مەملەكەت باسشىسى قاسىم-جومارت توقاەۆ وتباسى ينستيتۋتىنىڭ ستراتەگيالىق مانىنە ايرىقشا توقتالىپ, ونىڭ ۇلت ساپاسىن ايقىندايتىن باستى تىرەك ەكەنىن اتاپ وتكەن ەدى.
«وتباسى ينستيتۋتى ەڭبەكقورلىق, بىلىمپازدىق, تىلەكتەستىك سىندى «ادال ازاماتقا» ءتان قاسيەتتەردى قوعامدا جان-جاقتى دارىپتەۋ ارقىلى ۇلتتىڭ جاڭا ساپاسىن قالىپتاستىرۋعا ولشەۋسىز ۇلەس قوسادى. بەرەكەلى شاڭىراق – ەلىمىزدى ۇيلەسىمدى ءارى ورنىقتى دامىتۋدىڭ مىزعىماس كەپىلى. سوندىقتان مەملەكەت انا مەن بالانى قورعاۋ جۇيەسىن جەتىلدىرۋگە, وتباسى قۇندىلىقتارىن ۇلىقتاۋعا باسا ءمان بەرەدى. ءار وتباسىنىڭ ءال-اۋقاتىن جاقسارتۋ – ادىلەتتى قازاقستاندى قۇرۋ جولىنداعى نەگىزگى مىندەتتىڭ ءبىرى», دەگەن بولاتىن.
وسىنداي ۇلاعاتتى ۇستانىمداردىڭ ناقتى كورىنىسىن ەڭبەكپەن ورىلگەن اۋلەتتەردىڭ تاعىلىمدى جولىنان اڭعارۋعا بولادى. سولاردىڭ ءبىرى – مۇحاتوۆتار اۋلەتى. ەل يگىلىگى جولىندا تۇتاس اۋلەتىمەن قىزمەت ەتىپ كەلە جاتقان بۇل وتباسىنىڭ ونەگەسى كوپكە ۇلگى. ءۇش ۇرپاقتىڭ ماڭداي تەرى توعىسقان اۋلەت سۋ شارۋاشىلىعى سالاسىنا 160 جىل عۇمىرىن ارناعان.
بۇل اۋلەتتىڭ ەڭبەك جولى 1967 جىلدان باستاۋ الادى. سودان بەرى بىرنەشە بۋىن وكىلدەرى ەلدىڭ سۋ قاۋىپسىزدىگىن قامتاماسىز ەتۋ ىسىنە قالتقىسىز قىزمەت ەتىپ كەلەدى. بۇگىندە سول ءداستۇردى جالعاستىرىپ جۇرگەندەردىڭ ءبىرى – «قازسۋشار» رمك اقمولا فيليالىندا جەتەكشى مامان قىزمەتىن اتقاراتىن جانار مۇحاتوۆا. ول سۋ تۇتىنۋشىلارمەن جۇمىس جۇرگىزىپ, گيدروتەحنيكالىق نىسانداردىڭ تەحنيكالىق جاعدايىن باقىلاپ, جۇيەلى تەكسەرۋلەر ۇيىمداستىرادى.
جاناردىڭ كاسىبي جولى – اكە-شەشەسىنىڭ ونەگەسىنىڭ زاڭدى جالعاسى. اكەسى جۇمابەك مۇحاتوۆ سۋ شارۋاشىلىعى سالاسىندا ۇزاق جىل ەڭبەك ەتىپ, شەبەردەن باستاپ باسشىلىق قىزمەتتەرگە دەيىن كوتەرىلگەن. ول جامبىل وبلىسىنىڭ سۋ جۇيەسىن دامىتۋعا سۇبەلى ۇلەس قوسىپ, 2011-2017 جىلدارى شۋ-تالاس باسسەيندىك سۋ ينسپەكتسياسىن باسقاردى. ال اناسى ءازيا شامشيەۆا بۇل سالادا 40 جىلدان استام ەڭبەك ەتىپ, شۋ, تالاس, اسا وزەندەرىنىڭ سۋىن ءبولۋدى, سۋ قويمالارىنىڭ ەسەبىن جۇرگىزۋدى ۇلكەن جاۋاپكەرشىلىكپەن اتقاردى. كەيىن سۋ رەسۋرستارى كوميتەتىندە قىزمەت ەتتى.
اۋلەتتىڭ ەڭبەك ساباقتاستىعى بۇدان دا تەرەڭدە جاتىر. جاناردىڭ ناعاشى اتاسى مەن اجەسى ادىلشە جانە ايبالاش شامشيەۆتەر جامبىل وبلىسى جۋالى اۋدانىنداعى سۋ شارۋاشىلىعى نىساندارىندا ۇزاق جىل ەڭبەك ەتكەن. ال اپكەسى گۇلميرا دا وسى سالادان الشاق كەتكەن جوق – «قازسۋشار» مەكەمەسىندە ينجەنەر-گيدروتەحنيك ءارى ەكونوميست قىزمەتىن اتقارعان.
«جۇمىسقا قاتىستى ماسەلەلەر بويىنشا اناممەن ءجيى اقىلداسامىن. تاجىريبەلى ماماننىڭ كەڭەسى قاجەت بولعاندا ەڭ الدىمەن سوعان جۇگىنەمىن. ءوزارا قولداۋ كورسەتۋ جانە كەز كەلگەن ساتتە كومەكتەسۋگە دايىن بولۋ – ءبىزدىڭ وتباسىمىزدىڭ باستى قۇندىلىقتارىنىڭ ءبىرى. اتا-انامنىڭ ونەگەسى ءوز جولىمدى تابۋىما كومەكتەستى, ال ولاردىڭ تاربيەسى ەل يگىلىگى ءۇشىن ايانباي ەڭبەك ەتۋگە جىگەر بەرەدى», دەيدى جانار مۇحاتوۆا.
بۇگىندە سۋ رەسۋرستارى جانە يرريگاتسيا مينيسترلىگىنە قاراستى «قازسۋشار» كاسىپورنىندا وسىنداي 60-تان استام ەڭبەك اۋلەتى بار. سولاردىڭ قاتارىندا مۇحاتوۆتار – شامشيەۆتەر اۋلەتى – ۇرپاق ساباقتاستىعى مەن ادال ەڭبەك ءداستۇرىنىڭ ايقىن ۇلگىسى.
شاڭىراق – تەك وتباسىنىڭ ۇيىتقىسى عانا ەمەس, تۇتاس قوعامنىڭ تىرەگى. وسىنداي ەڭبەكپەن ورىلگەن اۋلەتتەر ەلدىڭ ىرگەسىن بەكەمدەپ, ۇلتتىڭ ساپاسىن ارتتىرۋعا ءۇنسىز, بىراق ولشەۋسىز ۇلەس قوسىپ كەلەدى.
