اتى اڭىزعا اينالعان

ايتبەك مۇساەۆتىڭ ەڭبەك ەرلىگى – ەلگە مۇرا ول كىسى تۋرالى وتىرار اۋدانى مەن وڭتۇستىك وڭىرىندە عانا ەمەس, بۇكىل بايتاعىڭىزدىڭ ءبىرتالاي جەرىندە جاقسى اڭگىمەلەر ايتاتىن اعا بۋىن وكىلدەرى بارشىلىق. «اي, اينالايىن ايتبەك-اي!» – دەسەتىندەر كوپ. ايتبەك مۇساەۆ. ول وتىرار اۋدانىنداعى بۇرىنعى قاراقوڭىر, قازىرگى ءشامشى اۋىلىندا تۋىپ-وسكەن. وتكەن عاسىرىڭىزدىڭ ەلۋىنشى جىلدارى ورتاسىنان اۋا ورتا مەكتەپتى ءبىتىرىپ, وقۋعا اتتانعان. تۇسە الماي, تۇنجىراپ قايتقان. قاراقوڭىرعا. ءشامشى اۋىلىنا. بۇل جاعداي حاقىندا بۇكىل وداعىڭىزعا بەلگىلى «تەمىر» كەڭشارىنىڭ كەمەل باسشىسى, داڭقتى ديرەكتورى بولعان, سوتسياليستىك ەڭبەك ەرى اتانعان شەرىم ەرمانوۆتىڭ «ماڭگى جاستىق» اتتى كىتابىندا بىلاي بايان ەتىلەدى: «جۇرتتىڭ بالالارى وقۋعا تۇسۋگە ارەكەت جاساپ جاتقاندا سەنىڭ قايتىپ كەلگەنىڭ قالاي؟ ولار ءالى-اق ءبىرى دارىگەر, ءبىرى مۇعالىم, ءبىرى ينجەنەر بولىپ شىعا كەلەدى. سەن بولساڭ كەجەگە تامىرىڭ كەيىن, اۋىلعا قاراي تارتادى!» – دەپ رەنجيدى اناسى قىزجان. «ون جىل وقىپ, ەندى قوي باق!» – باعانادان بەرى تىم-تىرىس وتىرعان اكەنىڭ دە ءسوزى وسى بولدى. مارحابات بايعۇت. – باقساق, باعامىز دا! ەڭبەك ەتىپ ءجۇرىپ تە وقىپ, ءبىلىم الامىن! – دەپ جاس قىرانشا شاڭق ەتە قالعان ايتبەك سول قۇلشىنعان قايراتىنان قايتپادى. قايسارلىق تانىتپاقتان تانباعان. ەلۋ التىنشى جىلدىڭ جازىندا شوپان تاياعىن قولعا العان ايتبەك مۇساەۆ بىرەر جىلدا ەرەن ەڭبەكتىڭ ونەگەسىن وزگەشە كورسەتىپ, كەڭشار كورسەتكىشىن جاستىق جالىنىمەن ءبىراز بيىكتەتىپ ۇلگەرگەن. ايتبەكپەن بىرگە حاليلا, دامەلى, تۇرسىنباي,  تۇراربەك سياقتى ءبىرتالاي جاستار بىلەك ءتۇرىپ, بەلسەنىپ شىققان. ولار تەك تاياق الىپ, قوي سوڭىندا سالپاقتاعان جوق. جاڭاشا ەڭبەكتەندى. ءبارى دە قويدا ءجۇرىپ-اق تراكتورشى, شوفەر, بونيتەر جانە قويدى قولدان ۇرىقتاندىرۋشى ماماندىقتارىن تەز مەڭگەرىپ, جىلدام يگەردى. قورا قۇرىلىسى, جەمشوپتى وڭدەۋ, قۇنارلاندىرۋ جۇمىستارىن دا وزدەرى اتقاراتىنعا اينالدى. اناسى قىزجان مەن اكەسى