ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ وتانداستارىمىزدىڭ باسىم كوپشىلىگى جاڭا كونستيتۋتسيانى قولداعانىن اتاپ ءوتىپ, بارشا ازاماتتى وسى جەڭىسپەن قۇتتىقتادى. ورتالىق رەفەرەندۋم كوميسسياسىنىڭ مالىمەتىنە سايكەس, ساياسي ناۋقانعا قاتىسقان ادامداردىڭ 87,15%-ى جاڭا كونستيتۋتسياعا داۋىس بەردى. ونىڭ ايتۋىنشا, مۇنداي جوعارى ناتيجە ازاماتتاردىڭ ساياسي مادەنيەتىنىڭ ارتقانىن, ولاردىڭ ادىلەتتى قازاقستاندى قۇرۋعا دەگەن ۇمتىلىسىن ايقىن كورسەتەدى.
«15 ناۋرىز ەل شەجىرەسىندە ەلەۋلى ورىن العان تاريحي وقيعا بولدى. بۇل – جۇرتىمىزدى جۇمىلدىرعان, ۇلتىمىزدى ۇيىستىرعان ايتۋلى كۇن. قۋاتتى, ادىلەتتى, پروگرەسسيۆتى قازاقستاندى تاڭداعان كۇن. ول – مەملەكەت دامۋىنداعى جاڭا كەزەڭنىڭ باستالۋى. رەفەرەندۋم حالقىمىزدىڭ پرەزيدەنت رەفورمالارىنا زور سەنىم ارتىپ وتىرعانىن ايقىن كورسەتتى. جاڭا اتا زاڭدا ميلليونداعان وتانداسىمىزدىڭ تالاپ-تىلەگى, ءۇمىت-سەنىمى كورىنىس تاپتى. سوندىقتان جاڭا كونستيتۋتسيانىڭ قابىلدانۋى – بۇكىل حالقىمىزدىڭ جەڭىسى. ماڭىزدى قۇجات ەلىمىزدى تەك بيىك بەلەستەرگە, ۇلى مۇراتتارعا جەتەلەي بەرەدى دەپ سەنەمىن», دەدى ول.
ەرلان قوشانوۆ جاڭا كونستيتۋتسيانىڭ قابىلدانۋى مەملەكەتىمىزدەگى تۇبەگەيلى وزگەرىستەردىڭ باستاماسى ەكەنىن اتاپ ءوتتى. ەندى جاڭا كونستيتۋتسيانىڭ ءاربىر بابى ماڭىزدى نورماعا اينالىپ, ادامداردىڭ يگىلىگى جولىندا قىزمەت ەتۋى ءۇشىن ءالى دە كوپ جۇمىس اتقارۋ قاجەت. بۇل قوعامنىڭ بارلىق پروگرەسسيۆتى توبىنىڭ كۇش-جىگەرىن بىرىكتىرۋدى تالاپ ەتەدى, ال «Amanat» پارتياسى پرەزيدەنتتىڭ ساياسي تىرەگى رەتىندە وسى جۇمىستىڭ الدىڭعى شەبىندە بولۋعا ءتيىس. سونداي-اق ول پارتيا مۇشەلەرى جالپىۇلتتىق كواليتسيا قۇرامىندا اۋقىمدى ءتۇسىندىرۋ جۇمىسىن جۇرگىزىپ, ەلىمىزدىڭ بارلىق وڭىرىنە بارعانىن, ادامداردىڭ ءۇمىتى مەن تىلەگىن جاقسى بىلەتىنىن جانە ەندى ولاردىڭ تولىق ورىندالۋى ماڭىزدى ەكەنىن اتاپ ءوتتى.
جاڭا كونستيتۋتسيانىڭ قابىلدانۋىنا وراي, جيىن بارىسىندا «Amanat» پارتياسىنىڭ ۇندەۋى دە قابىلداندى. قۇجات ءماتىنىن پارتيانىڭ اتقارۋشى حاتشىسى داۋلەت كارىبەك وقىپ بەردى. ۇندەۋدە 15 ناۋرىز كۇنى حالىق تاريحي ءارى سانالى تاڭداۋ جاساپ, پرەزيدەنت
قاسىم-جومارت توقاەۆتىڭ رەفورمالار باعىتىنا بۇرىن-سوڭدى بولماعان قولداۋ بىلدىرگەنى اتالىپ ءوتتى. بۇل – ازاماتتار سەنىم ارتاتىن, كۇن سايىن ءوز تيىمدىلىگىن دالەلدەپ, مەملەكەتتى وڭ وزگەرىستەرگە جەتەلەيتىن باعىت. سونىمەن قاتار «Amanat» پارتياسى مەملەكەت باسشىسىنىڭ جەتەكشىلىگىمەن اتا زاڭ نورمالارىن جۇزەگە اسىرۋ جانە وركەندەگەن قازاقستان قۇرۋ جولىندا ءوزىنىڭ بارلىق رەسۋرسىن – پارلامەنت پەن ماسليحاتتارداعى فراكتسيالارىن, وڭىرلىك فيليالدار جەلىسىن, جاستار جانە ۆولونتەرلەر قۇرىلىمدارىن جۇمىلدىراتىنى ايتىلدى.
وتىرىس بارىسىندا فراكتسيا دەپۋتاتتارى دا ءسوز سويلەدى. ەرلان سايروۆ گەوساياسي تۋربۋلەنتتىلىك پەن تۇراقسىزدىق جاعدايىندا ەلىمىزگە مەملەكەتتىڭ تۇراقتىلىعىن ساقتاۋعا مۇمكىندىك بەرەتىن جاڭا كونستيتۋتسيا قاجەت ەكەنىن ايتتى. سەرگەي پونومارەۆ جاڭا كونستيتۋتسيا قوعامدىق كەلىسىمدى نىعايتىپ, قوعامنىڭ ەتنوسارالىق بىرلىگى سياقتى نەگىزگى گۋمانيتارلىق قۇندىلىقتاردى ساقتايتىنىن اتاپ ءوتتى. نارتاي سارسەنعاليەۆ جاڭا كونستيتۋتسيانى قولداۋ ىسىندەگى جاستار قاۋىمىنىڭ بەلسەندى رولىنە نازار اۋداردى. دەپۋتاتتىڭ ايتۋىنشا, بەلسەندى جاستار تۇتاس ەل اۋماعىندا مىڭداعان كەزدەسۋ وتكىزدى. سونداي-اق ول كونستيتۋتسيادا ۆولونتەرلەر قىزمەتىنىڭ بەكىتىلۋى جاستاردىڭ ازاماتتىق بەلسەندىلىگى ارتىپ كەلە جاتقانىن ايقىندايتىنىن اتاپ ءوتتى. يۋليا كۋچينسكايا رەفەرەندۋم قوعامدىق پىكىردىڭ اۋقىمدى كورىنىسىنە اينالىپ, وتانداستارىمىزدىڭ ساياسي كەمەلدىگى مەن ازاماتتىق جاۋاپكەرشىلىگىنىڭ جوعارى دەڭگەيىن بايقاتقانىن مالىمدەدى. ال ەركىن ءابىل پروپورتسيونالدى سايلاۋ جۇيەسىن ەنگىزۋ جانە پارتيالاردىڭ ءرولىن كۇشەيتۋ قادامى مازمۇندى ساياسي باسەكەلەستىككە جاعداي جاسايتىنىنا توقتالدى. مۇنداي جاعدايدا سايلاۋشىلار, ەڭ الدىمەن, كانديداتتىڭ جەكە تۇلعاسىن ەمەس, باعدارلاماسى مەن ۇسىنعان يدەيالارىن باعالايدى.
