جايرەم كەنتىندەگى 6 ۋچاسكەدە تاۋ-كەن بايىتۋ كومبيناتىنىڭ اۋىسىمدىق جۇمىس كەستەسىنە بايلانىستى داۋىس بەرۋ ساعات 06:00-دەن 20:00-گە دەيىن ۇيىمداستىرىلادى.
ۇلىتاۋ وبلىسى بويىنشا داۋىس بەرۋ تىزىمىنە 136 447 ازامات ەنگىزىلگەن.
مۇگەدەكتىگى بار ازاماتتاردىڭ داۋىس بەرۋىنە قولايلى جاعداي جاسالعان. بارلىق ۋچاسكەلەر پاندۋستارمەن جانە ارنايى تۇتقالارمەن جابدىقتالعان. سونداي-اق كرەسلو-اربا پايدالاناتىن ازاماتتارعا ۆولونتەرلار كومەگى كورسەتىلىپ, وبلىس بويىنشا 7 ينۆاتاكسي قىزمەتى جۇمىس ىستەيدى.
العاشقىلاردىڭ ءبىرى بولىپ ۇلىتاۋ وبلىسى اسسامبلەيا جاستارىنىڭ جەتەكشىسى پاك ەۆگەني ۆياچەسلاۆوۆيچ داۋىس بەردى. ول جەزقازعان قالاسىنىڭ «قوعامدىق كەلىسىم» كمم-دە باس ساراپشى بولىپ جۇمىس ىستەيدى. ەۆگەني پاك ۇلىتاۋ وبلىسىنىڭ جاستارى اراسىندا مەملەكەتتىك ساياساتتى ناسيحاتتاۋ جانە ەتنومادەني بىرلەستىكتەردىڭ جاستار قاناتتارىنىڭ جۇمىسىن ۇيىمداستىرۋ ىسىندە وتە بەلسەندىلىك تانىتىپ جۇرگەن جالىندى جاس.
ول جەتەكشىلىك ەتەتىن «اسسامبلەيا جاستارى» كۇنى كەشە عانا كورىسۋ كۇنىنە وراي وڭىردەگى ارداقتى اجەلەردىڭ ۇيىنە بارىپ, مەرەكەمەن قۇتتىقتادى. جاستار جىلى لەبىزدەرى مەن ىزگى تىلەكتەرىن ايتىپ, مەرەكەلىك كوڭىل كۇي سىيلادى. سونىمەن قاتار, ۇلكەندەرگە قۇرمەت كورسەتىپ, تورت پەن باۋىرساق اپارىپ, داستارحانعا تارتۋ ەتتى.
«مەن ۇلىتاۋ وبلىسى, جەزقازعان قالاسىنداعى 20 سايلاۋ ۋچاسكەسىنە كەلىپ, ءوز داۋىسىمدى بەردىم. بۇل مەنىڭ قازاقستان ازاماتى رەتىندە ۇستانعان ازاماتتىق پوزيتسيام دەپ بىلەمىن. رەفەرەندۋمنىڭ جۇمىسىنا ساتتىلىك تىلەيمىن!», دەيدى العاشقىلاردىڭ ءبىرى بولىپ داۋىس بەرگەن ەۆگەني پاك.
ۇلىتاۋ وبلىسى
