سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
جوعارى دەڭگەيدە وتكەن كەلىسسوزدەر
سودان كەيىن قازاقستان مەن سەربيا پرەزيدەنتتەرى كەلىسسوز زالىنا باردى.
– ءبىز سەربيانى ەۋروپاداعى ماڭىزدى ستراتەگيالىق سەرىكتەسىمىز سانايمىز. بىرقاتار باعىتتا, اسىرەسە, ەكونوميكالىق, مادەني-گۋمانيتارلىق سالالارداعى ىقپالداستىعىمىزدى نىعايتۋ ءۇشىن كوپ جۇمىس اتقاردىق. استانا مەن بەلگراد اراسىندا تىكەلەي اۋە رەيسى اشىلدى. ساۋدا قاتىناستارىمىز تابىستى دامىپ كەلەدى. قازاقستاندا 60-تان اسا سەربيالىق كومپانيا جەمىستى ەڭبەك ەتىپ جاتىر. نەگىزگى حالىقارالىق ماسەلەلەر بويىنشا ۇستانىمدارىمىز ورتاق. سوندىقتان ەكى ەل اراسىنداعى ىنتىماقتاستىقتىڭ بەرىك ءارى ءتيىمدى ىرگەتاسى قالاندى دەپ ويلايمىن. ءسىزدىڭ ساپارىڭىز دوستىق قارىم-قاتىناسىمىزعا تىڭ سەرپىن بەرۋ تۇرعىسىنان وتە ماڭىزدى ەكەنىنە سەنىمدىمىن, – دەدى قاسىم-جومارت توقاەۆ.
الەكساندر ۆۋچيچ قازاقستانعا رەسمي ساپارمەن كەلگەنىنە قۋانىشتى ەكەنىن ايتتى.
– قوناقجايلىق تانىتقانىڭىز ءۇشىن ريزاشىلىعىمدى بىلدىرەمىن. ءسىزدىڭ پىكىرىڭىزبەن تولىق كەلىسەمىن, ەلدەرىمىز اراسىندا شىنايى ستراتەگيالىق قارىم-قاتىناس ورناعان. ءسىزدىڭ قولداۋىڭىزدىڭ ارقاسىندا ساۋدا-ەكونوميكالىق بايلانىستارىمىز جوعارى قارقىنمەن دامىپ كەلەدى. الداعى ۋاقىتتا جاساندى ينتەللەكت, اقپاراتتىق تەحنولوگيالار مەن ەنەرگەتيكا سالالارىندا ىقپالداستىق ورناتۋ ارقىلى دوستىعىمىز جاڭا دەڭگەيگە كوتەرىلەدى دەپ ويلايمىن. ءسىزدى جاقىن ارادا ەلىمىزدە قارسى الۋعا دايىنبىز, – دەدى سەربيا پرەزيدەنتى.
بۇدان سوڭ قاسىم-جومارت توقاەۆ پەن الەكساندر ۆۋچيچ ەكى ەلدىڭ رەسمي دەلەگاتسيالارىنىڭ قاتىسۋىمەن كەڭەيتىلگەن قۇرامدا كەلىسسوز وتكىزدى.
مەملەكەت باسشىسى مەيماندارعا ءىلتيپات بىلدىرە وتىرىپ, بۇل ساپار قازاقستان مەن سەربيا اراسىندا ديپلوماتيالىق قاتىناس ورناعانىنا 30 جىل تولۋ قارساڭىندا ءوتىپ جاتقانىنا نازار اۋداردى.
– كوپتەگەن سالاداعى ءوزارا ءتيىمدى بايلانىستارىمىزدى ودان ءارى نىعايتۋعا نيەتتىمىز. بۇگىن ەكىجاقتى ىنتىماقتاستىقتى دامىتۋعا تىڭ سەرپىن بەرۋ تاسىلدەرىن تالقىلادىق. ءوز تاراپىمىزدان ەكى ەل اراسىنداعى ىقپالداستىقتى كەڭەيتۋگە بارلىق جاعدايدى جاسايتىنىمىزدى جەتكىزگىم كەلەدى, – دەدى قاسىم-جومارت توقاەۆ.
