جيىنعا پارتيانىڭ ماجىلىستەگى فراكتسيا دەپۋتاتتارى, ورتالىق اپپارات پەن وڭىرلىك فيليالداردىڭ وكىلدەرى, سونداي-اق ReJastary جانە ReWomen پارتيالىق قوعامداستىقتارىنىڭ بەلسەندىلەرى قاتىستى.
وتىرىستى اشقان پارتيا توراعاسى وتكەن رەفەرەندۋمنىڭ ەلدىڭ ساياسي دامۋىنداعى ماڭىزدى بەلەس بولعانىن اتاپ ءوتتى. ميلليونداعان قازاقستاندىق ستراتەگيالىق تاڭداۋدىڭ ءمانىن تەرەڭ ءتۇسىنىپ, سايلاۋ ۋچاسكەلەرىنە باردى. داۋىس بەرۋگە سايلاۋشىلاردىڭ 73,12 پايىزى, ياعني 9,1 ميلليوننان استام ازامات قاتىستى.
«بۇل – قازاقستاندىقتاردىڭ ەل بولاشاعىن ايقىنداۋعا بەلسەنە ارالاسۋعا دايىن ەكەنىن كورسەتەتىن جوعارى ازاماتتىق بەلسەندىلىك. رەفەرەندۋمعا شىعارىلعان شەشىمدى داۋىس بەرۋگە قاتىسقانداردىڭ 87,15 پايىزى, ياعني شامامەن 8 ميلليون ازامات قولدادى. بۇل كورسەتكىشتەر قوعامنىڭ مەملەكەتتىك دامۋ باعىتى توڭىرەگىندە توپتاسقانىن ايقىن كورسەتىپ, قوعامدىق سەنىمنىڭ بەرىك مانداتىن بىلدىرەدى», دەدى ايداربەك قوجانازاروۆ.
ونىڭ ايتۋىنشا, قابىلدانعان وزگەرىستەر ساياسي ينستيتۋتتاردى جاڭارتۋعا, دەموكراتيالىق تەتىكتەردى نىعايتۋعا جانە ازاماتتاردىڭ مەملەكەتتىك شەشىمدەر قابىلداۋ ۇدەرىسىنە قاتىسۋ مۇمكىندىگىن كەڭەيتۋگە جول اشادى.
پارتيا توراعاسى رەفەرەندۋمعا دايىندىق كەزەڭىندە Respublica پارتياسىنىڭ اتقارعان جۇمىسىنا دا توقتالدى.
ء«بىزدىڭ پارتيا ءۇشىن بۇل جۇمىس داۋىس بەرۋ كۇنىنەن الدەقايدا بۇرىن باستالدى. ءبىز پارلامەنتتىك رەفورمالاردى تالقىلاۋعا قاتىسىپ, كونستيتۋتسيالىق كوميسسيا قۇرامىندا, كەيىننەن جالپىۇلتتىق كواليتسيا اياسىندا جۇمىس ىستەدىك. پارتيا بەلسەندىلەرى مەن وڭىرلىك فيليالدار بۇكىل ەل بويىنشا ءبىر جارىم مىڭنان استام كەزدەسۋ وتكىزىپ, كونستيتۋتسيالىق وزگەرىستەردىڭ ەكونوميكاعا, كاسىپكەرلىككە, الەۋمەتتىك ينفراقۇرىلىمعا جانە وڭىرلەردىڭ دامۋىنا ىقپالىن ءتۇسىندىردى», دەدى پارتيا توراعاسى.
ايداربەك قوجانازاروۆتىڭ ايتۋىنشا, قازىرگى كەزەڭدەگى باستى مىندەت – قوعامداعى بىرلىكتى ساقتاۋ جانە قابىلدانعان شەشىمدەردى ناقتى ىسكە اسىرۋ.
«مەملەكەتتىك ينستيتۋتتاردىڭ, ساياسي پارتيالاردىڭ جانە ازاماتتىق قوعامنىڭ الدىندا ورتاق مىندەت تۇر. ول – ەلدىڭ تۇراقتى دامۋىن قامتاماسىز ەتۋ, مەملەكەتتىك ينستيتۋتتاردى نىعايتۋ جانە ازاماتتاردىڭ ءومىر ءسۇرۋ ساپاسىن ارتتىرۋ», دەدى ول.
وتىرىستىڭ قورىتىندىسى بويىنشا Respublica پارتياسى قابىلدانعان شەشىمدەردى زاڭنامالىق تۇرعىدان قامتاماسىز ەتۋگە, سونداي-اق ەكونوميكانى دامىتۋعا, ازاماتتاردىڭ قۇقىقتارىن قورعاۋعا جانە قوعامنىڭ ءال-اۋقاتىن ارتتىرۋعا باعىتتالعان باستامالاردى جۇيەلى تۇردە قولداۋعا دايىن ەكەنىن راستادى.
مەملەكەت باسشىسى: 15 ناۋرىز – كونستيتۋتسيا كۇنى بولىپ بەلگىلەنەدى
ايتا كەتەيىك, 15 ناۋرىزدا قازاقستاندا جاڭا كونستيتۋتسيانى قابىلداۋ ماسەلەسىنە ارنالعان رەسپۋبليكالىق رەفەرەندۋم ءوتتى. ەلدىڭ بارلىق وڭىرىندە, سونداي-اق شەتەلدەگى قازاقستان رەسپۋبليكاسىنىڭ ديپلوماتيالىق وكىلدىكتەرىندە داۋىس بەرۋ ۋچاسكەلەرى اشىلدى. قازاقستاندىقتار «كونستيتۋتسيالىق رەفورمانى قولداي ما, الدە قولداماي ما» دەگەن سۇراققا جاۋاپ بەردى.
اۋماقتىق كوميسسيالاردىڭ دەرەكتەرىنە سايكەس, ەلدىڭ بارلىق وڭىرىندە رەفەرەندۋمعا 9 126 850 قازاقستاندىق كەلىپ داۋىس بەرگەن. الدىن الا مالىمەت بويىنشا, رەفەرەندۋمداعى جالپى قاتىسۋ دەڭگەيى 73,24% بولدى.
