اتىراۋ وبلىسىندا مايدانگەر-مۇنايشىلارعا 500 مىڭ تەڭگەدەن بەرىلدى

اتىراۋ. 13 مامىر. اتىراۋ وبلىسىنداعى «ەمبىمۇنايگاز» اكتسيونەرلىك قوعامى سوعىسقا قاتىسقان مايدانگەر-مۇنايشىنىڭ ارقايسىسىنا 500 مىڭ تەڭگەدەن قارجىلاي كومەك بەردى. بۇل تۋرالى egemen.kz ءتىلشىسى حابارلادى. ەكىنشى دۇنيەجۇزىلىك سوعىستان ەلگە ورالىپ, وتاندىق مۇناي-گاز ونەركاسىبىنىڭ قارىشتاپ دامۋىنا ەسەلى ەڭبەگىمەن ۇلەسىن قوسقان مايدانگەر-مۇنايشىلاردىڭ قاتارى ازايىپ بارادى. «ەمبىمۇنايگاز» اكتسيونەرلىك قوعامى باس ديرەكتورىنىڭ ورىنباسارى قۋاندىق كاليدۋلليننىڭ ايتۋىنشا, بۇگىندە اتالعان كاسىپورىننىڭ قۇرىلىمدىق فيليالدارىندا جۇمىس جاساعان 15 مايدانگەر قالعان. كاسىپورىن باسشىلىعى ۇلى جەڭىستىڭ 70 جىلدىق مەرەكەسىنە وراي ولاردىڭ ارقايسىسىنا 500 مىڭ تەڭگەدەن قارجىلاي كومەك بەردى. «ءبىزدىڭ ۇجىمنىڭ قالىپتاسۋ كەزەڭىنە اعا ۇرپاقتىڭ قوسقان ۇلەسى ايرىقشا, ەڭبەگى ەرەن دەپ ەسەپتەيمىز. ءبىز ارداگەر-مۇنايشىلاردى, سونىڭ ىشىندە, سوعىس جانە تىل ارداگەرلەرىن ۇنەمى قۇرمەتتەۋدەن جالىقپايمىز. ويتكەنى, ەلىمىزدىڭ نەگىزگى تابيعي بايلىعى – مۇناي مەن گازدى يگەرۋدىڭ باستاۋىندا اعا بۋىن وكىلدەرى تۇرادى. اسىرەسە, سوعىس جىلدارىنداعى مۇنايشىلاردىڭ قاجىرلى ەڭبەگى ۇلى جەڭىستى جاقىنداتا ءتۇستى. ءبىز «ەمبىمۇنايگاز» قۇرىلىمدارىندا ەڭبەك ەتكەن 15 سوعىس ارداگەرىنىڭ ارقايسىسىنا 500 مىڭ تەڭگەدەن, ال تىل ارداگەرلەرىنە 20 مىڭ تەڭگەدەن قارجىلاي قولداۋ كورسەتۋدى ۇيعاردىق», – دەيدى «ەمبىمۇنايگاز» اكتسيونەرلىك قوعامى باس ديرەكتورىنىڭ ورىنباسارى قۋاندىق كاليدۋللين. جولداسبەك شوپەعۇل. دەرەك, سۋرەت: egemen.kz.