مەملەكەت باسشىسى استانا مەن بەلگراد اراسىندا سىندارلى ساياسي ديالوگ جولعا قويىلىپ, پارلامەنتارالىق بايلانىس نىعايىپ كەلە جاتقانىن اتاپ ءوتتى. سونىمەن قاتار مەملەكەتتىك ورگاندار مەن ىسكەرلىك توپتاردىڭ ىقپالداستىعى دايەكتى تۇردە دامىپ كەلەدى.
پرەزيدەنت ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ءتيىمدى جۇمىس اتقارىپ جاتقانىن ايتتى. مەملەكەت باسشىسى ساپار اياسىندا سەربيادان ىسكەرلىك توپ وكىلدەرى كەلگەنىن قۇپتادى. كەشە وتكەن قازاقستان – سەربيا ىسكەرلىك كەڭەسىنىڭ ناتيجەسى ساۋدا جانە ينۆەستيتسيالىق بايلانىستاردى كەڭەيتە تۇسەتىنىنە سەنىم ءبىلدىردى.
پرەزيدەنت ەلىمىزدىڭ بىرقاتار حالىقارالىق باستامالارىنا قولداۋ بىلدىرگەنى ءۇشىن سەربيا تاراپىنا ريزاشىلىعىن جەتكىزدى.
ءوز كەزەگىندە الەكساندر ۆۋچيچ قوناقجايلىق تانىتقانى ءۇشىن پرەزيدەنت قاسىم-جومارت توقاەۆقا العىس ايتىپ, بەلگراد استانامەن سان قىرلى ىنتىماقتاستىقتى ودان ءارى كەڭەيتۋگە دايىن ەكەنىن راستادى.
سەربيا پرەزيدەنتى قازاقستاندىق كومپانيالاردىڭ ورتاق جوبالارعا, اسىرەسە, قۇرىلىس سالاسىنا قوسار ۇلەسىن ارتتىرۋعا مۇددەلى ەكەنىنە توقتالدى.
– ءبىز قازاقستان ۇسىنعان بىرقاتار باستامالاردى جۇزەگە اسىرۋعا ءازىرمىز. بۇل سەربيادا عانا ەمەس, ەۋروپانىڭ اتالعان ايماعىنداعى ماڭدايالدى جوبالار بولماق. سونداي-اق قازاقستاندىق «SCAT» كومپانياسىنا اۋە كەڭىستىگىندە بەسىنشى دەڭگەيلى ەركىندىك بەرۋ ماسەلەسى ءالى شەشىمىن تاپقان جوق. ورتاق ءىس-قيمىل ارقىلى اتالعان ماسەلەنى شەشە الاتىنىمىزعا سەنىمدىمىن. سەربياعا قازاقستاننىڭ سەنىمدى قۇرىلىس كومپانيالارى مەن ينۆەستورلارى كەلگەنىن قالايمىز. بۇل ەلىمىزدىڭ ينۆەستيتسيالىق تارتىمدىلىعىن جاقسارتىپ قانا قويماي, ءوزارا مادەني, تۋريستىك بايلانىستاردى جانداندىرۋعا دا سەپتىگىن تيگىزەدى. ءوز تاراپىمىزدان ءسىزدىڭ ەلىڭىزدىڭ ەكونوميكاسىنا ينۆەستيتسيا سالعىسى كەلەتىن سەربيالىق كاسىپكەرلەردى ىنتالاندىرۋعا بارىنشا كۇش-جىگەر جۇمىلدىرامىز, – دەدى الەكساندر ۆۋچيچ.
سەربيا پرەزيدەنتى قورعانىس ونەركاسىبى, جاساندى ينتەللەكت, دەرەكتەردى وڭدەۋ ورتالىعى سەكىلدى باعىتتاردا ءوزارا ىقپالداستىقتى ارتتىرۋعا زور الەۋەت بار ەكەنىنە نازار اۋداردى. سونىمەن قاتار ول قازاقستاننىڭ الەۋمەتتىك-ەكونوميكالىق دامۋىنداعى جەتىستىكتەردى جوعارى باعالاپ, مۇنى الەمدەگى ءوسىپ-وركەندەۋدىڭ ۇلگىسى دەپ اتادى.
