ساپالى ساراپتاما جۇرگىزۋ تاپسىرىلدى

كەشە پرەمەر-ءمينيستردىڭ ورىنباسارى بەردىبەك ساپارباەۆ قىزىلشاعا قارسى جاپپاي ۆاكتسينالاۋ باستالعاننان كەيىن رەسپۋب­ليكادا تۋىنداعان جاعداي بويىنشا سەلەكتورلىق كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى. بەلگىلى بولعانداي, تۋىنداعان ەپيدەميولوگيالىق جاعدايدى ەسكەرە وتىرىپ, 15-19 جاس ارالىعىنداعى ادامداردى قوسىمشا يممۋنداۋ ءۇشىن قىزىلشا مونوۆاكتسيناسىنىڭ 1 ملن. دوزاسى ساتىپ الىنعان. 15-19 جاس ارالىعىنداعى جاس ەرەكشەلىك توپتارىن ىرىكتەۋ قىزىلشاعا سەزىمتالدىعى بار جاسوسپىرىمدەر اراسىندا جوعارى كورسەتكىشپەن بايلانىستى بولعان. 2015 جىلعى 19 اقپانداعى جاعداي بويىنشا رەسپۋبليكادا ۆاكتسينالاۋعا جاتاتىن 881مىڭ بالانىڭ 59,4%-ى ەكپە الدى. 2015 جىلعى 24 اقپانداعى احۋال بويىنشا مەديتسينالىق كومەككە 185 ادام جۇگىنگەن, ول ۆاكتسينا العان­داردىڭ جالپى سانىنان 0,03 %-دى قۇرايدى. جۇگىنگەن بالالاردى قا­راپ-تەكسەرۋ ناتيجەلەرى بويىنشا بالالاردىڭ شاعىمدارىنىڭ باسىم بولىگى بالالار ورگانيزمىنىڭ ۆاكتسينا ەنگىزۋگە جەكە سەزىمتالدىعىمەن بايلانىستى ەكەنى بەلگىلى بولدى. بالالارعا مەديتسينالىق كومەك تولىق كولەمدە كورسەتىلەدى, قاجەت­تىلىگىنە قاراي ولاردى ديناميكالىق بايقاۋ ءۇشىن ستاتسيونارعا ەمدەۋگە جاتقىزۋ جۇزەگە اسىرىلۋدا. قازىرگى ساتتە قىزىلشاعا قارسى ۆاكتسينالاۋ رەس­پۋبليكا بويىنشا توقتاتىلدى. كەڭەس قورىتىندىسى بويىنشا ب.ساپارباەۆ ۆاكتسيناعا ساپالى ساراپتاما جۇرگىزىلۋىن, سونداي-اق جاپپاي ۆاكتسينالاۋ كەزىندە جانە ۆاكتسينالاۋدان كەيىنگى اسەرلەر سەبەپتەرىن بەلگىلەۋ بويىنشا تالاپتاردىڭ ساقتالۋىنا تەكسەرۋ جۇرگىزۋ بولىگىندە وڭىرلىك كوميسسيالار قىزمەتىن ۇيلەستىرۋ جونىندەگى رەسپۋبليكالىق جۇمىس توبىنىڭ قۇرىلۋىن قامتاماسىز ەتۋدى تاپسىردى. سونىمەن قاتار, ۆيتسە-پرەمەر ۇلتتىق ەكپە كۇنتىزبەسىنە سايكەس ودان ءارى يممۋنداۋدىڭ جۇرگىزىلۋىنە باقىلاۋدى كۇشەيتۋدى مىندەتتەدى.