بەلگىلى بالۋان, قازاقستان بارىسى مۇحيت تۇرسىنوۆ ءوز سوزىندە الداعى رەفەرەندۋمداعى ءار ازاماتتىڭ داۋىسى – ەلىمىزدىڭ بولاشاعىن قالىپتاستىراتىن ماڭىزدى ۇلەس ەكەنىن ايتتى.
«بۇل ارقايسىمىزدىڭ جاۋاپكەرشىلىگىمىزدى كورسەتەتىن تاريحي مۇمكىندىك. كونستيتۋتسيالىق رەفورما – مەملەكەتتىڭ دامۋ باعىتىن, قوعامنىڭ ادىلدىگىن, ازاماتتاردىڭ قۇقىعى مەن ەركىندىگىن ايقىندايتىن ماڭىزدى قادام. سپورتتا جەڭىسكە جەتۋ ءۇشىن بىرلىك, تاباندىلىق پەن سەنىم قاجەت. سول سياقتى ەل بولاشاعى دا ءار ازاماتتىڭ بەلسەندى ۇستانىمىنا بايلانىستى. مەن ارقاشان ەلىمنىڭ دامۋى مەن بىرلىگىن ءبىرىنشى ورىنعا قويامىن. سوندىقتان بارشاڭىزدى رەفەرەندۋمعا بەلسەندى قاتىسىپ, ءوز تاڭداۋىڭىزدى جاساۋعا شاقىرامىن. بىرگە بولايىق. بىرلىكپەن العا باسايىق. ەلىمىزدىڭ جارقىن بولاشاعى ءوز قولىمىزدا!», دەدى بالۋان.
برازيليالىق دجيۋ-دجيتسۋدان الەمنىڭ 6 دۇركىن چەمپيونى تايماس ءسالىموۆ كونستيتۋتسيالىق وزگەرىستەرگە ارنالعان رەفەرەندۋم – مەملەكەت تاعدىرى شەشىلەتىن تاريحي ءسات ەكەنىن ايتتى.
«نەگىزگى زاڭ – قوعامداعى ءتارتىپتىڭ, ادىلەتتىڭ جانە تۇراقتى دامۋدىڭ نەگىزى. سوندىقتان بۇل تاڭداۋعا بەيجاي قاراۋعا بولمايدى. ءار داۋىس – ورتاق بولاشاعىمىزعا قوسىلعان ۇلەس. ءبىز بۇگىنگى شەشىمىمىز ارقىلى ەرتەڭگى قازاقستاندى قالىپتاستىرامىز. بارشاڭىزدى ەل تاعدىرىنا بەيجاي قاراماي, ءوز تاڭداۋىڭىزدى جاساۋعا شاقىرامىن. بىرگە ارەكەت ەتسەك – جارقىن بولاشاقتى بىرگە قۇرامىز. بىرلىگىمىز بەكەم, ەلىمىز ماڭگى بولسىن!», دەپ جازدى سپورتشى.
سونداي-اق مۋاي-تايدان الەم چەمپيونى ايبات ولجاتاي دا جەلىدە ءوز پىكىرىن ورتاعا سالىپ, حالىقتى سىندارلى ساتتە شەشىم قابىلداۋدان قالىس قالماۋعا شاقىردى.
«سپورتتا ءاربىر جەڭىس – كۇندەلىكتى ەڭبەك پەن تاباندىلىقتىڭ ناتيجەسى. ءار بەلدەسۋ – جاۋاپكەرشىلىك, ءار قادام – بولاشاققا دەگەن سەنىم. بۇگىن ءبىزدى ءدال سونداي ماڭىزدى سىناق كۇتىپ تۇر. بۇل دا سپورتتاعىداي: ءار داۋىس – ءبىر ۇپاي, ءار ازاماتتىڭ تاڭداۋى – ورتاق جەڭىسكە قوسقان ۇلەس. جەڭىس ەشقاشان كەزدەيسوق كەلمەيدى. ول تارتىپتەن, بىرلىكتەن جانە بەلسەندىلىكتەن تۋادى. مەملەكەتتىڭ بولاشاعى دا سولاي قالىپتاسادى – نەمقۇرايدىلىقتان ەمەس, سانالى تاڭداۋ ارقىلى. رەفەرەندۋمعا قاتىسۋ – بۇل ءوز تاعدىرىڭا, ەلىڭنىڭ ەرتەڭىنە جاۋاپكەرشىلىكپەن قاراۋ. ءبىز قانداي مەملەكەتتە ءومىر سۇرگىمىز كەلەدى – ءادىل, اشىق, ادامعا باعىتتالعان ەل مە؟ بۇل سۇراقتىڭ جاۋابى ارقايسىمىزدىڭ داۋىسىمىزدا», دەدى الەم چەمپيونى.
ساراپشىلار كونستيتۋتسيانىڭ جاڭا جوباسىنا ءبىراۋىزدان قولداۋ ءبىلدىردى