كەلىسسوز بارىسىندا ەكىجاقتى كۇن تارتىبىندەگى وزەكتى تاقىرىپتار, اتاپ ايتقاندا, ساۋدا-ينۆەستيتسيا, كولىك-لوگيستيكا, اۋىل شارۋاشىلىعى, اسا ماڭىزدى مينەرالدار, تسيفرلاندىرۋ, جاساندى ينتەللەكت, قۇرىلىس جانە تۋريزم سالالارىنداعى ىقپالداستىق ماسەلەلەرى قاراستىرىلدى.
كەلىسسوز قورىتىندىسى بويىنشا پرەزيدەنت قاسىم-جومارت توقاەۆ پەن پرەزيدەنت الەكساندر ۆۋچيچ بىرلەسكەن مالىمدەمە قابىلدادى. سونداي-اق مەملەكەتتەر باسشىلارىنىڭ قاتىسۋىمەن ۆەدومستۆوارالىق قۇجاتتار الماسۋ ءراسىمى ءوتتى.
«التىن قىران» وردەنىمەن ماراپاتتادى
قاسىم-جومارت توقاەۆ الەكساندر ءۆۋچيچتى حالىق قولداۋىنا ارقا سۇيەپ, ەلىن العا باستاپ كەلە جاتقان ناعىز كوشباسشى, بەدەلدى ساياساتكەر دەپ سانايتىنىن جەتكىزدى.
– سەربيا ءسىز جۇرگىزىپ وتىرعان ساليقالى ساياساتتىڭ ارقاسىندا زور جەتىستىكتەرگە جەتىپ, وركەندەپ كەلەدى. حالىقارالىق بەدەلى دە ارتا ءتۇستى. الداعى ۋاقىتتا ەلىڭىز ءسىزدىڭ پاراساتتى باسشىلىعىڭىزبەن جاڭا بەلەستەردى باعىندىرا بەرەدى دەپ سەنەمىن. سەربيا – قازاقستاننىڭ بالقان تۇبەگىندەگى سەنىمدى سەرىكتەسى. ەكى ەلدىڭ قارىم-قاتىناسى ءوزارا قولداۋعا, تۇسىنىستىك پەن مىزعىماس دوستىققا نەگىزدەلگەن. بارلىق دەڭگەيدە بەلسەندى ساياسي ديالوگ دامىپ كەلە جاتىر. ساۋدا-ەكونوميكا, ينۆەستيتسيا جانە مادەني-گۋمانيتارلىق سالاداعى ىنتىماقتاستىق نىعايىپ كەلەدى. كوپجاقتى قۇرىلىمدار اياسىنداعى بايلانىسىمىز كۇشەيە ءتۇستى. قازىرگىدەي الماعايىپ كەزەڭدە ءوزارا ارىپتەستىكتى جانداندىرۋ وتە ماڭىزدى. سوندىقتان ءبىز وسى قارقىندى ساقتاپ, ءتۇرلى سالاداعى ىقپالداستىقتى دامىتۋعا مۇددەلىمىز. بۇعان تولىق مۇمكىندىك بار. ءوزارا سەنىم مەن دوستىق رۋحىندا وتكەن مازمۇندى كەلىسسوزدەر – سونىڭ ايقىن دالەلى. بۇگىنگى كەلىسىمدەر سەرىكتەستىگىمىزدى جاڭا دەڭگەيگە كوتەرەدى دەپ سانايمىن. ءبىز بۇل باعىتتا بىرلەسىپ ارەكەت ەتۋگە ءاردايىم دايىنبىز, – دەدى پرەزيدەنت.
قاسىم-جومارت توقاەۆ قازاقستان مەن سەربيا اراسىنداعى بايلانىستى نىعايتۋعا ولشەۋسىز ۇلەس قوسقانى ءۇشىن الەكساندر ءۆۋچيچتى ەلىمىزدىڭ ەڭ جوعارى مەملەكەتتىك ناگراداسى – «التىن قىران» وردەنىمەن ماراپاتتادى.
