فوتو: sauda.e-qazyna.kz
نىسان زاڭسىز جولمەن الىنعانى انىقتالىپ, 2023 جىلى قارجى مينيسترلىگىنىڭ بالانسىنا بەرىلگەن. ەندى عيمارات مەملەكەتتىك اۋكتسيون پلاتفورماسىندا ساتىلىمعا قويىلماق. باستاپقى باعاسى − 61 ملرد تەڭگە. بۇل سوماعا عيماراتتىڭ ءوزى جانە جەر تەلىمىن جالعا الۋ قۇقىعى كىرەدى.
Kaisar Plaza – اۆتوتۇراعى مەن پانورامالىق قاباتى بار توعىز قاباتتى ساۋدا-كەڭسە ورتالىعى. قازىرگى تاڭدا مۇندا 53 ۇيىم جالعا الۋشى رەتىندە ورنالاسقان. ولاردىڭ قاتارىندا ءىرى بانكتەر, بۇقارالىق اقپارات قۇرالدارى جانە قوعامدىق تاماقتانۋ ورىندارى بار.
قايتارىلعان اكتيۆتەر تىزىمىنە بۇدان بولەك Kaisar Towers بيزنەس-ورتالىعى, DoubleTree by Hilton قوناقۇيى, «ارسات» جانە Maisat بيزنەس-ورتالىقتارى, «مەگاتاۋ» ساۋدا ءۇيى, «بايسات» بازارى جانە «وپتيمۋم» بيزنەس-ورتالىعى ەنگەن.
اۋكتسيونعا قاتىسۋ ءۇشىن كەپىلدىك جارنا كولەمى 9,2 ملرد تەڭگەنى قۇرايدى. ساۋدا-ساتتىق 7 ساۋىردە باستالادى.
بۇعان دەيىن قايتارىلعان اكتيۆتەردىڭ قاتارىنداعى «بايسات» بازارى دا بىرنەشە رەت ساتىلىمعا شىعارىلعانى حابارلانعان ەدى. 2025 جىلدىڭ جەلتوقسانىندا ونىڭ باعاسى شامامەن 26,7 ملرد تەڭگە بولسا, قاراشادا – 28 ملرد تەڭگە بولعان. ال 2026 جىلدىڭ قاڭتارىنا قاراي قۇنى 24,7 ملرد تەڭگەگە دەيىن تومەندەتىلگەن.
