DataHub تەلەگرام ارناسىنىڭ مالىمەتىنشە, اۋىل سانىنىڭ ازايۋ ءۇردىسى كەمىندە 25 جىلدان بەرى جالعاسىپ كەلەدى. سوڭعى ءۇش جىلدا تەرىس ديناميكا ايتارلىقتاي ۇدەي تۇسكەن. ەگەر 2020-2022 جىلدارى 46 ەلدى مەكەن قىسقارسا, 2023-2025 جىلدارى بۇل كورسەتكىش 199-عا جەتكەن. جالپى, باقىلاۋ جۇرگىزىلگەن كەزەڭ ىشىندە اۋىلدار سانى 1,8 مىڭعا ازايعان.
2025 جىلعى قىسقارۋعا نەگىزىنەن ءبىر-بىرىمەن شەكتەسەتىن ءۇش سولتۇستىك ءوڭىر – سولتۇستىك قازاقستان, اقمولا جانە پاۆلودار وبلىستارى اسەر ەتتى. ولار جالپى تومەندەۋدىڭ 80%-ىن قامتاماسىز ەتكەن.
adilet.zan.kz سايتىندا جاريالانعان قۇجاتتارعا سايكەس, اتالعان وڭىرلەردە ەسەپتى كەزەڭدە 68 اۋىل تاراتىلىپ, ءبىر جاڭا اۋىل – نۇرلى (اقمولا وبلىسى تسەلينوگراد اۋدانى, استانامەن شەكتەسەدى) پايدا بولدى. بۇل كورسەتكىشتەر رەسمي ستاتيستيكانىڭ ەگجەي-تەگجەيلى دەرەكتەرىمەن سايكەس كەلەدى.
2021 جىلعى حالىق ساناعى تاراتىلعان 68 اۋىلدا بارلىعى 1,5 مىڭ ادام تۇرعانىن كورسەتكەن. بۇل 2009 جىلعى ساناقپەن سالىستىرعاندا 4,4 ەسە از. ەڭ كوپ تۇرعىنى بار اۋىل – اقمولا وبلىسىنداعى كراسنوسەلسكوە اۋىلى (74 ادام). 68 اۋىلدىڭ 62-سىندە حالىق سانى 50 ادامنان اسپاعان. پاۆلودار وبلىسىنداعى مالايا پارامونوۆكا اۋىلىندا تۇرعىندار مۇلدە تىركەلمەگەن. ال سولتۇستىك قازاقستان وبلىسىنداعى ميرنوە جانە كالينوۆكا اۋىلدارىندا تيىسىنشە ءبىر جانە ەكى ادام عانا تۇرعان.
اۋىلداردىڭ تاراتىلۋىنا نەگىزگى سەبەپ – حالىق سانىنىڭ ازدىعى. زاڭعا سايكەس, ءۇش جىل بويى حالقى 50 ادامعا جەتپەگەن ەلدى مەكەندەر تاراتىلۋعا جاتادى. تاراتۋ دەگەنىمىز – ەلدى مەكەندى ەسەپتىك دەرەكتەردەن شىعارىپ, ونى جاقىن ماڭداعى ءىرى ەلدى مەكەننىڭ قۇرامىنا قوسۋ. سوڭعى شەشىمدى جەرگىلىكتى بيلىك تۇرعىنداردىڭ اشىق جينالىستا بىلدىرگەن پىكىرىن ەسكەرە وتىرىپ قابىلداۋى ءتيىس.
وسىلايشا, ونداعان اۋىلدىڭ تاراتىلۋى ەلدە زاڭ تالاپتارىنا سايكەس جابىلۋعا جاتاتىن, تۇرعىندارى ءىس جۇزىندە قالماعان ەلدى مەكەندەردىڭ ءالى دە از ەمەستىگىن كورسەتەدى.
جالپى اۋىل حالقى سانىنىڭ قىسقارۋى – نەگىزىنەن كوشى-قون اسەرىنەن – تەك سولتۇستىك قازاقستان, اقمولا جانە پاۆلودار وبلىستارىنا عانا ەمەس, ەلدىڭ كوپشىلىك وڭىرلەرىنە ءتان ءۇردىس.
ەلدەگى العاشقى اگروتەحنوپارك اۋىل شارۋاشىلىعىنا قانداي پايدا اكەلەدى؟
2025 جىلدىڭ قورىتىندىسى بويىنشا اۋىل حالقىنىڭ ءوسىمى تەك الماتى, اتىراۋ جانە ماڭعىستاۋ وبلىستارىندا تىركەلگەن.
