استانا قالاسىنىڭ پروكۋراتۋراسى ازاماتتاردىڭ قاراجاتىن ۇلەستىك قۇرىلىسقا زاڭسىز تارتۋ دەرەگى بويىنشا قىلمىستىق ىستەردى تەرگەپ-تەكسەرۋدى اياقتادى.
زاڭسىزدىق سالدارىنان 426-دان استام وتباسى 8,2 ملرد تەڭگە كولەمىندە زالال شەككەن.
استانادا ۇلەسكەرلەر ءۇش جىلدان بەرى ۇيلەرىن الا الماي
«تەرگەۋ بارىسىندا قىلمىستىق سحەمانى ۇيىمداستىرۋشىلار زاڭناما تالاپتارىن بۇزا وتىرىپ «وازيس», «R-Club» جانە «R-ClubDeluxe» تۇرعىن ءۇي كەشەندەرىن سالۋ ءۇشىن ازاماتتاردىڭ اقشالاي قاراجاتىن ءتيىستى رۇقساتتار الماي تارتقانى انىقتالدى. سونداي-اق ۇلەسكەرلەردىڭ اقشاسى كوزدەلگەن ماقساتتا پايدالانىلماي, ال وبەكتىلەردىڭ قۇرىلىسى ءتيىستى تۇردە جۇرگىزىلمەگەن», دەلىنگەن استانا قالاسىنىڭ پروكۋراتۋراسى تاراتقان حابارلامادا.
جابىرلەنۋشىلەردىڭ ازاماتتىق تالاپتارىن قامتاماسىز ەتۋ ماقساتىندا, سوتتىڭ سانكتسياسىمەن كۇدىكتىلەردىڭ 10 پاتەر, 36 جەر ۋچاسكەسى, 16 تۇرعىن ەمەس ءۇي-جايى مەن 49 كولىگىن پايدالانۋعا تىيىم سالىنعان.
ال اتالعان ىسكە كۇدىكتى 12 تۇلعاعا قاتىستى «كۇزەتپەن ۇستاۋ» تۇرىندەگى بۇلتارتپاۋ شاراسى قولدانىلعان.