مۇسا قوسارلانا قاتتى اشۋلانعاندا, ءوزى وقۋعا تۇسە الماستان «قۇلاپ» قايتقاندا ايتقان سوزدەرىن ءبىر ءسات تە ەستەن شىعارماعان ايتبەك جامبىلداعى زووتەحنيكالىق-مالدارىگەرلىك تەحنيكۋمىن سىرتتاي ءبىتىرىپ الدى. سول ايتبەك مۇساەۆىڭىزدىڭ باستاماسىمەن «تەمىر» كەڭشارىندا بۇكىل رەسپۋبليكا بويىنشا العاش رەت كومسومول-جاستاردىڭ ىرىلەندىرىلگەن شوپاندار بريگاداسى قۇرىلدى. 1963 جىلى وسى ىرىلەندىرىلگەن شوپاندار بريگاداسى ءار ءجۇز ساۋلىقتان 150 قوزىدان الدى. ءاربىر قاراكول قويىنان 3,4 كەلىدەن ءجۇن قىرىقتى. كەلەسى جىلى بۇل كورسەتكىشتەر 160 قوزىعا, 3,6 كەلىگە كوتەرىلگەن. مەملەكەتكە وتكىزىلگەن قاراكول ەلتىرىسىنىڭ 86 پايىزى ءبىرىنشى سۇرىپپەن قابىلداندى. شوپاندار بريگاداسىندا جاستار قالاشىعى پايدا بولدى. ىرىسكۇل شوراەۆا قوعامدىق نەگىزدە كىتاپحانا جۇمىسىن جۇرگىزدى. ايتبەكتىڭ باستاماسىمەن سول كىتاپحانادا گازەت-جۋرنالدارعا شىققان نەبىر قىزىقتى ماقالالار قىزۋ تالقىلانىپ, قازاق قالامگەرلەرىنىڭ جاڭا اڭگىمەلەرى مەن پوۆەستەرى, روماندارى تۋرالى پاراساتتى پىكىرتالاستار ءوربۋشى ەدى-اۋ... سول ايتبەگىڭىزدىڭ اتاق-داڭقى وبلىس پەن رەسپۋبليكانى ايتپاعاندا, سول كەزدەگى سى-سى-سىرىڭىزعا تاراپ كەتتى. شوپاندىق شەبەرلىگى, مايتالمان مامان رەتىندەگى جاڭاشىلدىعى, ىزگى ىزدەنىستەرى, تاجىريبەسى تۋرالى  «وڭتۇستىك قازاقستان», «سوتسياليستىك قازاقستان» گازەتتەرى عانا ەمەس, ماسكەۋدەن مانىستەلەر باسىلىمدار دا جازىپ جاتتى. ال, الاش جاستارىنىڭ ايتۋلى باسىلىمىنا, سۇيىكتى گازەتىنە اينالعان سول كەزدەگى «لەنينشىل جاستا» ايتبەك مۇساەۆ باس كەيىپكەر بولاتىن. وسىلايشا, ايتبەك مۇساەۆىڭىز جيىرما جەتى جاسىندا سول زامانداعى ەڭ جوعارى ناگرادا, ەڭ ءبىرىنشى وردەن – لەنين وردەنىن ومىراۋىنا تاققان. وسىلايشا, ول جىل سايىن نەبىر-نەبىر ناگرادالار الاتىن. «ەڭبەكتەگى ەرلىگى ءۇشىن» سياقتى تولىپ جاتقان مەدالدار. حشجك (ۆدنح) التىن, كۇمىس جانە قولا مەدالدارى. رەسپۋبليكالىق, وداقتىق جوعارى ورگانداردىڭ قۇرمەت گراموتالارى... وسىلايشا, وتىرارلىق ايتبەك مۇساەۆتىڭ اتى-ءجونى زىليقا