– بۇل – قازاق جۇرتىنىڭ سىزگە جانە سەربيا حالقىنا دەگەن زور ريزاشىلىعى جانە ەرەكشە قۇرمەتىنىڭ بەلگىسى. ءوزىڭىزدى شىن جۇرەكتەن قۇتتىقتايمىن! وسى ماراپات ەكى ەلدىڭ قارىم-قاتىناسىن ودان ءارى دامىتۋعا ىقپال ەتەرىنە كامىل سەنەمىن. قوس حالىقتىڭ دوستىعى جاساي بەرسىن! – دەدى مەملەكەت باسشىسى.
سەربيا پرەزيدەنتى مۇنداي ماراپاتتى يەلەنۋ زور مارتەبە ەكەنىن ايتىپ, بۇل ەكى ەل اراسىنداعى قارىم-قاتىناستى ودان ءارى نىعايتۋعا ىقپال ەتەتىنىنە توقتالدى.
– «التىن قىران» وردەنىن ەرەكشە قۇرمەتپەن قابىل الدىم. بۇل ماراپات ماعان ءوزارا بايلانىستارىمىزدى ارتتىرۋ جانە بەيبىتشىلىك پەن تۇراقتىلىقتى قامتاماسىز ەتۋ جولىنداعى ورتاق ىستە زور جاۋاپكەرشىلىك جۇكتەيدى. كەلەشەك ۇرپاقتىڭ يگىلىگى ءۇشىن سەربيا مەن قازاقستاننىڭ دوستىعى نىعايا بەرۋىنە تىلەكتەسپىن, – دەدى الەكساندر ۆۋچيچ.
تىعىز بايلانىستى تياناقتاعان قۇجاتتار
مەملەكەت باسشىسى شاقىرۋىن قابىل الىپ, استاناعا رەسمي ساپارمەن كەلگەنى ءۇشىن پرەزيدەنت الەكساندر ۆۋچيچكە جانە دەلەگاتسيا مۇشەلەرىنە شىنايى ريزاشىلىعىن ءبىلدىردى.
– سەربيا – قازاقستاننىڭ بالقان تۇبەگىندەگى ماڭىزدى ءارى سەنىمدى سەرىكتەسى. بەرىك دوستىق, ءوزارا قولداۋ مەن ورتاق مۇددە ەلدەرىمىزدىڭ ىنتىماقتاستىعىنا ارقاۋ بولىپ وتىر. مەن ەكى جىل بۇرىن بەلگرادقا جاساعان ساپارىمدى ىستىق ىقىلاسپەن ەسكە الامىن. سول كەزدەگى كەلىسىمدەردىڭ تابىستى جۇزەگە اسىرىلىپ جاتقانىن ەرەكشە ريزاشىلىقپەن اتاپ وتكىم كەلەدى. بيىل ەكى مەملەكەتتىڭ ديپلوماتيالىق قاتىناس ورناتقانىنا 30 جىل تولادى. پرەزيدەنت الەكساندر ءۆۋچيچتىڭ ساپارى وسى مەرەيلى مەجەگە تۇسپا-تۇس كەلىپ وتىر. وسى ۋاقىت ىشىندە قازاقستان مەن سەربيا اراسىندا بارلىق دەڭگەيدە ءوزارا سەنىمدى ارقاۋ ەتكەن ساياسي ديالوگ ورنادى. ناقتى شارتتىق-قۇقىقتىق نەگىز قالىپتاستى. ۇكىمەتتەرىمىز ناتيجەلى جۇمىس ىستەپ, پارلامەنتارالىق بايلانىس نىعايىپ كەلەدى. ساۋدا-ەكونوميكا جانە ينۆەستيتسيا سالاسىنداعى ىنتىماقتاستىق كۇشەيدى. مادەني-گۋمانيتارلىق باعىتتا ايتارلىقتاي تابىسقا قول جەتكىزدىك. حالىقارالىق ۇيىمدار اياسىنداعى ىقپالداستىعىمىز تەرەڭدەي ءتۇستى, – دەدى قازاقستان پرەزيدەنتى.
مەملەكەت باسشىسى ءوزارا ىنتىماقتاستىقتى دامىتۋعا سەربيا پرەزيدەنتىنىڭ زور ۇلەس قوسقانىن جەتكىزىپ, ەلىمىز مۇنى وتە جوعارى باعالايتىنىن ايتتى.
