سۋرەتتى تۇسىرگەن – ەرلان ومار, «EQ»
مەرەكەدە گۇل سىيلاۋ – جاي عانا سىيلىق ەمەس, جىلى ءسوزدىڭ كوركەم بالاماسى. گۇلدىڭ ەڭ ادەمىسىن عانا ەمەس, سىيلىق يەسىنە لايىعىن تاڭداعان ءجون. جىكتەپ ايتساق, جاقىن جانعا سىيلايتىن گۇلدىڭ تۇرىنە, تۇسىنە, سانىنا ءمان بەرۋ كەرەك. فلوريستيكادا سان ارقىلى سەزىمدى بىلدىرەتىن بەيرەسمي «كود» بار. ماسەلەن, ەلىمىزدە, كورشى وڭىرلەردە قالىپتاسقان ادەپ بويىنشا مەرەكەدە – تاق سان, قارالى جاعدايدا جۇپ سان بەرۋ قالىپتى سانالادى.
سول سەكىلدى گۇلدىڭ ءتۇسىن تاڭداۋدا دا وزىندىك ءمان-ماعىنا بار. مىسالى, قىزىل رەڭك – ماحاببات پەن ىقىلاستى, قىزعىلت ءتۇس – نازىك ءىلتيپات پەن ريزاشىلىق ءراۋىشىن بىلدىرەدى. ال اق ءتۇس – تازالىق, ادال نيەت, سىيلاستىق بەلگىسى بولعانىمەن, كەي وتباسىلار ونى سالتاناتتى, كەيبىرى ونى تىم رەسمي دەپ قابىلداۋى مۇمكىن. سارى رەڭك كوبىنە دوستىق پەن قۋانىشقا, كۇلگىن ءتۇس قادىر-قۇرمەتكە بالانادى.
ال ەندى وسى ءبىر نازىك تە سۇلۋ جاراتىلىستىڭ تۇرلەرىنە توقتالساق, «گۇل تىلىندە» ەڭ تانىمال يشارا الدىمەن راۋشاننان باستالادى. قىزىل راۋشان – عاشىقتىق سەزىمىنىڭ بەلگىسى, اق راۋشان – ادالدىق پەن سىيلاستىقتىڭ نىشانى. فلوريستەردىڭ پايىمىنشا, قالامپىر – ەرەكشە قۇرمەت ءبىلدىرۋدىڭ ءبىر ءتاسىلى, ال گەورگينا يەسىنە تابىس تىلەگەن نيەتتى جەتكىزەدى. ميموزا كوبىنە «كوڭىلىم سەندە, ساعىنىشىم بار» دەگەندى اڭعارتسا, العاشقى ماحابباتقا مامىرگۇل (سيرەن) سىيلاۋ نازىك سەزىمدى ادەپپەن ءبىلدىرۋدىڭ بەلگىسى رەتىندە ايتىلادى. لالاگۇل – ىنتىزار ىقىلاستىڭ ەلشىسى, ال شەگىرگۇل (فيالكا) قىزىل راۋشانمەن بىرگە ۇسىنىلسا, «ساعان ءتانتىمىن» دەگەندى ءسوزسىز-اق ۇقتىرادى. ال كوكتەمنىڭ جارشىسى قىزعالداق جاسقا قاراماي – ەڭ جاقىن, ەڭ سۇيىكتى جاندارعا ارنالعان گۇل. اناڭىزدى, جارىڭىزدى, جاقىن-جۋىعىڭىزدى, قىزىڭىزدى قۋانتقىڭىز كەلسە, وسى ماعىنالاردى بىلە جۇرگەن ابزال.
