وتىرىستى اشقان اسان دارباەۆ جيىندى تۇركى الەمىنىڭ رۋحاني ورتالىعى سانالاتىن تۇركىستاندا وتكىزۋدىڭ سيمۆولدىق مانىنە توقتالدى.
« ۇلى جىبەك جولى حالىقتارىن تاريحي بىرىكتىرگەن تۇركى الەمىنىڭ رۋحاني ورتالىعى – تۇركىستاندا باس قوسۋ ەرەكشە مانگە يە. بۇگىندە بىرىككەن اۋماقتىق قوعامداستىق ديالوگ الاڭىنان پراكتيكالىق ىنتىماقتاستىقتىڭ ءتيىمدى تەتىگىنە اينالىپ, جاڭا قۇن تىزبەكتەرىن قالىپتاستىرۋعا جانە ساۋدا بايلانىستارىن كەڭەيتۋگە كوشۋدە», دەدى ول.
2025 جىلدىڭ قورىتىندىسى بويىنشا تمۇ ەلدەرىنىڭ ءوزارا ساۋدا كولەمى 11,9 ملرد اقش دوللارىنان استى. قازاقستاننىڭ تاۋار اينالىمى:
وزبەكستانمەن – 4,3 ملرد دوللار,
تۇركيامەن – 4,9 ملرد دوللار,
قىرعىزستانمەن – 2 ملرد دوللار,
ازەربايجانمەن – 425 ملن دوللاردى قۇرادى.
ينۆەستيتسيالىق ءوزارا ءىس-قيمىل دا قارقىن الىپ كەلەدى. 2005-2025 جىلدار ارالىعىندا تمۇ ەلدەرىنەن قازاقستانعا تارتىلعان تىكەلەي شەتەلدىك ينۆەستيتسيالار كولەمى 6,3 ملرد دوللاردان استى, ونىڭ ىشىندە 2025 جىلى شامامەن 210 ملن دوللار سالىنعان.
ءوز كەزەگىندە, وتاندىق ينۆەستيتسيالار تمۇ ەلدەرىنىڭ ەكونوميكالارىنا شامامەن 5 ملرد دوللارعا جەتتى. تەك 2025 جىلدىڭ وزىندە بۇل كورسەتكىش 1,3 ملرد دوللاردان استى.
قازىرگى تاڭدا قازاقستاندا تمۇ ەلدەرىنىڭ كاپيتالى قاتىساتىن 12 مىڭنان استام كومپانيا جانە 1300-دەن اسا بىرلەسكەن كاسىپورىن جۇمىس ىستەيدى. ولار ساۋدا مەن ونەركاسىپتىك كووپەراتسيانى دامىتۋعا ەلەۋلى ۇلەس قوسىپ وتىر.
اسان دارباەۆ ءوز سوزىندە مەملەكەت باسشىسىنىڭ ۇستانىمىنا دا توقتالدى.
«پرەزيدەنت قاسىم-جومارت توقاەۆ تمۇ-نىڭ ەكونوميكالىق الەۋەتىن ارتتىرۋدىڭ, كولىكتىك-لوگيستيكالىق جانە ينۆەستيتسيالىق ىنتىماقتاستىقتى دامىتۋدىڭ ماڭىزدىلىعىن اتاپ ءوتتى. وسى باعىتتاعى نەگىزگى قۇرالداردىڭ ءبىرى – تۇركى ينۆەستيتسيالىق قورى. ءبىز قور تاراپىنان قارجىلاندىرۋعا الەۋەتتى دايىن باسىم جوبالاردىڭ تىزبەسىن قالىپتاستىرۋعا كىرىسۋدى ۇسىنامىز», دەدى ول.
كەزدەسۋ بارىسىندا ساۋدا كەدەرگىلەرىن ازايتۋ, كولىك باعىتتارىن ءارتاراپتاندىرۋ جانە تسيفرلىق ساۋدا قۇرالدارىن دامىتۋ ماسەلەلەرىنە ەرەكشە نازار اۋدارىلدى.
583 ملن تەڭگەدەن استام زالال: تۇركىستاندا مەكتەپ قارجىسىن جىمقىرعان 14 ادام سوتتالدى
شىعىس پەن باتىستى بايلانىستىراتىن ستراتەگيالىق باعىت رەتىندە ورتا ءدالىزدىڭ ءرولى اتالىپ ءوتتى. بۇل مارشرۋت ءوزارا ساۋدانىڭ وسۋىنە جانە ترانزيتتىك الەۋەتتى ارتتىرۋعا قوسىمشا مۇمكىندىك بەرەدى.
جيىن قورىتىندىسى بويىنشا تمۇ-عا مۇشە مەملەكەتتەر اراسىنداعى ەكونوميكا, ساۋدا, ينۆەستيتسيالار جانە قارجى سالالارىنداعى ىنتىماقتاستىقتىڭ جول كارتاسى بەكىتىلدى. قۇجاتتا بىرلەسكەن جۇمىستىڭ باسىم باعىتتارى مەن ولاردى ىسكە اسىرۋ تەتىكتەرى ايقىندالعان.
وتىرىستىڭ باستى وقيعاسى – ەكونوميكا جانە ساۋدا مينيسترلەرىنىڭ XIV كەزدەسۋىنىڭ قورىتىندى كومميۋنيكەسىنە قول قويۋ ءراسىمى بولدى.
تۇركىستانعا كوكتەم ەرتە كەلدى: ناۋرىزەك قۇسى ورالىپ, بايشەشەك گۇلدەدى
سونىمەن قاتار, مۇشە مەملەكەتتەر اراسىندا ساۋدا سالاسىنداعى ارىپتەستىك تۋرالى ءوزارا تۇسىنىستىك جونىندەگى مەموراندۋم جاسالدى.
قابىلدانعان شەشىمدەر تمۇ ەلدەرىنىڭ ەكونوميكالىق ينتەگراتسيانى كەزەڭ-كەزەڭىمەن نىعايتۋعا, ينۆەستيتسيا مەن تەحنولوگيالىق دامۋعا نەگىزدەلگەن زاماناۋي ىنتىماقتاستىق ارحيتەكتۋراسىن قالىپتاستىرۋعا دەگەن ورتاق ۇمتىلىسىن ايقىندايدى.
