الەۋمەتتىك زەرتتەۋلەر – كوڭىل-كۇي ايناسى

كەشە ورتالىق كوممۋنيكاتسيالار قىزمەتىندە كەزەكتى بريفينگ بولدى. ونى وتكىزۋگە ءوتىنىش بىلدىرگەن «زاكون.كز» اقپاراتتىق اگەنتتىگى مەن الەۋمەتتىك-ساياسي زەرتتەۋلەر ينستيتۋتى ەكەن. بريفينگكە وسى ەكى ۇيىمنىڭ باسشىلارى, اتاپ ايتقاندا, «زاكون.كز» اگەنتتىگىنىڭ باس رەداكتورى يننا رۋداكوۆا مەن الەۋمەتتىك-ساياسي زەرتتەۋ­لەر ينستيتۋتىنىڭ ديرەكتورى ايگۇل سادۋاقاسوۆا كەلدى. جۇرگىزۋشى «بريفينگتە سۇراق قويۋعا بولمايدى» دەپ جۋرناليستەردىڭ قۇلشىنىسىن بىردەن تىيىپ تاستادى. سونىمەن, العاشقى ءسوز ي.رۋداكوۆا حانىمعا بەرىلدى. ول 26 ساۋىردە بولاتىن پرەزيدەنتتىك سايلاۋعا ۇگىت ناۋقانى باستالعانىن ايتتى. سوسىن وزدەرىنىڭ «زاكون.كز» اقپاراتتىق پورتالى الداعى سايلاۋ پروتسەسىن كورسەتۋگە بەلسەندى تۇردە ارالاسۋ تۋرالى شەشىم قابىلداعانىن جەتكىزدى. وسىعان وراي ءبىز الەۋمەتتىك-زەرتتەۋلەر ينستيتۋتىمەن ىنتىماقتاساتىن بولامىز, دەدى ول. ودان ءارى ەكزيت-پۋلدار, تەلەفوندىق ساۋالدامالار ارقىلى سايلاۋ ناۋقانىنىڭ بارىسى, حالىقتىڭ كوڭىل-كۇيى تۋرالى اقپاراتتار بەرىلەتىنىن ايتتى. سونىمەن بىرگە, ول «ەكزيت-پۋلدى» العاش رەت 1967 جىلى جۋرناليستەردىڭ ويلاپ شىعارعانىن جەتكىزدى. ايگۇل سادۋاقاسوۆا ءوزى باسقاراتىن ينستيتۋت سايلاۋ بارىسىنداعى احۋالدان الەۋمەتتىك زەرتتەۋلەردى جۇيەلى تۇردە جۇرگىزەتىنىن ايتتى. اپتا سايىن قازاقستاندىقتاردىڭ سايلاۋعا دەگەن كوزقاراسى, كوڭىل-كۇيى, وي-پىكىرلەرىن ءبىلۋ ماقساتىمەن تەلەفون ارقىلى ەكسپرەسس-ساۋالداما جۇرگىزەمىز. الايدا, بۇل ءادىستىڭ ءبىرىنشى كەزەڭى ناۋرىزدىڭ 20-سىنان باستالعان, بىراق العاشقى ناتيجەلەرى ءالى جوق, ول جاقىن كۇندەردە عانا بەلگىلى بولادى. كەلەسى ءۇش كەزەڭى ءساۋىردىڭ 1-6, ەكىنشىسى 8-14 جانە ءۇشىنشىسى 15-19 ارالىعىندا جۇرگىزىلەدى. ءبىزدىڭ نەگىزگى ماقساتىمىز – حالىقتىڭ سايلاۋ تۋرالى اقپاراتتاندىرىلۋ دەڭگەيىن انىقتاۋ, سايلاۋعا كوزقاراسىن ءبىلۋ, داۋىس بەرۋگە قاتىسۋ دەڭگەيىن انىقتاۋ جانە سوڭعى كۇنى سايلاۋدان شىققاننان كەيىن ەكزيت-پۋل ادىسىمەن ارنايى ساۋالداما جۇرگىزۋ. بۇل ءادىس الەمدىك تاجىريبەدە بار. بىزدە دە, قازاقستان تاۋەلسىزدىگىن الىپ, دەموكراتيالىق ەل بولعاننان بەرى وسىنداي زەرتتەۋلەر وتكىزىلىپ كەلەدى, دەدى ول. جاقسىباي سامرات, «ەگەمەن قازاقستان».