جازاتايىم وقيعالار جيىلەپ تۇر

2023–2025 جىلدارى ءوڭىر كاسىپورىندارىندا 313 جازاتايىم وقيعا تىركەلگەن. سالدارىنان 336 ادام زارداپ شەككەن. مەملەكەتتىك ەڭبەك ينسپەكتسياسى كوميتەتى پاۆلودار وبلىسى بويىنشا دەپارتامەنتىنىڭ مالىمەتىنشە, ءوڭىر كاسىپورىندارى مەن ۇيىمدارىندا 2025 جىلى 104 جازاتايىم وقيعا تىركەلىپ, ولاردىڭ سالدارىنان 113 ادام زارداپ شەككەن. ونىڭ ىشىندە 66 ادام اۋىر جاراقات الىپ, 7 ادام ءولىمى تىركەلگەن.

«2024 جىلى 103 جازاتايىم وقيعا تىركەلىپ, 112 ادام زارداپ شەككەندىگى انىقتالعان. 78 ادام اۋىر جاراقاتتانىپ, 9 ادام كوز جۇمعان. ال 2023 جىلى تىركەلگەن 106 جازاتايىم وقيعادان 111 ادام زارداپ شەككەن (ونىڭ 65-ءى اۋىر جاراقات العان). ءتورت وقيعا ادام ولىمىمەن اياقتالعان. زارداپ شەككەندەردىڭ باسىم بولىگى تاۋ-كەن – مەتاللۋرگيا سالاسىندا, بيۋدجەتتىك ۇيىمداردا, شاعىن بيزنەس سۋبەكتىلەرىندە, قۇرىلىس سالاسىندا تىركەلگەن. وندىرىستىك وقيعالاردىڭ نەگىزگى سەبەبى – جۇمىستىڭ قاناعاتسىزداندىرارلىق دەڭگەيدە ۇيىمداستىرىلۋى, زارداپ شەگۋشىنىڭ ابايسىزدىعى, ەڭبەك قورعاۋ مەن قاۋىپسىزدىك تالاپتارىنىڭ بۇزىلۋى», دەيدى دەپارتامەنت باسشىسىنىڭ مىندەتىن اتقارۋشى ابىلاي سابىروۆ.

جازاتايىم وقيعالاردا ەڭ ءجيى كەزدە­سەتىنى – ادامداردىڭ بيىكتەن قۇلاۋى, قوزعال­مالى, كوكتە قالىقتاپ جۇرەتىن, اينالمالى زاتتار مەن بولشەكتەردىڭ اسەرى. وتكەن جىلعى ستاتيستيكالىق دەرەكتەرگە ۇڭىلسەك, كاسىپورىندار اراسىندا ەڭ كوپ جاراقاتتانعان جۇمىسكەرلەر «قازحروم» تۇق» اق فيليالى – اقسۋ فەرروقورىتپا زاۋىتىنا تيەسىلى – 10 ادام. سونداي-اق «ەۋرازيا ەنەرگەتيكالىق كورپوراتسياسى» اق فيليالى – «شىعىس» كەنىشىندە – 6 ادام, «ستەكلومير KZ» جشس – 4 ادام, «بوگاتىر كومىر» جشس – 5 ادام, «پرومماشكومپلەكت» جشس – 3 ادام, «R.W.S. Concrete» جشس – 2 ادام, «پەتك» اق – 2 ادام, «سمارت اۆتوبۋس پۆ» جشس – 4 ادام, «قازاقستان ءاليۋمينيى» اق فيليالى ەلەكتر ستانساسىندا 2 ادام وندىرىستىك جاراقات العان. ال 2025 جىلى ولىمگە اكەلگەن جازاتايىم وقيعالار «بوگاتىر كومىر» جشس-دا تىركەلىپتى – 2 ادام قازا تاپقان. سونداي-اق «ستروي-ديزاين PV» جشس, «قاجسەرۆيس» جشس, «قازحروم» تۇق» اق فيليالى – اقسۋ فەرروقورىتپا زاۋىتى, «مك ەۆرازيا-اگرو» جشس مەن «گامما سارىكول» جشس-نىڭ ارقايسىندا كىسى ولىمىمەن اياقتالعان ءبىر جازاتايىم وقيعادان تىركەلگەن.

كەيىنگى جىلدارى تىركەلگەن ەڭ قايعىلى وقيعالاردىڭ ءبىرى – 2024 جىلدىڭ قاڭتار ايىندا مايقايىڭ التىن كەنىشىندە اۆتوبۋسپەن قۇردىمعا ءتۇسىپ قازا تاپقان 4 قۇتقارۋشىنىڭ ءولىمى. قۇتقارۋشىلار «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس پف مەكەمەسىندە ەڭبەك ەتكەن ەدى.

«وكىنىشكە قاراي, وندىرىستىك جازاتايىم وقيعالاردان زارداپ شەككەن ادامداردىڭ جۇمىس بەرۋشىدەن كەلتىرىلگەن ماتەريالدىق زياندى وتەۋ نورماسى ەڭبەك زاڭناماسىندا قاراستىرىلماعان. وسى سەبەپتى زارداپ شەككەندەر ازاماتتىق سوتقا ءوز بەتتەرىمەن جۇگىنەدى. ال قىلمىستىق ىستەر بويىنشا مەملەكەتتىك ەڭبەك ينسپەكتسياسىنىڭ ماتەريالدارى تەرگەۋ­لەر اياقتالعاننان كەيىن اۋماقتىق پوليتسيا ورگاندارىنا جولدانادى», – دەپ قوستى دەپارتامەنت وكىلى.

ەلىمىزدە 2024–2030 جىلدارعا ارنالعان «ەڭبەك قاۋىپسىزدىگى» تۇجىرىمداماسىن ىسكە اسىرۋ بويىنشا جۇمىس جۇرگىزىلىپ جاتىر. بۇل قۇجات ەڭبەك قاۋىپسىزدىگى سالاسىندا جۇمىس بەرۋشىلەرگە قويىلاتىن تالاپتاردى وڭتايلاندىرۋعا باعىتتالعان شارالار كەشەنىن قامتيدى. ماقساتى – وندىرىستىك جاراقاتتانۋشىلىقتى تومەندەتۋ جانە ءتيىستى مەملەكەتتىك باقىلاۋدى قامتاماسىز ەتۋ.

دەپارتامەنت باسشىسى وڭىردە وندى­رىستىك وقيعالاردىڭ الدىن الۋ جانە كاسىبي اۋرۋلاردىڭ پروفيلاكتيكاسى بويىنشا قابىلداناتىن شارالار اياسىندا 33 كاسىپ­ورىندا «نولدىك جاراقاتتانۋشىلىق – Vision Zero» تۇجىرىمداماسى, 22 ەڭبەك ۇيىمىندا «حالىقتىق باقىلاۋ» جوباسى ەنگىزىلگەنىن اتاپ ءوتتى. بۇل كاسىپورىنداعى ەڭبەك قاۋىپسىزدىگىن تىكەلەي باقىلاۋعا مۇمكىندىك بەرىپ وتىر. ءوڭىر كاسىپورىندارىندا 881 وندىرىستىك كەڭەس جۇمىس ىستەيدى, ولاردىڭ مىندەتىنە وندىرىستىك جاراقاتتانۋشىلىقتى بولدىرماۋ جانە جۇمىس ورىندارىنداعى ەڭبەك جاعدايلارىن تەكسەرۋدى ۇيىمداستىرۋ كىرەدى.

پاۆلودار وبلىسى