– سوندىقتان بۇگىن جوعارى مارتەبەلى پرەزيدەنت الەكساندر ءۆۋچيچتى قازاقستان رەسپۋبليكاسىنىڭ ەڭ جوعارى ناگراداسى – «التىن قىران» وردەنىمەن ماراپاتتادىم. بۇل ناگرادا – قازاق ەلىنىڭ سىزگە جانە بۇكىل سەربيا حالقىنا دەگەن ەرەكشە قۇرمەتى, شىنايى ءىلتيپاتىنىڭ بەلگىسى. مىزعىماس دوستىق پەن قولداۋعا نەگىزدەلگەن سەرىكتەستىگىمىز الداعى ۋاقىتتا دا نىعايا بەرەدى دەپ سەنەمىن, – دەدى مەملەكەت باسشىسى.
قاسىم-جومارت توقاەۆ الەكساندر ۆۋچيچپەن كەڭەيتىلگەن قۇرامدا مازمۇندى كەلىسسوز جۇرگىزگەنىنە توقتالدى.
– ساۋدا, كولىك-لوگيستيكا, ەنەرگەتيكا, ونەركاسىپ, اۋىل شارۋاشىلىعى, اقپاراتتىق تەحنولوگيالار, جاساندى ينتەللەكت جانە مادەني-گۋمانيتارلىق سالاداعى ىقپالداستىق ماسەلەلەرىن جان-جاقتى تالقىلادىق. ناقتى ۋاعدالاستىقتارعا قول جەتكىزدىك. ساۋدا-ەكونوميكا جانە ينۆەستيتسيا سالاسىنداعى بايلانىستى دامىتۋ قاجەتتىگىنە باسا نازار اۋداردىق. قازىر ەكى ەلدىڭ اراسىنداعى الىس-بەرىس كوبەيىپ كەلەدى. ەلىمىزدە 60-قا جۋىق سەرب كومپانياسى تابىستى جۇمىس ىستەپ جاتىر. دەگەنمەن ءبىزدىڭ ەكونوميكالىق الەۋەتىمىز بۇدان الدەقايدا جوعارى. سوندىقتان ساۋدا-ساتتىق كولەمىن ۇلعايتۋعا كەلىستىك. مەملەكەتتەرىمىزدىڭ مۇددەسىنە ساي كەلەتىن جاڭا ينۆەستيتسيالىق جوبالاردى پىسىقتاۋعا ۋاعدالاستىق. ەكونوميكالىق ىنتىماقتاستىق جونىندەگى ۇكىمەتارالىق كوميسسيا بۇل جۇمىسقا باسا ءمان بەرۋى قاجەت, – دەدى پرەزيدەنت.
مەملەكەت باسشىسى ەلىمىزگە الەكساندر ۆۋچيچپەن بىرگە ءىرى كاسىپكەرلەر كەلگەنىن, ساپار قارساڭىندا قازاقستان – سەربيا ىسكەرلىك كەڭەسىنىڭ وتىرىسى وتكەنىن ەسكە سالدى.
– بيزنەس وكىلدەرى اراسىنداعى بايلانىستى كۇشەيتۋ قاجەت ەكەنىن اتاپ وتتىك. جالپى, ءبىز سەربيا كاسىپكەرلەرىنە قولايلى جاعداي جاساۋعا دايىنبىز. كولىك جانە لوگيستيكا سالاسىنداعى ىنتىماقتاستىقتى كەڭەيتۋگە ايرىقشا نازار اۋداردىق. بىلتىر استانا مەن بەلگراد اراسىندا تىكەلەي اۋە رەيسى اشىلدى. بۇل – ىقپالداستىعىمىزدى دامىتۋ جولىنداعى ماڭىزدى قادام. سونداي-اق ترانسكاسپي حالىقارالىق كولىك ءدالىزىنىڭ ترانزيتتىك مۇمكىندىكتەرىن ءتيىمدى پايدالانۋ, جۇك تاسىمالدايتىن جاڭا باعىتتار اشۋ ماسەلەسىنە توقتالدىق. ينفراقۇرىلىم سالاسىنداعى ارىپتەستىكتى نىعايتۋ جولدارىن تالقىلادىق. ءتيىستى مينيسترلىكتەر مەن وپەراتورلارعا ناقتى ىنتىماقتاستىق تاسىلدەرىن ايقىنداۋدى ۇسىندىق. ەنەرگەتيكا سالاسىندا اسا ماڭىزدى مينەرالداردى ءوندىرۋ جانە وڭدەۋ, قوسىلعان قۇنى جوعارى وندىرىستەردى دامىتۋ ءۇشىن ءوزارا ءىس-قيمىلدى كۇشەيتۋگە كەلىستىك, – دەدى قاسىم-جومارت توقاەۆ.
