قوستانايدا 92 جاستاعى ارداگەردى الاياق الداپ سوققان

قوستاناي. 25 اقپان. قوستانايدا1981 جىلى تۋعان الاياق بويجەتكەن ۇلى وتان سوعىسىنىڭ ارداگەرىن نەمەرەسى بولىپ الداپ, 30 مىڭ تەڭگە اقشاسىن الىپ كەتكەن. بۇل تۋرالى ng.kz حابارلادى. ۇلى وتان سوعىسىنىڭ ارداگەرى 92 جاستاعى يۆان كوتەلەۆسكي مەن ونىڭ جۇبايى ۆالەنتينا ۆاسيلەۆنانىڭ ەسىگىن قاعىپ كىرگەن قىز, وعان تاڭدانىپ قاراعان قاريالارعا: «نەمەرەلەرىڭدى تانىماي قالدىڭدار ما؟» دەپ كۇلەدى. اتاسىنىڭ «تانيامىسىڭ؟» دەگەنىنە: «ءيا, ءيا» دەيدى.سوسىن, «ەمحاناعا بارىپ ەدىم, دارىگە اقشام جەتپەي تۇر» دەيدى. وسىدان ەكى جىل بۇرىن شوبەرە سىيلاعان نەمەرەسى تانيانىڭ اتاسى مەن اجەسىنە ءجيى كەلە بەرۋگە ۋاقىتى جوق, سوندىقتان كوزى ناشار كورەتىن قاريالار بوتەن قىزدىڭ تانيا ەكەنىنە سەنەدى. وسىنى مالدانعان «نەمەرەسى» اتاسىنان 20 مىڭ اقشا سۇرايدى. اتاسى 20 مىڭ تەڭگە بەرگەندە, «ماعان جالپى 33 مىڭ كەرەك ەدى, جارايدى, 3 مىڭ تەڭگە وزىمدە بار, 30 مىڭ بەرە قوي» دەپ, 30 مىڭ تەڭگە الىپ, شىعىپ كەتەدى. قاريالار الدانعانىن قىز كەتكەن سوڭ بىلەدى. ۆالەنتينا ۆاسيلەۆنا ونىڭ اق كۋرتكاسى, اق ەتىگى, اق شالبارى بار ەكەنىن, وزدەرىمەن سويلەسكەندە بەتىن بۇرىپ وتىرعانىن بايقاپ قالادى. اتاسى مەن اجەسى ءوزىنىڭ نەمەرە قىزى تانياعا تەلەفون سوققاندا, ۇيىنە الاياقتىڭ كەلگەنىن تۇسىنەدى. ولاردىڭ ەسىگىنىڭ سىرتىندا «بۇل ۇيدە ۇلى وتان سوعىسىنىڭ ارداگەرى تۇرادى» دەگەن جازۋدان الاياق قارتتار تۇراتىنىن بىلسە كەرەك. قوستانايلىق پوليتسەيلەر كوپ ۇزاماي الاياق قىزدى ۇستادى. ول 1981 جىلى تۋعان, ەسىرتكىگە تاۋەلدى جانە وسىنداي الاياقتىعى, ۇرلىعى ءۇشىن تالاي رەت قىلمىستى ىسكە تارتىلعان بويجەتكەن ەكەن. ءنازيرا جارىمبەتوۆا. دەرەك, سۋرەت: ng.kz .