مەملەكەتتىك كەڭەسشىمەن بىرگە وڭىرگە جالپىۇلتتىق كواليتسيا مۇشەلەرى – ءماجىلىس دەپۋتاتتارى نۇرتاي سابيليانوۆ, ەرلان سايروۆ, نارتاي سارسەنعاليەۆ, وقۋ-اعارتۋ ءمينيسترى جۇلدىز سۇلەيمەنوۆا, اقىن مۇحتار نيازوۆ, پرەزيدەنت جانىنداعى جاستار ساياساتى جونىندەگى كەڭەستىڭ مۇشەسى ولجاس سۇلەيمەن جانە وزگە دە ازاماتتار باردى.
ساپار اياسىنداعى نەگىزگى ءىس-شارا – اباي اتىنداعى وبلىستىق كىتاپحانادا وتكەن ءوڭىر اكتيۆىمەن كەزدەسۋ. تالقىلاۋ جۇمىسىنا 500-گە جۋىق ادام – ءماسليحات دەپۋتاتتارى, قوعامدىق كەڭەس مۇشەلەرى, ساياسي پارتيالاردىڭ, قازاقستان حالقى اسسامبلەياسىنىڭ, ارداگەرلەر ۇيىمدارىنىڭ, بيزنەس, ءبىلىم, دەنساۋلىق ساقتاۋ, سپورت سالالارىنىڭ, عىلىمي جانە جاستار قاۋىمىنىڭ وكىلدەرى قاتىستى.
ديالوگتىڭ وزەگى – جاڭا كونستيتۋتسيا جوباسىنىڭ ەرەجەلەرى مەن الداعى 15 ناۋرىزدا وتەتىن رەسپۋبليكالىق رەفەرەندۋمنىڭ ماڭىزى.
مەملەكەتتىك كەڭەسشى ەرلان قارين جوبانى ازىرلەۋ جۇمىسى اشىقتىق جانە كەڭ قوعامدىق قاتىسۋ قاعيداتىنا نەگىزدەلگەنىن, e-Otinish جانە eGov تسيفرلىق پلاتفورمالارى ارقىلى ازاماتتاردان كەلىپ تۇسكەن ۇسىنىستار ەسكەرىلگەنىن اتاپ ءوتتى. ونىڭ ايتۋىنشا, ۇسىنىلىپ وتىرعان وزگەرىستەر مەملەكەتتىك باسقارۋ جۇيەسىنىڭ تۇراقتىلىعىن نىعايتۋعا, بيلىك ينستيتۋتتارىنىڭ وكىلەتتىگى مەن جاۋاپكەرشىلىگى اراسىنداعى تەڭگەرىمدى كۇشەيتۋگە, سونداي-اق ادام كاپيتالىن, ءبىلىم مەن عىلىمدى جانە يننوۆاتسيانى مەملەكەتتىڭ ستراتەگيالىق باسىمدىقتارى رەتىندە دامىتۋعا باعىتتالدى.
«جاڭا كونستيتۋتسياداعى نەگىزگى تۇجىرىمدامالىق ەرەجەلەردىڭ باسىم بولىگى تىكەلەي قاسىم-جومارت
كەمەل ۇلىنىڭ باستاماسىمەن ۇسىنىلدى. ماسەلەن, جاڭا پرەامبۋلا پرەزيدەنتتىڭ تۇجىرىمدامالىق تەزيستەرى نەگىزىندە ازىرلەندى. مەملەكەت باسشىسى – ازاماتتارىمىزدىڭ مۇددەسىن قورعاۋعا باعىتتالعان بىرقاتار نورما مەن جاڭاشىل باستامانىڭ اۆتورى», دەدى ەرلان قارين.
ءماجىلىس دەپۋتاتى نۇرتاي سابيليانوۆ مەنشىك نىساندارىنىڭ بارلىق ءتۇرىن قورعاۋ, ۇلتتىق زاڭنامانىڭ باسىمدىعى مەن ۇلتتىق ۆاليۋتانىڭ ءرولىن بەكىتۋ سىندى ەكونوميكالىق كەپىلدىكتەر كۇشەيتىلگەنىن اتاپ ءوتتى. بۇل بيزنەس پەن ينۆەستيتسيالار ءۇشىن تۇراقتى جاعداي قالىپتاستىرادى.
