وبلىستىق تاريحي-ولكەتانۋ مۋزەيىنىڭ ديرەكتورى مۇحانبەتقالي كيپيەۆتىڭ دەرەگىنە قاراعاندا, اتالعان قورعانداردان 1000-عا جۋىق جادىگەر تابىلىپتى. ماسەلەن, قاراباۋ-2 قورعانىندا توعىز قابىر ساقتالعان. ونىڭ ىشىندە جەتەۋى تونالماعانى انىقتالىپتى.
«وسى كەزگە دەيىن تونالماي جەتكەن قابىرلەردەن 100-گە جۋىق التىن مەن كۇمىستەن, اسىل تاستان جاسالعان اشەكەي بۇيىمدار, قارۋ-جاراق, قىش پەن سۇيەكتەن جاسالعان ىدىستار تابىلدى. ال قاراقۇدىق-1, قاراقۇدىق-2 قورعاندارىنداعى قابىرلەردى زەرتتەۋ كەزىندە اقبوكەن مەن قاسقىردىڭ بەينەسى بار كۇمىس پيكتوگرامما, التىننان دايىندالعان زەرگەرلىك بۇيىمدار, كەراميكالىق جانە اعاش ىدىستار, تۇرمىستا قولدانىلاتىن ءارتۇرلى زات, قولا قازاندار, تەمىردەن, قولادان جاسالعان اكيناك, سەمسەر مەن نايزا سەكىلدى قارۋ-جاراقتىڭ بولىكتەرى, جەبە ۇشتارى شىقتى», دەيدى م.كيپيەۆ.
ونىڭ پىكىرىنشە, اتالعان قورعانداردا جۇرگىزىلگەن قازبا جۇمىسى كەزىندە الىنعان بىرنەشە جادىگەر نازار اۋدارتىپ وتىر. سونىڭ ءبىرى – بۇلان مۇيىزىنەن قاشالعان قۇرباندىق ىدىسى. مۇنداي جادىگەر ەل تاريحىندا سيرەك كەزدەسەدى.
سونداي-اق تاڭبالانعان قىش ىدىس بوياۋمەن قاپتالىپتى. اڭ ستيلىندەگى اۋىزدىق سۇيەكتەن دايىندالىپتى. كەيبىر جادىگەرلەر وسى كەزگە دەيىن ەلىمىزدىڭ وزگە وڭىرىنەن تابىلماعان. بۇل كونە تاريحتان سىر شەرتەتىن جادىگەرلەردىڭ قۇندىلىعىن ارتتىرا تۇسەدى.
مۇنايلى وڭىردەگى تاعى ءبىر تاريحي مەكەن – شوشاق اتالاتىن قۇمدى توبە. مۇندا ەنەوليت داۋىرىندەگى قابىرلەر ساقتالعان. اتالعان توبەدەگى قابىردەن ءبىزدىڭ زامانىمىزعا دەيىنگى V-IV مىڭجىلدىقتان سىر شەرتەتىن 605 جادىگەر تابىلىپتى. ونىڭ ىشىندە تاس بالتانىڭ بولىكتەرى, كرەمني پلاستينالارى, وڭدەلگەن قايىرشاق مونشاقتار كوللەكتسياسى مەن تاس بىلەزىكتەر بار.
اتىراۋ وبلىسى
