جۋىردا وبلىس ورتالىعىنان 270 شاقىرىمداي قاشىقتا جاتقان كوكپەكتى اۋدانىنان ءبىر توپ مەكتەپ وقۋشىسى ۇستازدارىمەن بىرگە سەمەيگە جولعا شىعادى. وقۋشىلاردىڭ ويعا الىپ شىققان ماقساتى – ەل جۇرەگى استانا تورىندە وتەتىن «Alem Tech Fest–2026» ازيا چەمپيوناتىنا قاتىسۋ ەدى. روبوتوتەحنيكا سالاسىندا باق سىنايتىن جاس ونەرتاپقىشتار ءۇشىن بۇل – جاي ساپار ەمەس, ارمانعا باستار اسقاق جول-تۇعىن. الايدا قىستىڭ قيعىلىعى مەن قيىرلىعى كوپ كۇرە جول جولاۋشىلاردى دىتتەگەن جەرگە ءدال ۋاقىتىندا جەتكەرمەي دىنكەلەتكەن كورىنەدى. ءسويتىپ اقپاننىڭ اق تۇتەك بورانى جوسپاردى وزگەرتىپ جىبەردى. اۋا رايىنىڭ قۇبىلۋىنا قاراي جولدار جابىلدى. جولاۋشىلار وسكەمەن ارقىلى اينالما باعىتپەن جۇرۋگە ءماجبۇر بولدى. ۋاقىت تىعىز. پويىز كەستەسى ەشكىمگە تاۋەلدى ەمەس. قولدارىندا – 28 بيلەت. بىراق 10-15 مينۋت كەشىگۋ قاۋپى تۋىنداعان.
وسى ساتتە ۇستازدار اقىلداسا كەلىپ, توسىن شەشىم شىعارادى. ۆوكزالدىڭ انىقتاما بولىمىنە حابارلاسقان ولار جاعدايدى ايتىپ, ءمان-جايدى تۇسىندىرەدى. جولاۋشىلاردىڭ كەلىپ-كەتۋ كەستەسىن جەتى ولشەپ, ءبىر كەسەتىن ۆوكزال باسشىلىعى تىعىرىققا تىرەلەدى. اقىرى سەمەي ۆوكزالى باستىعىنىڭ وكىلى زامزاگۇل كارىموۆا بولىمشە كەزەكشىسىمەن سويلەسىپ, جولاۋشىلاردى كۇتۋ مۇمكىندىگىن قاراستىرادى. ۆوكزال قىزمەتكەرلەرى تاۋەكەلگە بارىپ, پويىزدى توقتاتىپ, بالالاردى كۇتتىرۋگە تۋرا كەلەدى. وسىلايشا №37 «سەمەي – ماڭعىستاۋ» پويىزىنىڭ تىزگىن قاڭتارىپ قويعانىنا 10 مينۋت اسادى. بوگەلىپ تۇعان وتاربانىڭ ءوزى دە, جايعاسىپ ابىر-سابىرى باسىلعان جۇرگىنشىلەر دە اڭ-تاڭ. مەحانيكالىق قوزعالىسقا ابدەن بەيىم فۋنكتۋال جۇرگىنشىلەردىڭ قىڭقىل-سىڭقىلى كوبەيىپ, كەيبىر كەزدە جولاۋشىلار: «ياپىر-اۋ مىناۋىڭ سۋىقسىراپ, وت الماي تۇر ما, نەگە قوزعالمايدى, تۇگە» دەپ بايبالام باستالا بەرگەندە, 13 مينۋت بولعان پويىزدىڭ كۇتىپ تۇرعانىنا. وسى كەزدە قىزىل تاناۋ بولعان شۇپىرلەگەن وقۋشىلار دا پەررونعا جەتىپ ۇلگەردى.
8 ناۋرىز مەرەكەسىنە وراي پويىزدارعا قوسىمشا ۆاگوندار قوسىلدى
قارلى بوراندى جارىپ جەتكەن وقۋشىلاردى 15-ۆاگون الدىندا زامزاگۇل كارىموۆا مەن ۆوكزال كەزەكشىسى قۇندىز جانتەمىروۆا حانىم قارسى الدى. سول ساتتە پەررونداعى سالقىن اۋادا ءبىر ەرەكشە جىلىلىق سەزىلدى دەيدى قۋانعان ۇستازدار. ءتىپتى كەيبىر كوڭىلشەك ۇستازدار قۋانىش پەن ادامي جىلىلىققا ەرىكسىز جىلىپ تا العان كورىنەدى. ويتكەنى كەيدە جولعا ۇلگەرۋ – تەك لوگيستيكا عانا ەمەس, ول دا ءبىر جەڭىس سەكىلدى سەزىلەتىنى بار عوي. ال شالعاي اۋىلدان شىققان بالالاردىڭ شاتتىعىندا شەك جوق. كۋپەلەرىنە كوڭىلدى جايعاسقان.
ارينە, مۇنداي شەشىم ارنايى حاتتامامەن راسىمدەلەدى. تەمىرجول ءتارتىبى قاتاڭ. دەسەك تە ءتارتىپتىڭ وزەگىندە ادامي جاعدايى تۇرۋى زاڭدىلىق. تەمىر دە, تەرسەك تە ادام يگىلى ءۇشىن. بۇل جولى سولاي بولدى دا. ەندى وسىنداي جاعدايدا ۇلكەن دوداعا اتانعان وقۋشىلاردىڭ يىعىنداعى جاۋاپكەرشىلىك سالماعى ارتا ءتۇستى. بىراق ولار شىنىمەن دە ەل سەنىمىن اقتاپ, ءوڭىر جۇرتشىلىعىن قۋانىشقا بولەدى.
جولاۋشىلارعا ەسكەرتۋ: پويىزدا قانداي ارەكەتتەرگە تىيىم سالىنادى؟
استاناعا جەتكەن جاس روبوتوتەحنيكتەر ازيا چەمپيوناتىندا جۇلدەلى ورىن الىپ ورالدى. جەڭىس قۋانىشى ەلگە جەتكەندە: «بۇل جەڭىستى سەمەي ۆوكزالى قىزمەتكەرلەرىنە ارنايمىز. سولاردىڭ ارقاسىندا الەمدىك دوداعا قاتىسا الدىق», دەپ اعىنان جارىلىپ, الەۋمەتتىك جەلىگە اق جارما تىلىكتەرىن جاۋدىردى ۇستازدار. راسىندا, بالالار پويىزدى توقتاتقان جوق, ولاردى ءوز ارماندارى توسىپ تۇرعان ەدى.
مىنە, تاڭعى 7-دەن 20 مينۋت ءوتتى. مەن ۆوكزالدا بولعان وقيعانى سول جەردە, كۇتۋ زالىندا قولما-قول ءتۇسىرىپ بولدىم دا پەررونعا شىقتىم. باعىت: سەمەي – اياگوز. 22 مينۋت كەتكەندە پويىز قوزعالۋ كەرەك-تۇعىن. پويىز 10 مينۋت كەشىگىپ توقتادى. وتارباەۆ اعامشا ويلاندىم: «بۇل كەشىگىپ جەتكەن پويىز بۇگىن كىمدى قۋانتتى, كىمدى مۇڭايتتى ەكەن...» دەپ.
سەمەي