وقۋ-اعارتۋ ءمينيسترى جۇلدىز سۇلەيمەنوۆا ءبىلىم, عىلىم جانە يننوۆاتسيانى دامىتۋ ماسەلەسى ستراتەگيالىق باسىمدىق دەڭگەيىندە بەكىتىلگەنىن, بۇل ادام كاپيتالىن قالىپتاستىرۋعا باعىتتالعان مەملەكەتتىك قولداۋدى كۇشەيتەتىنىن مالىمدەدى.
ءماجىلىس دەپۋتاتى ەرلان سايروۆ قۇرىلتايدىڭ باقىلاۋ فۋنكتسيالارى كۇشەيگەنىنە نازار اۋدارسا, وبلىستىق ارداگەرلەر كەڭەسىنىڭ توراعاسى مۇراتقازى الين جاڭا كونستيتۋتسيانىڭ ۇلتتىق مادەنيەت پەن ءداستۇرلى وتباسىلىق قۇندىلىقتاردى نىعايتۋداعى ماڭىزىن اتاپ ءوتتى. سونىمەن قاتار ساپار اياسىندا وڭىردەگى شىعارماشىلىق زيالى قاۋىم وكىلدەرىمەن كەزدەسۋ ءوتتى.
تالقىلاۋ تاقىرىپتارى – مادەنيەتتىڭ, تاريحي جادىنىڭ جانە ۇلتتىق بىرەگەيلىكتىڭ ءرولى. ەرلان قارين جاڭا كونستيتۋتسيا قۇقىقتىق قۇجات قانا ەمەس, قوعامنىڭ قۇندىلىق باعدارىن ايقىندايتىن زاماناۋي قوعامدىق كەلىسىم رەتىندە قاراستىرىلاتىنىن اتاپ ءوتتى. ونىڭ ايتۋىنشا, جوبا نەگىزىندە ادامعا باعدارلانعان ءتاسىل جاتىر. وندا مەملەكەتتىك ساياساتتىڭ باستى باعدارى – ازاماتتاردىڭ قۇقىعى, بوستاندىعى مەن مۇمكىندىكتەرى.
قاتىسۋشىلار مەملەكەتتىك قىزمەت قاعيداتتارىنىڭ تىزبەسىندە تاريحي-مادەني مۇرانى ساقتاۋ مەن ۇلتتىق مادەنيەتكە قولداۋ كورسەتۋ نورمالارىن بەكىتۋگە قولداۋ ءبىلدىردى.
ساپار بارىسىندا جالپىۇلتتىق كواليتسيا مۇشەلەرى كاسىپوداق ۇيىمدارىمەن, پەداگوگتەر قاۋىمىمەن, مادەنيەت سالاسىنىڭ وكىلدەرىمەن, «سەماز» جشس ەڭبەك ۇجىمىمەن جانە ءوڭىر جاستارىمەن دە كەزدەستى. ديالوگ اياسىندا ەڭبەك ادامىنىڭ قۇقىعىن قورعاۋ, الەۋمەتتىك كەپىلدىكتى قامتاماسىز ەتۋ, ءبىلىم مەن عىلىمدى دامىتۋ, وڭىرلەردىڭ ەكونوميكالىق تۇرعىدا دامۋىنا تۇراقتى جاعداي جاساۋ جانە جاستاردىڭ ءوزىن تانىتۋ مۇمكىندىكتەرىن كەڭەيتۋ ماسەلەلەرى تالقىلاندى.
جالپى, اباي وبلىسىنداعى كەزدەسۋلەر جەرگىلىكتى جۇرتشىلىقتىڭ الداعى رەفەرەندۋمعا ەرەكشە نازار اۋدارىپ وتىرعانىن كورسەتتى.
