بۋراباي اۋدانىنداعى №314 ۋچاسكەدە 18 جاستاعى ستۋدەنت تيمۋر باقىتبەك ۇلى مىڭجاساروۆ العاش رەت داۋىس بەردى. تيمۋر رەفەرەندۋمعا قاتىسۋ ەل بولاشاعى ءۇشىن جەكە جاۋاپكەرشىلىكتى سەزىنۋگە مۇمكىندىك بەرەتىن ماڭىزدى تاجىريبە بولعانىن اتاپ ءوتتى. سونداي-اق استانالىق 18 جاستاعى جانسايا راقىم دا جاڭا كونستيتۋتسيا بويىنشا رەفەرەندۋمدا العاش رەت داۋىس بەردى.
«ەلىمىزدىڭ بولاشاعىنا از دا بولسا ءوز ۇلەسىمدى قوسىپ, وعان اسەر ەتە الاتىنىما قۋانىشتىمىن», دەپ ءبولىستى بويجەتكەن.
ارىس قالاسىندا ايكۇمىس كارىم العاشقى داۋىسىن ءدال تۋعان كۇنىندە بەردى. جاس سايلاۋشىعا سايلاۋ ۋچاسكەسىنىڭ مۇشەلەرى سيمۆوليكالىق سىيلىق پەن گۇل شوقتارىن تابىستادى. بۇل ونىڭ ازاماتتىق بەلسەندىلىگىنىڭ ەستە قالارلىقتاي باستالۋىنا سەپتىگىن تيگىزدى.
ماڭعىستاۋ وبلىسىنداعى №203 ۋچاسكەدە جاس جۇبايلار – اسقاربەك چوعدانباەۆ پەن ناۋرىزگۇل تاجەدين بىرگە تاڭداۋ جاسادى.
«رەفەرەندۋم – ەل بولاشاعىنا بەيجاي قارامايتىن ءاربىر ازامات ءۇشىن ماڭىزدى قادام. جاس وتباسى رەتىندە ءبىز ءوز تاڭداۋىمىزدى جاسادىق», دەدى ولار.
اقتاۋ قالاسىندا Yessenov University-ءدىڭ 1-كۋرس ستۋدەنتى بەكزات قادىرباي العاش رەت داۋىس بەردى. ول رەفەرەندۋمعا قاتىسۋ – ازاماتتىق جاۋاپكەرشىلىك ەكەنىن, ال جاستار ماڭىزدى مەملەكەتتىك شەشىمدەرگە بەيجاي قاراماۋى ءتيىس ەكەنىن قاداپ ايتتى. داۋىس بەرۋ كۇنى تۇرعىنداردىڭ ۋچاسكەلەرگە بارۋىن جەڭىلدەتۋ ءۇشىن قالادا قوعامدىق كولىك قاتىناۋى تەگىن ۇيىمداستىرىلدى.
اكتسيا جاستاردىڭ بويىندا ازاماتتىق جاۋاپكەرشىلىك سەزىمىن قالىپتاستىرۋعا جانە ساياسي پروتسەستەرگە قىزىعۋشىلىعىن وياتۋعا باعىتتالعان. جاس سايلاۋشىلار ءوز داۋىستارىنىڭ ماڭىزى بار ەكەنىن جانە ەل بولاشاعىنا اسەر ەتە الاتىنىن العاش رەت سەزىنگەن.
سايلاۋ ۋچاسكەلەرىنە العاش رەت كەلگەن جاستار ءۇشىن بۇل كۇن – ۇلكەن ازاماتتىق ومىرگە قادام باسۋدىڭ جانە ەل تاعدىرىنا اتسالىسۋعا ۇمتىلۋدىڭ سيمۆولى. العاش داۋىس بەرۋشىلەردىڭ بەلسەندىلىگى بۇكىل ەل جاستارى ءۇشىن وتانسۇيگىشتىكتىڭ ۇلگىسىنە اينالىپ وتىر.