تامشىباەۆا, كامشات دونەنباەۆا, جادىرا تاسپامبەتوۆا, ساقان داۋلەتقاليەۆ, سەرىك تالمۇرزين, جانسۇلتان دەمەەۆ, ميحيل دوۆجيك, ساعات ساكەنوۆا سىندى ساڭلاقتارمەن قاتار اتالاتىنعا اينالعان. قازاقتىڭ رۋح ساردارلارى ساناتىندا سانالاتىن وزبەكالى جانىبەكوۆ ءوزىنىڭ «تاعدىر تاعىلىمى» كىتابىندا: «سىزدەردى تۇسىنسەم بۇيىرماسىن. ەندى عانا شيىرشىق اتىپ كەلە جاتقان گۇلدى جۇلۋعا بولا ما؟ بولىمشە باسقاراتىندار ونسىز دا بارشىلىق. ال ىرىلەندىرىلگەن, مەحانيكالاندىرىلعان كومسومول-جاستار شوپاندار بريگاداسىنا بىلىكتى جەتەكشىنى قايدان الماقسىزدار؟ ايتبەك بولسا كومسومولدىڭ ورتالىق كوميتەتىنىڭ مۇشەسى. ونى باسقا قىزمەتكە اۋىستىراردا بىزبەن الدىن الا كەلىسىپ الۋ كەرەك ەمەس پە؟» – دەپ, وتىرارداعى «تەمىر» كەڭشارىنىڭ باسشىلارىنا قاتتى رەنجىگەنىن جازادى. مۇساەۆتىڭ دا بريگادا جەتەكشىلىگىنەن كەتكىسى كەلمەگەنى كەيىن انىقتالعان. «اتاقتى بريگاديرىڭىز ايتبەك سوتسياليستىك ەڭبەك ەرى, كەڭشار ديرەكتورى  شەرىم ەرمانوۆتىڭ ەگدەلىگىن, ۇلكەندىگىن قۇرمەت تۇتىپ قارسىلىق تانىتپاعان عوي», – دەيدى زەينەتكەر بازارباي مومبەك ۇلى. «تاعدىر ايداپ, 1988 جىلى تورعاي وبلىسى تاراعان سوڭ مەن قكپ ورتالىق كوميتەتىنىڭ جولداماسىمەن شىمكەنت وبلىستىق پارتيا كوميتەتىنىڭ قاراماعىنا جىبەرىلدىم. قىزىلقۇم اۋداندىق پارتيا كوميتەتىنىڭ ءبىرىنشى حاتشىلىعىنا سايلاندىم. كەيىن اۋداننىڭ اتىن حالىق تىلەگىمەن وتىرار دەپ وزگەرتتىك قوي, – دەيدى مۇحامبەتقاسىم شاكەنوۆ. – شىلدە ايى ەدى. ەشكىمدى تانىمايتىن, جاڭا اۋدانعا باسشى بولماق وڭاي ەمەس. اكەمنىڭ بالا كەزىمىزدە: «ارۋاعىڭنان اينالايىن ارىستانباب, ءوزىڭ جار بولا گور» دەيتىنى جادىمدا. ءشامشى قالداياقوۆتىڭ, مۇحتار شاحانوۆتىڭ, تاۋشەن ءابۋوۆا مەن اسەلحاننىڭ, ارينە, اتى اڭىزعا اينالعان ايتبەك مۇساەۆتىڭ اتتارىن ىشىمنەن ايتىپ, كۇبىرلەيمىن... ايتبەك اعامىزبەن تەز ارادا تانىستىم. ول كىسى باس زووتەحنيك ەكەن. مونعوليانىڭ باتىرى اتاعىن دا الىپتى... كەيىن ايتەكەڭ «تەمىر» كەڭشارىن باسقاردى. وتپەلى كەزەڭنىڭ اۋىرتپالىعىن قايران ەر قايىسپاي