تاۋەكەل – ەردىڭ ءىسى

قالتاەۆ جانىبەك – شاعىن كاسىپكەر. ۇزىن جولدىڭ بويىندا شاعىن بۋدكاسى بار. اعارعان ساتادى. قىمىز, قىمىران, اشىعان كوجە دەگەندەي. بىرەۋگە پايداسى بولماسا زيانى جوق, ءوز ارباسىن سۇيرەپ, وتباسىن اسىراپ جۇرگەن ازامات. – مەملەكەت باسشىسى نۇر­سۇلتان نازارباەۆتىڭ ءۇن­دەۋىن گازەتتەن وقىدىم, تەلەديداردان كوردىم, – دەيدى جانىبەك شەكەر ۇلى. – بۇل – وتە ماڭىزدى وقيعا. مەنىڭ بايقاۋىمشا, جۇرتتىڭ كوبى سەلت ەتە قويعان جوق سياقتى. ورىندالعان, ور­ىندالماعان رەفورما­لار بار, سونىڭ بىرىندەي قابىل­داي ما, قايدام. – ال, ءوزىڭ شە؟ دۇنيەجۇزىلىك ساۋدا ۇيىمىنا كىرەتىن بولدىق. نە وزگەرىس كۇتەسىڭ؟ – ەندى ءبىزدىڭ شاعىن بيزنەس­كە ونشالىقتى ىقپالى جوق-اۋ دەيمىن. گەرمانيادا ءبىر نەمىس ءۇيىر-ءۇيىر جىلقى ۇستاپ قىمىز سا­تادى دەگەندى «ەگەمەننەن» وقى­­عانمىن. ءتىپتى, سول نەمىس بيە ءسۇتىن تەرەڭ وڭدەپ وپا-دالاپ جاساي­دى دەيدى. قازاقستانعا دا كەلىپ, بيە ساۋدىڭ, قىمىز باپتاۋ­دىڭ جايىن ۇيرەتىپ كەتكەن بە, ايتەۋىر, ­گازەتتەر ءبىر شۋلادى عوي. بىراق, نەمىستىڭ قىمىزى ءبىز­دىڭ ەلدىڭ قىمىزىنداي قايدان بولسىن. اسپانى ۇنەمى دىم ءبۇر­كىپ تۇرادى, ءشوبى جاپ-جاسىل. جۋساندى دالاسى جوق. سون­دىق­تان قىمىزى جاسىق ءارى ءبىزدىڭ باعامەن سالىستىرعاندا قىم­بات. قازاق قىمىزىنا باسەكە­لەس بولادى دەپ ويلاماي­مىن. ال قىمىراننىڭ ءبىر ءليترى قى­تايدا 8 مىڭ تەڭگەگە دەيىن بارا­دى دەگەندى ەستىدىم. سوندىق­تان, قازاقتىڭ اعارعانىنا باسەكە­لەس جوق. بىراق, ەلەكتر تاۋارلارى, قۇرىلىس ماتەريالدارى, جو­عارى تەحنولوگيالىق ءونىم­دەر قازاق­ستان نارىعىندا كوپتەگەن كاسىپ­ورىندارىمىزدى ىعىستىرادى. – ەلباسى دا ۇندەۋدە وسى قاۋىپتى ايتتى. ساپاسى جوعارى, باعاسى تومەن تاۋارلاردىڭ ءباسى كۇشەيەدى. قازاق كاسىپكەرلەرى نە ىستەۋ كەرەك دەپ ويلايسىڭ؟ – سايرامدا «التىن ادام» دەگەن ساۋدا بەلگىسىمەن كوستيۋم-شالبار تىگىلەدى. باعاسى كوڭىلگە قونىمدى. جيىرما, قىرىق مىڭ تەڭگە ارالىعىندا. وزبەكستاننان كونتراباندالىق جولمەن كوس­تيۋم-شالبارلار كەلەدى. باعاسى كوتەرمە ساۋدادا 10 مىڭ تەڭگە. ەكەۋى بىردەي سياقتى. بىراق, ويلاپ قاراساڭىز, 10 مىڭ تەڭگەگە قانداي كوستيۋم-شالبار كەلەدى؟ تىگۋ قۇنىنىڭ ءوزى وسىنداي عوي. ساپا تومەن, ماتەريال ارزانقول. بىراق, ەكەۋىنىڭ دە الۋشىسى بار. جاقسى كيىم كيگىسى كەلەتىن ادام «التىن ادام» فابريكاسىنا بارادى. مۇنى قالتاسى كوتەرە المايتىندار قىتاي, وزبەكستان, قىرعىزستاننىڭ ارزان كيىمدەرى كەرەك. دۇنيەجۇزىلىك ساۋدا ۇيىمى ارقىلى كەلگەن تاۋارلارعا جۇرت وسىلاي قارايتىن بولادى. ۇتىلار تۇسىمىز دا ۇتارىمىز دا بار. بىراق, ەلباسى وسىنداي بولاتىنىن, باسەكەگە شىداس بەرۋ ءۇشىن جاڭا تەحنولوگيالار قاجەتتىلىگىن ۇنەمى ايتىپ كەلدى. جاڭا كاسىپورىندار مەن اۋىل شارۋاشىلىعىن قولداۋ ارقىلى ءبىرشاما بيىككە كوتەرىپ الدىق. تاۋەكەل دەگەن ەردىڭ ءىسى. وزگە مەملەكەتتەرمەن تەرەزەمىز تەڭ بولۋى ءۇشىن دسۇ-عا كىرۋ كەرەك بولدى. ەندى نە تارتىناتىنى بار. قيىندىق بولادى. ەندى قازاق­قا بوسبەلبەۋلىك كەرەگى جوق. اكىم­دىكتەگىلەر دە حالىققا ۇلكەن قولداۋ بىلدىرسە دەيمىن. كەي­دە قالا­نىڭ ءسانىن بۇزادى دەپ شاعىن بۋد­كامىزدى ارتىپ اكەتە جازدايدى. مىنا قىتاي شاعىن جانە ورتا بيزنەسكە قول تيگىزبەي الەمدىك نارىققا شىقتى عوي. باسەكەلەستىك – كاسىپكەردى شيراتادى. جاڭاشا جۇمىس جاساۋعا تالپىندىرادى. جامانشىلىق شاقىرىپ ويبايلاماعاننىڭ ەمەس, جاقسىلىق ويلاعاننىڭ تاسى ورگە دومالايدى. ونى ءومىردىڭ ءوزى كورسەتىپ ءجۇر. قازاق كاسىپكەرلەرى ساپاسى جوعارى, باعاسى كوڭىلگە قونىمدى تاۋارلاردى كوپتەپ شىعارسا, دسۇ-نىڭ پايداسىن كورەدى. الدىنان ۇلكەن نارىق الەمى اشىلادى. بۇل – ۇلكەن مۇمكىندىك. اڭگىمەلەسكەن باقتيار تايجان, «ەگەمەن قازاقستان». وڭتۇستىك قازاقستان وبلىسى.