Rail-news.kz مالىمەتىنشە, 17 ناۋرىزدان باستاپ «نۇرلى جول – سەمەي» باعىتىنداعى پويىز قۇرامىندا جاڭا RWS Wagon ۆاگوندارى جۇرە باستايدى.
پويىز قۇرامىندا بارلىعى 9 ۆاگون بولادى: 3 كۋپە, 5 پلاتسكارت جانە 1 شتابتىق ۆاگون. ءبىر باعىتتا 350-دەن استام جولاۋشىنى تاسىمالداۋعا مۇمكىندىك بار.
ۇلتتىق تاسىمالداۋشىنىڭ مالىمەتىنشە, №353/354 پويىزى كۇن ارا قاتىنايدى:
– «نۇرلى جول» ستانساسىنان 17:55-تە;
– سەمەي ستانساسىنان 16:45-تە جولعا شىعادى.
بۇعان دەيىن بۇل باعىتتا 1993 جىلى شىعارىلعان ۆاگوندار پايدالانىلعان. قازىر ولاردىڭ ورنىنا جاڭا بۋىنداعى زاماناۋي ۆاگوندار قويىلدى.
ناۋرىز مەرەكەسى قارساڭىندا قازاقستاندا قوسىمشا ەلەكترپويىزدار ىسكە قوسىلادى
كومپانيادا اتاپ وتكەندەي, جاڭا ۆاگوندار ديزاين, قاۋىپسىزدىك, سەنىمدىلىك جانە جايلىلىق بويىنشا زاماناۋي حالىقارالىق تالاپتارعا ساي جاسالعان. مۇمكىندىگى شەكتەۋلى جولاۋشىلار ءۇشىن ارنايى كۋپەلەر, مۇگەدەكتەر ارباسىنا ارنالعان ورىندار جانە جولسەرىكتى شاقىرۋ باتىرماسى قاراستىرىلعان. ۆاگونداردىڭ قىزمەت ەتۋ مەرزىمى 40 جىلعا دەيىن.
سوڭعى ەكى جىل ىشىندە «جولاۋشىلار تاسىمالى» اق RWS Wagon (زيكستو) ءوندىرىسىنىڭ 219 ۆاگونىن ساتىپ الدى. جاڭا ۆاگوندار سونداي-اق, «اقتوبە – اتىراۋ», «پاۆلودار – تۇركىستان», «پاۆلودار – الماتى», «قىزىلوردا – سەمەي», «الماتى – ساراتوۆ», «الماتى – وسكەمەن», «استانا – كوكشەتاۋ», «استانا – بۋراباي كۋرورتى», «قاراعاندى – استانا» باعىتتارىندا دا قاتىناۋدا.
قازاقستاندا ايەلدەرگە ارنالعان ۆاگوندار قاي باعىتتاردا قاتىنايدى؟
ۆاگون پاركىن جاڭارتۋ مەملەكەت باسشىسىنىڭ تاپسىرماسى اياسىندا ۇلتتىق تاسىمالداۋشىنىڭ نەگىزگى ستراتەگيالىق باعىتتارىنىڭ ءبىرى سانالادى. 2030 جىلعا دەيىنگى جاڭعىرتۋ باعدارلاماسى شەڭبەرىندە جولاۋشىلار ۆاگوندارى تولىقتاي جاڭارتىلادى.