كوتەردى. زەينەتكەرلىككە شىققاننان كەيىن دە ابزال ازامات, ابىز اعا, قايراتكەر بولا ءبىلدى. قازىنا قارياعا اينالدى. وكىنىشكە قاراي, ورتامىزدان ويلاماعان تۇستا, ەرتەرەك كەتتى...». قازەكەڭ: «تەكسىزدىكتەن, كورگەنسىزدىكتەن ساقتاعاي»دەگەندى جيىرەك ايتادى. مۇ­حام­بەت­قا­سىم مىرزا شەرتكەن سىردا شىنايىلىق جاتىر. اتاقتى ايتبەك مۇساەۆ ناعىز تەكتى­لەر تۇرپاتىنان, كورگەندىلەر قاتارىنان-تۇعىن. وتى­راردايىن تاريحي تاعىلىمى قۇنار­لى, قۇي­قا­لى توپىراقتا تۋىپ-وسكەن. ەڭ الدىمەن, ەڭبەك كيەسىن ەرتە ۇعىنعان ەدى. جاستايى­­نان-اق كوپ وقىعان, كوپ توقىعان تۇلعا بولىپ قالىپتاستى. شامشىدەيىن ءان اۋليەسى­نىڭ اۋەنىمەن تەربەلىپ, جان-جۇرەگىنە سەزىمتال­دىق دارىتتى. ىلعي دا جاقسىلىق پەن جايساڭ­دىقتىڭ, ادالدىق پەن ادىلدىكتىڭ جاعىنان تابىلا ءبىلدى. اتاقتىڭ بۋىنا الدانبادى. ماداقتىڭ داقپىرتىن مال­دانبادى. جاعىمپازدىقتان اۋلاق بولدى. «مەن «تەمىر» كەڭشارىندا كومسومول كوميتەتىنىڭ جەتەكشىسى ەدىم. ءومىر جولىمدا دا, ەڭبەك جولىمدا دا ايتەكەڭە قايران قالىپ, تاڭدانۋمەن بولدىم. الىستاعى اۋىلدا, مال شارۋاشىلىعىندا ءجۇرىپ-اق ەلباسىمىزدان باستاپ, وزبەكالى جانىبەكوۆ سىندى باسشىلارمەن سىيلاس, سىرلاس بولعانى, ۇلكەنمەن دە, كىشىمەن دە ءتىل تابىسىپ, ءوزىن دە سىيلاتا بىلەتىن قاسيەتى قىمبات ەدى», – دەيدى ساپاربەك مۇقانوۆ. وتىراردايىن كيەلى توپىراق, «تەمىر» كەڭشارى, وسى ايماعىڭىزدىڭ ادامدارى, ايتبەك تۋرالى كەمەڭگەر سۋرەتكەرىڭىز مۇحتار اۋەزوۆ تە جازعان. الىپ جازۋشىڭىز وسى ءوڭىردى اسىقپاي ارالاعان. ايتبەكتەيىن سەزىمتالداردىڭ كورگەندىلىگىن كوركەيتكەن كوپتەگەن كوركەم ويلىلار وتىرارىڭىزعا تالاي-تالاي كەلگەن. ايتبەك مۇساەۆتىڭ ءوزى دە تالاي ەلدەردى, شاھارلاردى ارالاعان. ءومىرىنىڭ سوڭعى جىلىندا «قازىعۇرت kz» جۋرنالىندا ايتبەك اعامىزدىڭ «قازىعۇرت قىرانى» دەيتىن دۇنيەسىن جاريالاپ ەدىك. بۇل ەرەكشەلەۋ ەسسەلىك تۋىندى نەگىزىنەن قالاۋبەك تۇرسىنقۇلوۆقا ارنالعانىمەن, وزبەكالى جانىبەكوۆ تۋرالى دا وزگەشەلەۋ تولعانىسقا  قۇرىلعان. «راحمەت, اينالايىن. تەز جاريا­لاپ جىبەرىپسىڭدەر», – دەگەن ەدى ايتەكەڭ اقجارىلقاپ كۇلكىسىمەن اقتارىلا ك ۇلىپ. ادەمى دە ادەپتى ءھام اسەرلى جازىلعان ەكەن. شىن جۇرەكتەن شىققان, شىنايى شەرتىلگەن سىر. «ويدا جوق جەردە ناعيما جەڭگەيمەن كەزدەستىم. «سىرلى اياقتىڭ سىرى كەتسە دە, سىنى كەتپەيدى» دەگەن قۇپ راس ەكەن. ومىرلىك جارى, جازۋشى ءھام قوعام قايراتكەرى قالاۋبەك تۇرسىنقۇلوۆتىڭ تالاي رەت ۇيىندە بولعانىمىزدا قاباق شىتپاي, اشىق-جارقىن قارسى الىپ, ءاپ-ساتتە داستارقانىن جايناتىپ قوياتىن سىرباز جەڭگەمىز سىمباتىن ءالى جوعالتا قويماپتى», – دەپ باستالادى الگى ەسسە. ايتبەك اعامىز قالاۋبەك كوكەمىزبەن 1961 جىلى قازاقستان كومسومولى ورتالىق كوميتەتىنىڭ پلەنۋمىندا تانىسىپتى. قالەكەڭمەن  تانىستىرعان شىمكەنت وبلىستىق كومسومول كوميتەتىنىڭ ءبىرىنشى حاتشىسى وزبەكالى جانىبەكوۆ ەكەن. «قايران وزەكەڭ جانىپ تۇرعان جالىن ەدى عوي... ال قالەكەڭ ءۇشىنشى حاتشى ەكەن. سول كۇنى قالەكەڭ پلەنۋم دەلەگاتتارىن مەيمانحاناعا ورنالاستىرىپ, قالانى ارالاتتى. ەرتەسىنە پلەنۋم اشىلىپ, قازاقستان لكسم وك ءبىرىنشى حاتشىسى قوساي ەگىزباەۆ بايانداما جاسادى... قىزىلدىڭ قۇمىندا كومسومول-جاستار بريگاداسىن قۇرىپ, ەكپىندى مايدان – مال شارۋاشىلىعىن وركەندەتكەن ازاماتتاردىڭ  ءبىرى ايتبەك مۇساەۆ ورتامىزدا وتىر دەپ مەنىڭ ەسىمىمدى اتادى», – دەپ جازادى اۆتورىمىز. سول جيىندا وزبەكالى جانىبەكوۆ تە ايتبەك مۇساەۆتىڭ جاس شوپاندار بريگاداسىنىڭ وزىق تاجىريبەسىنە تالداۋ جاساپ, ابىرويىن اسقاقتاتا ءتۇسىپتى. پلەنۋم سوڭىنان وزەكەڭ مەن قالەكەڭ جاس شوپاندار جەتەكشىسىن ءبىرىنشى حاتشىعا كىرگىزىپ, تانىستىرادى. اڭگىمە ەركىن ءوربيدى. قوساي ەگىزباەۆ: «ءبارى دۇرىس قوي, بىراق نەگە وقىماي ءجۇرسىڭ؟» – دەيدى دە, مۇساەۆتىڭ جاۋابىن كۇتپەستەن, دەرەۋ الماتى زووتەحنيكالىق-مالدارىگەرلىك ينستيتۋتىنىڭ رەكتورىنا قوڭىراۋ شالىپ: «بۇل ازامات سىرتتاي وقيتىن بولسىن» دەپ تاپسىرما بەرەدى. «ءسويتىپ, 1965 جىلى وقۋعا ءتۇسىپ, 1970 جىلى جوعارى ءبىلىمدى مامان بولىپ شىقتىم. جاي شوپاندىقتان فەرما مەڭگەرۋشىلىگىنە, ودان شارۋاشىلىق ديرەكتورى, كەيىن