بۇعان قوسا, پرەزيدەنت بەيبىت اتوم ەنەرگەتيكاسى بويىنشا تاجىريبە الماسۋ مۇمكىندىگى قاراستىرىلعانىن جەتكىزدى.
– كەلىسسوز بارىسىندا جاساندى ينتەللەكتىنى جانە زاماناۋي تسيفرلىق تەحنولوگيانى جاپپاي ەنگىزۋ ستراتەگيالىق تۇرعىدا ماڭىزدى ەكەنىن اتاپ وتتىك. وسى باعىتتا بىرلەسىپ جۇمىس ىستەۋگە دايىن ەكەنىمىزدى راستادىق, – دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, اۋىل شارۋاشىلىعى سالاسىندا زور مۇمكىندىك بار.
– ءبىز اگروونەركاسىپ كەشەنىندەگى ارىپتەستىكتى جانداندىرۋعا مۇددەلى ەكەنىمىزدى بىلدىردىك. سونىڭ ىشىندە وسىمدىك, تۇقىم شارۋاشىلىعى سالاسىنداعى ىنتىماقتاستىقتى نىعايتامىز دەپ كەلىستىك. سەربيالىق «Mambikom Agrar» كومپانياسى قازاقستاندا مۇزداتىلعان ونىمدەر شىعاراتىن زاۋىت اشۋعا نيەت تانىتىپ وتىر. بۇل قادام اگرارلىق سەكتورداعى ىقپالداستىقتى جاڭا دەڭگەيگە كوتەرەدى دەپ سەنەمىز. سونداي-اق ءبىز مادەني-گۋمانيتارلىق, ءبىلىم جانە تۋريزم سالاسىنداعى قارىم-قاتىناستى دامىتۋعا ۋاعدالاستىق, – دەدى پرەزيدەنت.
مەملەكەت باسشىسى كەلەسى جىلى سەربيانىڭ ەكسپو كورمەسىن تابىستى وتكىزۋىنە ەلىمىزدىڭ تىلەكتەس ەكەنىن جەتكىزدى. بۇل رەتتە قازاقستان «EXPO 2027 Belgrade» كورمەسىنە قاتىسىپ, ءوز تاجىريبەسىن بولىسۋگە دايىن.
– جالپى, بۇگىنگى كەلىسسوزدەر وتە تابىستى بولدى. بىرلەسكەن مالىمدەمە قابىلدادىق. جان-جاقتى ىنتىماقتاستىققا تىڭ سەرپىن بەرەتىن بىرقاتار ماڭىزدى قۇجاتقا قول قويدىق. وسى كەلىسىمدەردىڭ ناتيجەسىندە ەكى ەلدىڭ قارىم-قاتىناسى نىعايا تۇسەتىنى ءسوزسىز, – دەدى قاسىم-جومارت توقاەۆ.
سونداي-اق تاراپتار حالىقارالىق جانە ايماقتىق ماسەلەلەر جونىندە پىكىر الماسقان.
