ءوز سوزىندە ب. جەكسەنباي جاھاندىق گەوساياسي جانە گەوەكونوميكالىق وزگەرىستەر جاعدايىندا قازاقستاننىڭ ساياسي جۇيەسىن جاڭعىرتۋ قاجەتتىگىن اتاپ ءوتتى. ونىڭ ايتۋىنشا, جاڭا اتا زاڭ – ەلدىڭ ۇزاقمەرزىمدى دامۋ ستراتەگياسىن ايقىندايتىن, تاۋەلسىزدىك پەن تۇراقتىلىقتى نىعايتاتىن قۇجات.
سەناتور جاڭا كونستيتۋتسيانىڭ باستى قۇندىلىعى – ادام ەكەنىن ەرەكشە اتاپ ءوتتى. جوباعا سايكەس ادام قۇقىقتارى مەن بوستاندىقتارى مەملەكەتتىڭ ەڭ جوعارى قۇندىلىعى رەتىندە بەكىتىلەدى. ءومىر ءسۇرۋ قۇقىعىنىڭ ابسوليۋتتىك سيپاتى, ءسوز جانە شىعارماشىلىق ەركىندىگى, جەكە ومىرگە قول سۇقپاۋشىلىق, تسيفرلىق كەڭىستىكتەگى قۇقىقتاردى قورعاۋ, ءولىم جازاسىنا تولىق تىيىم سالۋ سياقتى نورمالار ناقتى قۇقىقتىق كەپىلدىكتەرمەن قامتاماسىز ەتىلەدى.
سونىمەن قاتار وتباسىن قورعاۋ, تۇرعىن ۇيگە قول سۇقپاۋشىلىق جانە ەكولوگيالىق جاۋاپكەرشىلىك ماسەلەلەرى كونستيتۋتسيالىق دەڭگەيدە ايقىندالعانى ايتىلدى.
ب. جەكسەنباي ۇلتتىق قۇرىلتايدا كوتەرىلگەن باستامالاردىڭ جاڭا كونستيتۋتسيادا جۇيەلى تۇردە كورىنىس تاپقانىن اتاپ ءوتتى. اتاپ ايتقاندا, ءبىلىم, عىلىم جانە يننوۆاتسيانى ستراتەگيالىق باسىمدىق رەتىندە بەكىتۋ, تسيفرلاندىرۋدىڭ ينستيتۋتسيونالدىق-قۇقىقتىق نەگىزىن قالىپتاستىرۋ, ۇلتتىق بىرەگەيلىك پەن قوعامدىق كەلىسىمدى نىعايتۋ, ازاماتتىق ديالوگ تەتىكتەرىن كەڭەيتۋ ماسەلەلەرى كونستيتۋتسيالىق نورمالارعا ەنگىزىلگەن.
كەزدەسۋ بارىسىندا جاڭا باسقارۋ مودەلىنە دە نازار اۋدارىلدى. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» تۇجىرىمداماسى بيلىك تارماقتارىنىڭ تەپە-تەڭدىگىن قامتاماسىز ەتۋگە باعىتتالعان. حالىق كەڭەسىنىڭ ءرولى ازاماتتىق قوعام مەن مەملەكەت اراسىنداعى تۇراقتى ديالوگ الاڭى رەتىندە ايقىندالعانى ايتىلدى.
جاڭا كونستيتۋتسيا جوباسىنا قاتىستى قانداي جالعان اقپاراتتار تارادى؟
سەناتوردىڭ ايتۋىنشا, جاڭا كونستيتۋتسيا – تەك قۇقىقتىق قۇجات ەمەس, ول بىلىمگە, يننوۆاتسياعا جانە ادام كاپيتالىنا نەگىزدەلگەن ۇزاقمەرزىمدى ۇلتتىق دامۋ مودەلىنىڭ ىرگەتاسى.
كەزدەسۋ سوڭىندا قاتىسۋشىلار كونستيتۋتسيالىق رەفورمانىڭ ماڭىزى تۋرالى پىكىر الماستى.
الداعى رەفەرەندۋم ەل بولاشاعىنا قاتىستى ماڭىزدى شەشىم بولماق. سوندىقتان ەل ازاماتتارىنىڭ ءوز داۋىستارىن بەرۋگە سەناتور شاقىردى.