اۋىل اكىمى قىزمەتتەرىن ابىرويمەن اتقاردىم دەپ ويلايمىن», – دەپ جازادى ايتەكەڭ. وزبەكالى جانىبەكوۆ كوپ ۇزاماي-اق قازاقستان كومسومولىن باسقارادى. قالاۋبەك تۇرسىنقۇلوۆ وبكومولدىڭ ءبىرىنشى حاتشىلىعىنا سايلانادى. «ەستەن كەتپەيتىن ءبىر ءساتىم – وزەكەڭ مەن قالەكەڭنىڭ ارقاسىندا مەن لكسم سەزىندە قازاقستان كومسومولىنىڭ تۋىن زالعا الىپ كەلۋ قۇرمەتىنە يە بولدىم. سوندا قاسىمداعى ارىپتەسىم كىم ەدى دەسەڭىزشى؟! ول – سول كەزدەگى تەمىرتاۋلىق جۇمىسشى, دومناشى, بۇگىنگى پرەزيدەنتىمىز, مەملەكەت باسشىسى نۇرسۇلتان نازارباەۆ ەدى. كەيدە نۇرەكەڭدى تەلەديداردان كورگەن كەزدە ەكەۋمىزدىڭ العاش قازاقستان كومسومولىنىڭ تۋىن الىپ كەلە جاتقان ءساتىمىز, ونىڭ سەزد مىنبەرىندە ساڭقىلداپ سويلەپ تۇرعان كەزى كوز الدىما كەلەدى», – دەپ سىر اقتارادى ايتبەك اعامىز جوعارىدا اتالعان جازباسىندا. وسى ماقالاسىندا, دالىرەك دىتتەسەك, اسەرلى ەسسەلىك دۇنيەسىندە ايتەكەڭ قازىعۇرت تاۋى تۋرالى, ونىڭ قىرانى ءھام قۇنارى اتانعان قالامگەر-قايراتكەر قالاۋبەك تۇرسىنقۇلوۆ تۋرالى تەرەڭ تولعانادى. كەشەگى كەڭەستىك داۋىردە قاراتاس, لەنين دەپ اتالعان اۋدانعا تاريحي, قاسيەتتى قازىعۇرت اتاۋىن قايتارۋعا دا قاجىرلى قايرات جۇمساعان قالەكەڭ ەكەنىن ەرەكشەلەپتى. بۇل تىرلىك ايتۋعا عانا وڭاي, ارينە. ايتپەسە, ول ۋاقىتتا كەدەرگىلەر مەن قيىندىقتار قات-قابات قاسارىساتىن. قازىعۇرت تاۋى, قازىعۇرت اتاۋىنىڭ سىرى, باسىندا كەمە قالعاندىعىنىڭ اقيقاتتىعى حاقىندا دا تۇرسىنقۇلوۆ تاعىلىمى قىمبات ەكەنىن مۇساەۆىڭىز تۇلعالىق تەبىرەنىسپەن دايەكتەگەن. ايتبەك مۇساەۆ تۋرالى سارعايعان گازەتتەر مەن جۋرنالدار قيىندىلارىن, ءارتۇرلى اۆتورلار ادىپتەگەن كىتاپتاردى قاراپ, وقىپ وتىرساڭىز, ەڭ الدىمەن, ەڭبەك ادامى دەگەن ۇعىم بۇكىل جان-دۇنيەڭىزدى باۋراپ الادى. ساناڭىزعا ساۋلە سەبەلەي سەبەزگىلەر. ەستەلىك ايتۋشىلاردىڭ, وچەركتەر, ماقالالار, تولعامدار, ولەڭدەر ورنەكتەۋشىلەردىڭ ءبارى ايتبەك مۇساەۆتىڭ ەڭبەكتەگى ەرلىگىن, ءوزىنىڭ اۋىلىن, وتىرار ءوازيسىن, تۋعان ولكەسىن, قازاق ەلىن سونشالىقتى بەرىلە سۇيگەنىن