سۋرەتتەردى تۇسىرگەن – اۆتور
كورمە ەكسپوزيتسياسىنا ۇلتتىق ورتالىق مۋزەي قورىمەن قاتار ارقالىق قالاسىنداعى «دالا ولكەسى تاريحى» مۋزەيى, ىقىلاس اتىنداعى مۋزىكالىق اسپاپتار مۋزەيى قورلارىنان الىنعان بىرەگەي جادىگەرلەر قويىلىپ, تاريح پەن مادەنيەتتىڭ تەرەڭ تامىرىن ايعاقتايتىن قۇندى بۇيىمدار ارقىلى قايراتكەردىڭ ەل رۋحانياتىنا سىڭىرگەن ەڭبەگى جان-جاقتى تانىستىرىلدى.
كونفەرەنتسيانىڭ باستى ماقساتى – وزبەكالى جانىبەكوۆتىڭ ءومىر جولى مەن قوعامدىق قىزمەتىن, ۇلتتىق مادەنيەتتى جاڭعىرتۋداعى تاريحي ءرولىن, تاريحي-مادەني مۇرانى ساقتاۋ باعىتىنداعى سۇبەلى ەڭبەكتەرىن عىلىمي تۇرعىدان زەردەلەۋ. سونىمەن قاتار ونىڭ تۇلعالىق فەنومەنىن قازىرگى ۇلتتىق سانا كونتەكسىندە تالداپ, وسكەلەڭ ۇرپاققا ونەگە ەتۋ كوزدەلدى.
«قازاق رۋحانياتىنىڭ جاڭعىرۋ جولىندا وزبەكالى جانىبەكوۆ ەسىمى ايرىقشا قۇرمەتپەن اتالادى. ول ۇلتتىق قۇندىلىقتاردى جۇيەلى تۇردە زەرتتەپ, ەتنوگرافيا, مۋزەي ءىسى, تاريحي مۇرانى قالپىنا كەلتىرۋ باعىتتارىنا تىڭ سەرپىن بەردى. ونىڭ باستاماسىمەن كوپتەگەن تاريحي-مادەني ەسكەرتكىش قايتا جاڭعىرتىلىپ, وڭىرلىك مۋزەيلەردىڭ جۇمىسى جانداندى. ۇلتتىق تاريحتى زەرتتەۋ مەن ناسيحاتتاۋ ءىسى جاڭا دەڭگەيگە كوتەرىلدى. بۇگىندە ۇلتتىق بىرەگەيلىك پەن تاريحي جادتى ساقتاۋ – ۋاقىت تالابى. وسى ورايدا كونفەرەنتسيا عالىمدار, مادەنيەتتانۋشىلار, مۋزەي قىزمەتكەرلەرى مەن جاس زەرتتەۋشىلەر ءۇشىن پىكىر الماسۋ الاڭىنا اينالىپ وتىر. جاس بۋىننىڭ عىلىمي ىزدەنىستەرىن قولداۋ – رۋحاني ساباقتاستىقتىڭ كەپىلى. ۇلتتىق مۇرانى ۇلىقتاۋ ارقىلى ءبىز تاريحي سانانى جاڭعىرتىپ, بولاشاققا نىق قادام باسامىز», دەيدى ۇلتتىق ورتالىق مۋزەيىنىڭ ديرەكتورى سەرجان ساروۆ.
وزبەكالى جانىبەكوۆ ءداستۇرلى قولونەردى, ۇلتتىق كيىم ۇلگىلەرىن, مۋزىكالىق اسپاپتاردى زەرتتەپ, كەڭىنەن دارىپتەۋگە ايرىقشا كوڭىل ءبولدى. ونىڭ تىكەلەي ىقپالىمەن قاسيەتتى تايقازان ەلگە قايتارىلىپ, تاريحي ادىلەتتىلىك قالپىنا كەلتىرىلدى. سونداي-اق ول ناۋرىز مەرەكەسىنىڭ قايتا جاڭعىرۋىنا ۇيىتقى بولىپ, حالىقتىڭ رۋحاني ساناسىنىڭ جاڭارۋىنا زور ۇلەس قوستى.
كورمەگە قايراتكەردىڭ سان قىرلى قىزمەتىن ايعاقتايتىن قۇندى ەكسپوناتتار قويىل-عان. ولاردىڭ قاتارىندا ءو.جانىبەكوۆتىڭ ۇلتتىق مۋزەي قورىنا ءوزى تاپسىرعان قاجىمۇقان مۇڭايتپاس- ۇلىنا تيەسىلى تىماق, جارى قاليحان اپامىز تابىستاعان دومبىرا, ۇستەل ۇستىندەگى كىتاپ پىشىندەس ساعات, ىقىلاس مۋزەيى قورىنداعى تاقياسى مەن شاپانى, داۋىلپاز اسپابى بار. سونىمەن بىرگە ارقالىقتاعى مۋزەي ەكسپوزيتسياسىن جاساقتاۋ بارىسىندا جيناقتالعان استاۋ, ساۋكەلە, قولتاڭباسى قويىلعان «ۋاقىت كەرۋەنى» كىتابى, «شەرتەر» ءانسامبلىنىڭ افيشاسى, ۇلتتىق كيىم ۇلگىلەرىنىڭ ەسكيزدەرى دە جۇرت نازارىنا ۇسىنىلعان.
تاعىلىمدى شارادا حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا, اقىن ادىلعازى قايىربەكوۆ, سۋرەتشى-رەستاۆراتور قىرىم التىنبەكوۆ, ارقالىقتاعى «دالا ولكەسى تاريحى» مۋزەيىنىڭ ديرەكتورى راۋان تەرەك, تاعى باسقالار بايانداما جاساپ, وزبەكالى الەمى – ۇلتتىق مۇرانى ۇلىقتاۋدىڭ, تاريحي سانانى جاڭعىرتۋدىڭ جارقىن جولى ەكەنىن ايتتى.
الماتى
