جۇمىسپەن قامتۋداعى ءتيىمدى ادىستەر

دۋالدى جۇيە  مامان دايارلاۋدا ءوندىرىس, ءبىلىم الۋشىنىڭ جانە مەملەكەتتىڭ مۇددەلەرىن بىرىكتىرۋگە باعىتتالعان كاسىپتىك ءبىلىم بەرۋدىڭ ءبىر ءتۇرى ەكەندىگى بەلگىلى.  ءبىلىم الۋشى جاستار ءۇشىن  ومىردەگى ءوز ورنىن ەرتە تابۋعا مۇمكىندىك جاسايتىن, بولاشاققا جول سىلتەپ, باعىت-باعدار بەرەتىن وڭتايلى باعدارلاما. وسىنىڭ اياسىندا, اتقارىلىپ جاتقان ىستەر جايىندا قۇلاقتاندىرىلعان ءباسپاسوز ءماسليحاتى بولىپ ءوتتى.  جيىندا  ءبىلىم جانە عىلىم ۆيتسە-ءمينيسترى ەسەنعازى يمانعاليەۆ, ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى نۇرجان التاەۆ, «ورلەۋ» باۇو» اق ديرەكتورلار كەڭەسىنىڭ توراعاسى مۇرات ابەنوۆ جانە حالىقارالىق ساراپشى مەتيۋ اندەرسون بولدى. ءبىرىنشى ءسوز العان ە.يمانعاليەۆ «بارشاڭىزعا بەلگىلى,  2012 جىلدىڭ اقپان ايىندا ەلباسى گەرمانياعا ساپارىندا «كەيىن وقىتۋدىڭ دۋالدى جۇيەسىن» ەنگىزۋ تۋرالى تاپسىرما بەرگەن بولاتىن.  سوندىقتان 2014 جىلعى جولداۋىندا  2-3 جىلدىڭ اراسىندا تەحنيكالىق جانە كاسىپتىك ءبىلىمدى ۇلتتىق دۋالدى جۇيە قۇرۋ تاپسىرماسى بولعان», دەدى.  بىلتىر ۇلتتىق كاسىپكەرلەر پالاتاسىمەن بىرىگىپ, دەنساۋلىق ساقتاۋ جانە الەۋمەتتىك دامۋ مينيسترلىگىمەن مەموراندۋمعا قول قويىلدى. سول جۇمىستار جۇيەلى ناتيجە بەرىپ جاتىر دەۋگە بولادى, دەي كەلە,  وسىنىڭ اياسىندا 3225 كاسىپورىن 280 كوللەدجبەن ارىپتەستىك شارتقا قول قويعاندىعىن حابارلادى. ەلباسىنىڭ تاپسىرماسى بويىنشا جۇمىسپەن قامتۋ ماسەلەسى نازاردا ەكەندىگىن تىلگە تيەك ەتە وتىرىپ, ۆيتسە-مينيستر دۋالدى تەحنولوگيالاردى قولدانىپ, قازىرگى تاڭدا جاستار 100 پايىز جۇمىسپەن قامتىلىپ وتىر, دەپ حابارلادى. سونىمەن قاتار, ول 2015 جىلعا قويىپ وتىرعان ماقساتتاردىڭ ءبىرى – كاسىپكەرلەر جالپى  2776 گرانت ءبولىپ جاتىر دەي كەلە,  1712 ءاربىر بالانىڭ باسىنا شاققاندا ديففەرەنتسيالدى تۇردە ستيپەنديا ءبولىپ جاتىر, دەدى. وسى تۇستا, ۆيتسە-مينيستر   2000 مەموراندۋم مەن شارتتارعا قول قويىلۋ ۇستىندە ەكەنىن ايتىپ ءوتتى. م.ابەنوۆ وتكەن جىلى ءبىلىم جانە عىلىم مينيسترلىگى ۇلتتىق كاسىپكەرلەر پالاتاسى قولداۋىمەن ورتاق «سەرپىن» دەگەن باعدارلامانى باستاعان بولاتىنبىز, دەي كەلە, كادرلار تاپشىلىعىنا بايلانىستى ورالىمدى ويىن جەتكىزدى. قاراپ وتىرساق, كەي وڭىرلەردە كادر جەتىسپەۋشىلىگى بايقالسا, ال كەي جەرلەردە ارتىقتىعى كورىنىس تاۋىپ وتىر. وسىعان بايلانىستى جاستار اراسىندا قانداي ماماندىقتار جەتىسپەيتىندىگىن ناقتىلاپ الۋ ءۇشىن بىزگە ۇلتتىق پالاتا اقپارات بەرىپ وتىرادى. ال كەيىنگى كەزەكتە وسى ماسەلە بويىنشا كادر دايارلاۋ جۇمىسىنا كىرىسەمىز, دەدى م.ابەنوۆ. ەلميرا ماتىباەۆا, «ەگەمەن قازاقستان».