پەتروپاۆلدىق تۇرعىن ءوزى قۇراستىرعان كولىكپەن جۇلدەلى بولدى

پەتروپاۆل. 25 اقپان. پەتروپاۆلدا تۇڭعىش رەت «ماشينالار جارىسى» اتتى اۆتوراللي ۇيىمداستىرىلىپ, 15 ادام سىنعا ءتۇستى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى حابارلادى. جارىستى ۇيىمداستىرۋشىلاردىڭ ءبىرى الەكسەي بيبيكوۆتىڭ ايتۋىنا قاراعاندا, مارەدەن شىعىپ, سورەگە جەتەر تراسسانىڭ كۇردەلى بولۋى ويلاستىرىلىپتى. اۆتوموبيلدەردىڭ ماركالارى مەن شىعۋ مەرزىمدەرىنە شەك قويىلماعان. الايدا, «قولدان جاسالعان» كەدەرگىلەرگە قاراماستان جارىسقا قاتىسۋشىلاردىڭ ءبارى جارىستى ءساتتى اياقتاعان. سورەنى ءبىرىنشى بولىپ Land Cruiser شەتەلدىك جۇردەك كولىكتىڭ يەسى ارتەم دۋبروۆسكي قيعان. ول مول تاجىريبەنىڭ ارقاسىندا قارسىلاستارىن شاڭ قاپتىرىپ كەتكەن. ال, ءوز قولىمەن جيناپ, قۇراستىرعان «گاز-69» كەڭەستىك كولىكپەن وزگەلەرگە باسەكەلەس بولا بىلگەن ۆلاديمير گنەدكو ءۇشىنشى ورىندى جەڭىپ العان. بىلەگى مىقتى وڭكەي ەر ازاماتتار اراسىندا «ارپا ىشىندەگى ءبىر بيدايداي» كورىنگەن ماريا ۆرجەتس ۇشتىككە ىلىنە الماسا دا, جارىسقا ۇكىلەپ قوسقان «نيۆا» ماركالى «سايگ ۇلىگىنىڭ» جولدا قالدىرماعانىنا ريزا. «ماشينالار جارىسىن» جىلدا وتكىزۋدى جوسپارلاپ وتىرمىز. كورەرمەندەردىڭ كوڭىلىنەن شىققان بولۋ كەرەك, قازىردىڭ وزىندە قاتىسۋعا تىلەك بىلدىرۋشىلەردىڭ قاتارى قالىڭ. سوعان سايكەس, جارىس شارتتارىن قايتا قارايتىن بولامىز. تىگىلەتىن جۇلدەلەر سانىن دا ارتتىرامىز», دەيدى ا. بيبيكوۆ. ءومىر ەسقالي. دەرەك: سولتۇستىك قازاقستان وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى. سۋرەت: bigbo.ru.