جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنشە, وڭىرلىك جارتىلاي فينالداردىڭ قورىتىندىسى بويىنشا Digital Qazaqstan Battle فينالىنا 20 ستارتاپ ءوتتى. ولاردىڭ قاتارىندا: aitomaton (قوستاناي), Lady Taxi (اتىراۋ), SanEduPortal (سەمەي), Kasibi Taxi (ورال), LoyaBonus (وسكەمەن), Okushy (كوكشەتاۋ), CortexAI (قىزىلوردا), Proji (اقتوبە), zhihaz.kz (قوناەۆ), SmetaHub (جەزقازعان), gro.now (الماتى), Reco (تاراز), AR Sana (استانا), Qalam (شىمكەنت), Ai-mektep (تۇركىستان), JolScan (قاراعاندى), Mathlab (پاۆلودار), Help Hand (تالدىقورعان), KenDala (اقتاۋ) جانە Numerus (پەتروپاۆل).
«Digital Qazaqstan Battle – مىقتى تەحنولوگيالىق جوبالار تەك ءىرى قالالاردا عانا ەمەس, قازاقستاننىڭ وڭىرلەرىندە دە پايدا بولاتىنىن كورسەتۋگە مۇمكىندىك. جارتىلاي فينالدار بارىسىندا ءبىز دايىن ونىمدەرى بار, العاشقى ساتىلىمدارىن جۇزەگە اسىرعان جانە حالىقارالىق نارىقتارعا شىعۋدى كوزدەيتىن ستارتاپتاردى كوردىك. شىمكەنتتە وتەتىن فينال ولاردىڭ ەڭ ۇزدىكتەرىنە ءوز شەشىمدەرىن ينۆەستورلارعا جانە ەلدىڭ بۇكىل تەحنولوگيالىق ەكوجۇيەسىنە تانىستىرۋعا مۇمكىندىك بەرەدى», دەدى Astana Hub باسقارۋشى ديرەكتورى تانات وسكەمباەۆ.
وڭىرلىك باتلداردىڭ جەڭىمپازدارىنىڭ ءبىرى – جول ينفراقۇرىلىمىنىڭ جاي-كۇيىن مونيتورينگتەۋ جانە كومپيۋتەرلىك كورۋ تەحنولوگيالارى ارقىلى اۆتوتۇراق كەڭىستىگىن باسقارۋ شەشىمىن ازىرلەيتىن JolScan ستارتابى. جۇيە قالالىق كامەرالار مەن ءموبيلدى قۇرىلعىلاردان جينالعان دەرەكتەر نەگىزىندە جول جابىنىنداعى اقاۋلاردى اۆتوماتتى تۇردە انىقتايدى. بۇل جولداردى قولمەن تەكسەرۋگە كەتەتىن شىعىنداردى ايتارلىقتاي ازايتۋعا مۇمكىندىك بەرەدى.
«جارتىلاي فينالدا جەڭىسكە جەتۋ – جول ينفراقۇرىلىمىن مونيتورينگتەۋ مەن اۆتوتۇراق كەڭىستىگىن باسقارۋدى ءبىر ەكوجۇيەگە بىرىكتىرەتىن «اقىلدى قالا» تۇجىرىمدامامىزدىڭ ومىرشەڭدىگىن راستايدى. ءبىز ءۇشىن بۇل قولدانىستاعى قالالىق ينفراقۇرىلىمدى ءموبيلدى سەنسورلار رەتىندە پايدالانۋ سياقتى يننوۆاتسيالىق ءتاسىل قالالاردى تسيفرلىق ترانسفورماتسيالاۋدىڭ ءتيىمدى قۇرالى بولا الاتىنىن كورسەتەدى», دەدى JolScan ستارتابىنىڭ تەڭ قۇرىلتايشىسى رۋستەم قادىروۆ.
وڭىرلىك كەزەڭنىڭ تاعى ءبىر جەڭىمپازى – aitomaton ستارتابى. ول AI-اگەنتتەردىڭ كومەگىمەن بيزنەس-پروتسەستەر مەن كوممۋنيكاتسيالاردى اۆتوماتتاندىرۋعا ارنالعان پلاتفورمانى ازىرلەيدى.
ء«بىز بيزنەس ءۇشىن AI-اگەنتتەر مەن ادامداردى ءبىر جۇمىس كەڭىستىگىندە بىرىكتىرەتىن پلاتفورمانى جاساپ جاتىرمىز. وندا نەگىزگى قۇرالدار بىرىكتىرىلگەن: CRM, تاسك-ترەكەر, قىزمەتتەرگە جازىلۋ جۇيەسى, ومنيكانالدى مەسسەندجەر, تەلەفونيا جانە قوڭىراۋلار مەن چاتتاردا جۇمىس ىستەيتىن AI-اگەنتتەر. Digital Qazaqstan Battle فينالىنا شىعۋ – بۇل تۇجىرىمدامانى كەڭ تەحنولوگيالىق اۋديتورياعا تانىستىرۋعا تاماشا مۇمكىندىك. فينالدا ۇزدىك ۇشتىككە ەنىپ, جوبانى دامىتۋ ءۇشىن جاڭا سەرىكتەستەر تابۋدى جوسپارلاپ وتىرمىز», دەدى aitomaton جوباسىنىڭ CPO جانە نەگىزىن تەڭ قالاۋشى ەدگار ۆولودكين.
ەسكە سالا كەتسەك, ۇلتتىق ستارتاپ-باتلدىڭ فينالى 2026 جىلعى 27 ناۋرىزدا شىمكەنت قالاسىندا Digital Qazaqstan فورۋمى اياسىندا وتەدى. فيناليستەر ءوز جوبالارىن قازىلار القاسىنا, ينۆەستورلارعا جانە ەلدىڭ تەحنولوگيالىق ەكوجۇيەسىنىڭ وكىلدەرىنە تانىستىرادى.
باتل جەڭىمپازى 10 000 000 تەڭگە, ەكىنشى ورىن يەگەرى 5 000 000 تەڭگە, ءۇشىنشى ورىن يەگەرى 3 000 000 تەڭگە الادى. سونىمەن قاتار 1 000 000 تەڭگە كولەمىندە كورەرمەن كوزايىمى جۇلدەسى تابىستالادى. قازىلار القاسى جوبالاردى نارىقتىق ديناميكاسى, كوماندا ساپاسى, ماسشتابتالۋ الەۋەتى جانە ينۆەستيتسيالىق تارتىمدىلىعى بويىنشا باعالايدى.
تاشكەنتتەگى Grand Slam تۋرنيرىنە قاتىساتىن بالۋاندار انىقتالدى
