قاراعاندى مەن ماسكەۋدىڭ مايدانگەرلەرى ونلاين-كەزدەسۋ وتكىزدى

قاراعاندى. 13 مامىر. قاراعاندىداعى مۇحتار اۋەزوۆ اتىنداعى قالالىق كىتاپحانادا «ۇمىتىلماس جولدار» اتتى تاقىرىپپەن ماسكەۋ كىتاپحاناسىنىڭ وقىرماندارىمەن ونلاين-كەزدەسۋ ءوتتى. ناقتى ايتساق, قاراعاندىلىق مايدانگەرلەر رەسەي استاناسىنداعى ورتالىق كىتاپحانالار جۇيەسى وڭتۇستىك اكىمشىلىك ايماعىنىڭ لەۆ تولستوي اتىنداعى كىتاپحاناسى وقىرماندارىمەن ونلاين كەزدەستى. بۇل تۋرالى egemen kz ءتىلشىسى حابارلادى. شاراعا جەرگىلىكتى سوعىس ارداگەرلەرى – نيكولاي ارحانگەلسكي, نەفيزيا اگيشەۆا جانە سەرافيما پونومارەۆامەن قاتار, قاراعاندىلىق ستۋدەنتتەر دە قاتىستى. تەلەجۇزدەسۋدە العاشقى ءسوز كەزەگى ماسكەۋلىك سوعىس ارداگەرلەرىنە ءتيدى. ولاردىڭ ورتاق مەرەكەمەن قۇتتىقتاۋىنان سوڭ ن.كرۋپينوي اتىنداعى درامستۋديا تالاپكەرلەرى ماسكەۋدى قورعاۋ تۋرالى تەاترلاندىرىلعان قويىلىم كورسەتتى. قاراعاندى كىتاپحاناسىنىڭ قىزمەتكەرلەرى ءوز باعدارلامالارى بويىنشا قالانىڭ جەڭىسكە قوسقان ۇلەسىن باياندايتىن دەرەكتەردى, فوتوسۋرەتتەردى تانىستىرىپ, جاس ونەرپازدار مەرەكەلىك كوڭىل-كۇي سىيلادى. ايقىن نەسىپباي. دەرەك: egemen.kz. سۋرەت: ekaraganda.kz.