فوتو: دەنساۋلىق ساقتاۋ مينيسترلىگى
ماڭىزدى باعىتتاردىڭ ءبىرى – ءينسۋلتتى ەرتە كەزەڭدە انىقتاۋ. Cerebra اۆتوماتتاندىرىلعان دياگنوستيكا جۇيەسى ەلىمىزدىڭ 9 ينسۋلت ورتالىعىندا ەنگىزىلگەن.
بۇل تەحنولوگيا ينسۋلت بەلگىلەرىن جەدەل انىقتاۋعا مۇمكىندىك بەرەدى, سونىڭ ارقاسىندا كلينيكالىق شەشىمدەردى تەز قابىلداۋ جانە ەمدەۋدى دەر كەزىندە باستاۋ مۇمكىندىگى تۋادى. جۇيەنى ەنگىزۋ ناتيجەسىندە ترومبوليتيكالىق تەراپيانى قولدانۋ 40%-عا ارتتى. 2026 جىلى بۇل شەشىمدى 33 ينسۋلت ورتالىعىنا دەيىن كەڭەيتۋ جوسپارلانىپ وتىر.
ونكولوگيالىق اۋرۋلاردى ەرتە انىقتاۋ ءۇشىن WDSoft كومپانياسىنىڭ ازىرلەگەن شەشىمدەرى قولدانىلادى. راديولوگيالىق كەسكىندەردى تالداۋ كەزىندە جاساندى ينتەللەكت ءسۇت بەزى مەن وكپە وبىرىن ەرتە كەزەڭدە انىقتاۋعا مۇمكىندىك بەرەدى.
جي قولدانۋدىڭ ارقاسىندا ونكولوگيالىق اۋرۋلاردى انىقتاۋ كورسەتكىشى 32%-عا ارتتى, ال دياگنوستيكا جاساۋ ۋاقىتى 40 مينۋتتان 10 مينۋتقا دەيىن قىسقاردى. قازىرگى تاڭدا بۇل جوبا ەلىمىزدىڭ 12 وڭىرىندەگى 190 مەديتسينالىق ۇيىمعا ەنگىزىلگەن جانە ونى ودان ءارى كەڭەيتۋ جالعاسىپ جاتىر.
ستوماتولوگيادا Aidentis شەشىمدەرى رەنتگەن سۋرەتتەرىن اۆتوماتتى تالداپ, پاتولوگيالىق وزگەرىستەردى انىقتاپ, ەمدەۋ بويىنشا ۇسىنىمدار بەرەدى. ناتيجەسىندە كەسكىندەردى تالداۋ ۋاقىتى 1 ساعاتتان 1 مينۋتقا دەيىن قىسقاردى.
بارلىق تسيفرلىق شەشىمدەر مەديتسينالىق دەرەكتەردىڭ بىرىڭعاي قويماسى بازاسىندا ىسكە اسىرىلادى. بۇل مەديتسينالىق اقپاراتتىق جۇيەلەردىڭ ينتەگراتسياسىن قامتاماسىز ەتەدى.
