋ, قۇرىلىس جانە تەحنيكالىق قاداعالاۋ باعىتىنداعى ولقىلىقتاردى جويۋ ءۇشىن 80-نەن اسا ۇسىنىس ازىرلەنگەن.
قازىرگى تاڭدا جول ساپاسىنا قاتىستى تالاپ كۇشەيتىلگەن. ۇلتتىق جول اكتيۆتەرى ساپاسى ورتالىعى ەسكەرتۋ جاساعان نىساندار كەمشىلىك جويىلمايىنشا پايدالانۋعا بەرىلمەيدى. بۇعان قوسا جول-قۇرىلىس ماتەريالدارىنىڭ بىرىڭعاي اقپاراتتىق بازاسى جاساقتالماق. بۇل جۇيەدە كارەر سيپاتتاماسىنان باستاپ زەرتحانالىق سىناق ناتيجەسىنە دەيىنگى دەرەك جيناقتالادى.
«پلاتفورما اقپاراتتى ءبىر ورتالىققا توپتاستىرىپ, ءونىم ساپاسى تۋرالى مالىمەتتى بۇرمالاۋ قاۋپىن ازايتادى. قابىلدانعان شارالار 2026 جىلعا بولىنگەن 360 ملرد تەڭگەدەن استام قاراجاتتىڭ اشىق ءارى ءتيىمدى جۇمسالۋىنا نەگىز بولادى», دەدى اگەنتتىك وكىلدەرى.
