وتانداسىمىز پارا بياتلون جارىسىندا جەڭىس تۇعىرىنىڭ ەڭ بيىك ساتىسىنا كوتەرىلدى. ەربول حاميتوۆ 4,5 شاقىرىمدىق ءىز كەسۋ جارىسىندا (وتىرىپ جارىسۋ ساناتى) ۇزدىك ناتيجە كورسەتىپ, چەمپيون اتاندى.
جارىستا قارا ۇزگەن جەڭىمپاز ۋكراينالىق تاراس رادتى, قىتايلىق تسزىسيۋي ءليۋدى شاڭ قاپتىردى.
ايتا كەتەيىك, بۇعان دەيىن ەربول حاميتوۆ وسى پاراليمپيادا ويىندارىندا پارا شاڭعى جارىسىنان قولا مەدالدى جەڭىپ العان ەدى. وسىلايشا قازاقستاندىق سپورتشى ءبىر جارىستىڭ وزىندە ەكى جۇلدە قورجىنعا سالدى.
ەربول پاراسپورتقا 2018 جىلى كەلگەن. سودان بەرى قىسقى سپورت تۇرلەرىندە تاباندى دايىندالىپ, حالىقارالىق جارىستاردا كوزگە ءتۇستى. 2022-2023 جىلعى قىسقى ماۋسىمدا پارا بياتلون مەن پارا شاڭعىدان الەم كۋبوگى كەزەڭدەرىندە بىرنەشە مارتە جەڭىس تۇعىرىنا كوتەرىلدى. كەيىن الەم چەمپيوناتىندا دا ۇزدىك شىعىپ, قازاقستان سپورتى تاريحىندا وسى باعىت بويىنشا جاھاندىق دەڭگەيدەگى العاشقى چەمپيون اتاندى. بۇعان دەيىن بۇل بەلەس وتانداستارىمىز ءۇشىن الىنباي كەلگەن ەدى.
2024-2025 جىلعى ماۋسىم قورىتىندىسىندا ەربول پارا بياتلوننان الەم كۋبوگىنىڭ جالپى ەسەبىندە كوش باستاپ, اراعا 31 جىل سالىپ ەلىمىزگە مارتەبەلى حرۋستال گلوبۋستى اكەلدى. ال قازىر ميلاندا ءوتىپ جاتقان قىسقى پاراليمپيادا ويىندارىندا توپ جارىپ, جەڭىس تۇعىرىنان كورىنىپ, قازاقستاننىڭ كوك تۋىن بيىككە كوتەردى.