– جاھاندىق گەوساياسي احۋالدىڭ ۋشىعۋىنا, قاقتىعىستاردىڭ كوبەيۋىنە ءبارىمىز الاڭداپ وتىرمىز. الەمدەگى كوپتەگەن تۇيتكىلگە قاتىستى مەملەكەتتەرىمىزدىڭ ۇستانىمى – ۇقساس. بىرىككەن ۇلتتار ۇيىمى جارعىسىنىڭ جانە حالىقارالىق قۇقىق نورمالارىنىڭ تالاپتارى قاتاڭ ساقتالۋعا ءتيىس. كەز كەلگەن جانجالدى كەلىسىم ارقىلى ديپلوماتيالىق جولمەن شەشۋ قاجەت دەپ سانايمىز. ءبىز بولاشاقتا دا حالىقارالىق دەڭگەيدە كۇش بىرىكتىرىپ, ءتيىمدى جۇمىس ىستەۋگە, بەيبىتشىلىك پەن تۇراقتىلىقتى قامتاماسىز ەتۋگە بەلسەنە اتسالىسامىز دەپ كەلىستىك. بۇگىنگى ساپار ەكى ەلدىڭ ىنتىماقتاستىعىن ودان ءارى نىعايتا تۇسەتىنى انىق. بۇعان قوس تاراپ تا مۇددەلى. «جۇمىلا كوتەرگەن جۇك جەڭىل» دەيدى. بىرلەسىپ ارەكەت ەتسەك, ورتاق ماقساتتارعا قول جەتكىزەمىز دەپ سەنەمىن, – دەدى قازاقستان پرەزيدەنتى.
الەكساندر ۆۋچيچ قازاقستاننىڭ ەكونوميكاسى دامىپ, كوپۆەكتورلى سىرتقى ساياسات تابىستى ىلگەرىلەپ كەلە جاتقانىن اتاپ ءوتتى. سونداي-اق ول پرەزيدەنت قاسىم-جومارت توقاەۆتىڭ باسشىلىعىمەن قازاق حالقى جاڭا جەتىستىكتەرگە جەتە بەرۋىنە تىلەكتەستىك ءبىلدىردى.
– قازاقستاننىڭ كەلەشەگى جارقىن. سەربيانىڭ سىزدەردەن ۇيرەنەرى كوپ. ءسىزدى جانە قازاقستان حالقىن ۇلگى تۇتاتىنىمدى ايتۋدان ەش ۇيالمايمىن. ەلدەرىمىز اراسىنداعى شىنايى دوستىق كەلەشەكتەگى قارىم-قاتىناسىمىزعا نەگىز بولادى. ءبىز بۇل بايلانىستاردى ەكونوميكا, اۋىل شارۋاشىلىعى, اقپاراتتىق تەحنولوگيا, جاساندى ينتەللەكت, روبوتتى تەحنيكا جانە ءبىلىم بەرۋ سەكىلدى سالالاردا دامىتا الامىز, – دەدى الەكساندر ۆۋچيچ.
سەربيا پرەزيدەنتى قازاق جانە سەرب كوماندالارى قاتىسقان UAE SWAT Challenge-2026 حالىقارالىق جارىسىن اسقان قىزىعۋشىلىقپەن تاماشالاعانىن ايتتى. وسى ورايدا ول مەملەكەت باسشىسىنان ارنايى بولىمشەلەر قىزمەتكەرلەرىن دايارلاۋ ىسىنە قولعابىس ەتۋدى سۇرادى.
– بۇل باعىتتا قازاقستاننىڭ الەمدە ۇزدىك ەكەنى ءسوزسىز. مەن مۇنى سەربيا ازاماتتارى بىلگەنىن قالايمىن. ءبىزدىڭ قۇراما كەيبىر جارىس تۇرلەرى بويىنشا جاقسى ونەر كورسەتتى. ال قازاق جىگىتتەرى مەن قىزدارى بىردە-ءبىر سايىستا سۇرىنگەن جوق. مەن بۇندايدى بۇرىن-سوڭدى كورگەن ەمەسپىن. ارنايى جاساق قىزمەتكەرلەرىڭىز ەڭ جوعارى دەڭگەيدەن كورىندى. ولار ءبىزدىڭ ساربازداردى جاتتىقتىرسا دۇرىس بولار ەدى. سىزدەردى قاۋىپسىزدىك سالاسىنداعى كەرەمەت جەتىستىكتەرىڭىزبەن تاعى دا قۇتتىقتايمىن, – دەدى الەكساندر ۆۋچيچ.