سۇيسىنە ­باياندايدى. ايتەكەڭنىڭ ءوزى دە اۋىزەكى اڭگىمەگە, اشىق سىرلاسۋعا, ساليقالى سۇحباتقا اسا ىقىلاستى-تۇعىن. جازۋعا ءھام وزگەشە يكەمدىلىگىن كەيىنىرەك, كەشىرەك اڭعارىپپىز. «قازىعۇرت قىرانىنداعى» سوڭعى سويلەمدەرىن وقىپ كورىڭىزشى: «اڭگىمەنىڭ سوڭىندا مىنا ءبىر ۇمىتىلماس ءجايتتى ايتا كەتەيىن. الپىسىنشى جىلدارى, ءالى ەسىمدە, بىردە شىمكەنتتەگى «گۇلجان» دۇكەنىنىڭ جانىندا ۇلى سازگەر, جەرلەسىم ءشامشى قالداياقوۆپەن كەزدەسىپ قالدىم. امان-ساۋلىقتان سوڭ شاكەڭ: – ايتبەك, سەن مەنىمەن بىرگە ءجۇر. بۇل ۇيدە قالاۋبەك تۇرادى, ول مەنى قوناققا شاقىرىپ ەدى, – دەدى. – مەنىڭ بارۋىم ارتىق ەمەس پە؟ –  جوق, قالاۋبەك ەستىپ قالسا, رەنجيدى. ماعان وكپەلەيدى, نەگە ەرتىپ كەلمەدىڭ دەپ. مەن ءۇنسىز كەلىستىم. ءۇيدىڭ كىربەرىسىندە قالەكەڭ زايىبى ناعيما ەكەۋى جىلى جۇزبەن قۋانا قارسى الدى. مەن مۇندا ءبىرىنشى رەت كەلۋىم. قابىرعاداعى سورەلەر كىتاپقا سىرەسىپ تۇر. داستارقان دا دايىن ەكەن. قالەكەڭ مەن شاكەڭ ءبىر-ءبىرىن ساعىنىپ قالعان ەكەن, ءازىل اڭگىمەلەر, انەكدوتتار اعىلدى. ماعان ناعيما جەڭگەمىز اققۋدىڭ كوگىلدىرىندەي بولىپ كورىندى. اس ءمازىرى دە, كىسى كۇتۋى دە, كيىم كيىسى مەن ءجۇرىس-تۇرىسى دا, ءسانى دە, ەر-ازاماتتىڭ ءمانى دە – ءبارى ايەلگە بايلانىستى ەكەن-اۋ دەگەن وي ءتۇيدىم. مىنە, ارادا جارتى عاسىردان استام ۋاقىت ءوتتى. ناعيما جەڭگەي سىرىن دا, سىنىن دا, سىمباتىن دا جوعالتپاي, نەمەرە-شوبەرە ءسۇيىپ, ادەمى اجە اتانىپتى. مەن سوعان قۋاندىم». ايتەكەڭ تولعانىسىن تولىعىراق, ۇزاعىراق كەلتىرگىمىز كەلدى. سەبەبى, بۇل ءۇزىندىنى تولقىماي وقۋ مۇمكىن ەمەس. تاعىلىم دا تۇنىپ تۇر. بۇگىندە ۇلى ءشامشى دە, قالەكەڭ دە, وزەكەڭ دە, وزگە كوپتەگەن قيماس اعالار دا ماڭگىلىك مەكەندەرىندە. كۇنى كەشەلەرى اتى اڭىزعا اينالعان ايتبەك اعامىز دا اتتانىپ كەتە باردى. ناعيما جەڭگەيلەر سياقتى مۇساەۆتار اۋلەتىنىڭ ۇيىتقىسى بولىپ جۇرگەن «التىن القا» يەسى ءدىلداش اپايعا, ونەگەلى ومىرلەر جالعاسىنداي وسكىن ورەندەرگە باق-بەرەكە تىلەيىك. وڭتۇستىك قازاقستان وبلىسى, وتىرار اۋدانى.