مەملەكەتتىك حاتشى جاپونيا ەلشىسىمەن كەزدەستى

استانا. 13 مامىر. مەملەكەتتىك حاتشى گۇلشارا ابدىقالىقوۆا جاپونيانىڭ قازاقستانداعى توتەنشە جانە وكىلەتتى ەلشىسى ماساەسي كاموحارامەن كەزدەستى. بۇل تۋرالى akorda.kz حابارلادى. كەزدەسۋگە سونداي-اق, قازاقستان تاراپىنان – ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى, ءماجىلىس دەپۋتاتى ە.تاراسەنكو, جاپونيا جاقتان – پارلامەنتتىك ءبىلىم, مادەنيەت, سپورت, عىلىم جانە تەحنولوگيا اعا ۆيتسە-ءمينيسترى م.فۋدزي, مادەنيەت اگەنتتىگىنىڭ دۇنيەجۇزىلىك مۇرالار جونىندەگى ءبولىمىنىڭ ديرەكتورى ت.وكاموتا قاتىستى. كەزدەسۋدى اشقان مەملەكەتتىك حاتشى جاپونيا قازاقستاننىڭ ماڭىزدى ستراتەگيالىق سەرىكتەسى ەكەنىنە توقتالدى. گۇلشارا ابدىقالىقوۆا مەملەكەت باسشىسىنىڭ 2008 جىلدىڭ ماۋسىم ايىندا جاپونياعا جاساعان ساپارىنىڭ ناتيجەسى ستراتەگيالىق سەرىكتەستىكتى نىعايتۋعا ىقپال ەتكەنىن ايرىقشا اتاپ ءوتتى. ول قازاقستان مەن جاپونيانىڭ ۇكىمەتتىك جانە جەكەمەنشىك سەكتورلارىنىڭ ەكونوميكالىق ىنتىماقتاستىق جونىندەگى بىرلەسكەن كوميسسياسىنىڭ قىزمەتىن جوعارى باعالادى. ماسەلەن, 2014 جىلى ەكى ەل اراسىنداعى تاۋار اينالىمى 1,7 ملرد. دوللاردى قۇرادى. اڭگىمە بارىسىندا الەۋمەتتىك-گۋمانيتارلىق سالاداعى قازاقستان-جاپونيا قارىم-قاتىناسىن دامىتۋدىڭ وزەكتى ماسەلەلەرى قوزعالدى. گۇلشارا ابدىقالىقوۆا ەكى ەل حالىقتارىنىڭ ارتىپ كەلە جاتقان ءوزارا مۇددەلەستىگى جاعدايىندا مادەني الماسۋلاردىڭ ماڭىزدىلىعىنا ەرەكشە توقتالىپ, مادەنيەت سالاسىندا ەكىجاقتى كەلىسىم جاساۋ مۇمكىندىگىن قاراستىرۋدى ۇسىندى. سونىمەن قاتار, تاراپتار گەندەرلىك تەڭدىك ماسەلەلەرىن, سونىڭ ىشىندە 1995 جىلى وتكەن بۇۇ-نىڭ ايەلدەر احۋالى جونىندەگى ءتورتىنشى بۇكىلالەمدىك كونفەرەنتسياسىندا قابىلدانعان پەكين دەكلاراتسياسى جانە ءىس-قيمىلدار تۇعىرناماسى اياسىنداعى ماسەلەلەردى تالقىلادى. كەزدەسۋ سوڭىندا ەلشى مەملەكەتتىك حاتشىعا جاپونيانىڭ پرەمەر-ءمينيسترى س.ابەنىڭ بيىل تامىز ايىندا توكيودا وتەتىن ءىى بۇكىلالەمدىك ايەلدەر كونفەرەنتسياسىنا شاقىرتۋىن تابىس ەتتى. ەلامان قوڭىر. دەرەك, سۋرەت: akorda.kz.