520 رەفەرەندۋم ۋچاسكەسىنىڭ ارقايسىسى قاجەتتى جابدىقتارمەن: جاسىرىن داۋىس بەرۋ كابينالارىمەن, بيۋللەتەندەرگە ارنالعان جاشىكتەرمەن, رەسپۋبليكالىق رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرىمەن جانە ءاربىر ازامات ءوز قالاۋى بويىنشا جاڭا كونستيتۋتسيا جوباسىمەن تانىسا الاتىن اقپاراتتىق ستەندتەرمەن جابدىقتالعان.
ء«وڭىر بويىنشا شامامەن 500 مىڭداي ادام داۋىس بەرۋ قۇقىعىنا يە. تىزىمدە 26 مىڭعا جۋىق مۇمكىندىگى شەكتەۋلى جان تىركەلگەن بولسا, ولاردىڭ ىشىندە 3200 ادامعا ەرەكشە جاعدايلار قاجەت. ارباعا تاڭىلعاندار 305 رەفەرەندۋم ۋچاسكەسىندە, كورۋ قابىلەتى ناشار داۋىس بەرۋشىلەر 365 ۋچاسكەدە, ال ەستۋ قابىلەتى ناشار داۋىس بەرۋشىلەر 293 ۋچاسكەدە داۋىس بەرە الادى. ۋچاسكەلەردىڭ باسىم بولىگى پاندۋستارمەن جابدىقتالىپ, ارنايى باعىتتاعىشتار ورناتىلعان. سونداي-اق كورۋ قابىلەتى بۇزىلعان سايلاۋشىلاردىڭ داۋىس بەرۋگە ءوز بەتىنشە قاتىسۋىنا مۇمكىندىك بەرەتىن برايل شريفتىمەن جازىلعان 520 بيۋللەتەن ترافارەتى دايىن تۇر», دەيدى وبلىستىق اۋماقتىق رەفەرەندۋم كوميسسياسىنىڭ توراعاسى گۇلنار امانجولوۆا.
كەي ازاماتتار دەنساۋلىعىنا بايلانىستى ۇيدەن داۋىس بەرۋدى قالاسا, ساعات 12.00-گە دەيىن ءتيىستى رەفەرەندۋم ۋچاسكەسىنە حابارلاسىپ, ءوتىنىش قالدىرا الادى. مۇنداي جاعدايدا كوميسسيا وكىلدەرى تۇرعىننىڭ ۇيىنە بيۋللەتەندى الىپ بارادى. تۇراقتى تىركەۋى جوق ازاماتتارعا پاۆلودار, ەكىباستۇز جانە اقسۋ قالالارىنداعى 6 رەفەرەندۋم ۋچاسكەسىندە ءبىر كۇنگە تىركەلىپ, تاڭداۋىن جاساۋعا مۇمكىندىك بار. بۇگىن اتالعان ءۇش قالاداعى قوعامدىق كولىكتەر جولاۋشىلاردى تەگىن تاسىمالدايدى. سونداي-اق ينۆاتاكسيلەر تەگىن قىزمەت كورسەتەدى.
پاۆلودار وبلىسى
