وتىرىس بارىسىندا ايدا بالاەۆا ءبىلىم بەرۋ قوعامنىڭ اسا ماڭىزدى باعىتى ەكەنىنە توقتالدى. جاڭا كونستيتۋتسيا جوباسىندا ءبىلىم سالاسىنىڭ ءمانى ايقىندالىپ, ماڭىزدى قۇندىلىق رەتىندە كورىنىس تاپقانىن اتاپ ءوتتى. سونىمەن قاتار پرەمەر-مينيستر ورىنباسارى مەملەكەت باسشىسىنىڭ تاپسىرماسى بويىنشا 2030 جىلعا دەيىنگى كەزەڭدى قامتيتىن «قازاقستان بالالارى» تۇجىرىمداماسى قابىلدانعانىن تىلگە تيەك ەتتى. بۇل قۇجات ەلدەگى ءاربىر بالانى قامتىپ, قاۋىپسىزدىككە, ساپالى بىلىمگە, دەنساۋلىققا, وتباسىنا جانە الەۋمەتتىك قورعاۋعا قاتىستى نەگىزگى مەملەكەتتىك شارالاردى بىرىڭعاي جۇيەگە بىرىكتىرەدى.
جيىندا ءبىلىم سالاسىنداعى جەتىستىكتەر دە اتالدى. قازاقستان الەمدەگى حالىق سانىنا شاققاندا وقۋشىلارى ەڭ كوپ 10 ەلدىڭ قاتارىنا ەنگەن. سونىمەن بىرگە القالى جيىندا سالاداعى وزەكتى ماسەلەلەر دە قوزعالدى. وسى ورايدا ايدا بالاەۆا مەكتەپكە دەيىنگى جانە باستاۋىش ءبىلىمنىڭ ساپاسىن ارتتىرۋدى تاپسىردى. مەكتەپ وقۋلىقتارىنا تالداۋ جۇرگىزىپ, ولاردى بالالاردىڭ جاس ەرەكشەلىگىنە ساي ازىرلەۋ كەرەكتىگىن جانە پەداگوگتەردىڭ بىلىكتىلىگىن ارتتىرۋ قاجەتتىگىن اتاپ ءوتتى. ايدا بالاەۆانىڭ پىكىرىنشە, بالالارعا باسا نازار اۋدارىپ, ولاردىڭ سىني ويلاۋ قابىلەتىن دامىتۋ جانە العان ءبىلىمىن تاجىريبەدە قولدانۋ داعدىسىن قالىپتاستىرۋ – نەگىزگى مىندەت.
جيىندا پەداگوگتەردىڭ جي تەحنولوگيالارىن مەڭگەرۋى ماسەلەسىنە دەن قويىلىپ, مۇعالىمدەردى قايتا دايارلاۋ قاجەتتىگى دە قوزعالدى. وسىعان بايلانىستى بارلىق بەيىندى پەداگوگيكالىق جوعارى وقۋ ورىندارىندا جاساندى ينتەللەكت فاكۋلتەتتەرىن اشۋ تاپسىرىلدى.
بۇدان بولەك ۆيتسە-پرەمەر تەحنيكالىق جانە كاسىپتىك ءبىلىم جۇيەسىن دە قايتا قاراۋ قاجەتتىگىن مالىمدەدى. اتاپ ايتساق, قارجىلاندىرۋ تەتىگىن جەتىلدىرۋ, ەڭبەك نارىعىن جۇيەلى زەرتتەۋ جانە دۋالدى وقىتۋ ۇلگىسىن ەنگىزۋ بويىنشا شۇعىل شارالار قابىلداۋ تاپسىرىلدى.
القا وتىرىسىندا ينكليۋزيۆتى ءبىلىم ماسەلەسى دە ايرىقشا اتالىپ ءوتتى. ۇكىمەت باسشىسىنىڭ ورىنباسارى ەرەكشە ءبىلىم بەرۋ قاجەتتىلىگى بار بالالاردى وقىتۋعا بارلىق جاعداي جاسالۋى كەرەكتىگىن ەرەكشە اتاپ ءوتتى. كادر تاپشىلىعىن شەشۋ ماقساتىندا بەيىندى كافەدرالار اشۋ, ينكليۋزيا بويىنشا مىندەتتى پاندەردى ەنگىزۋ جانە پەداگوگتەردى قايتا دايارلاۋ باعدارلامالارىن ازىرلەۋ جونىندە ناقتى تاپسىرمالار بەرىلدى.
سونىمەن قاتار پرەمەر-مينيستر ورىنباسارى وقۋ-اعارتۋ مينيسترلىگىنە قولدانىستاعى وقۋلىقتاردى ىرىكتەۋ تاسىلدەرىن شۇعىل تۇردە قايتا قاراپ, ولاردى ازىرلەۋ مەن ساراپتاۋ ساپاسىن ارتتىرۋدى تاپسىردى.
ايدا بالاەۆا تاربيە مەن يدەولوگيالىق جۇمىستى كۇشەيتۋ ماسەلەسىنە دە ارنايى توقتالدى. بۇل باعىتتاعى جۇمىستار پرەزيدەنت بەكىتكەن ىشكى ساياساتتىڭ نەگىزگى قاعيداتتارى مەن قۇندىلىقتارىنا نەگىزدەلۋگە ءتيىس ەكەنى اتالىپ ءوتتى.
جيىن بارىسىندا جۇلدىز سۇلەيمەنوۆا بايانداما جاسادى. وقۋ-اعارتۋ ءمينيسترى سالاداعى وتكەن جىلعى قىزمەت قورىتىندىسىنا توقتالىپ, الداعى كەزەڭگە ارنالعان نەگىزگى مىندەتتەر مەن باسىم باعىتتاردى تانىستىردى.
